探熱針

物極必反 曬燈舉重谷行 葛民輝減 40磅減到甩皮

軟硬葛民輝去年跟草蜢聯合開騷勁減三十多磅晒肌亮相後,自稱同劉華睇齊減上癮的他,一直未有停止健身,下月軟硬再合體唱賀歲騷,阿葛為求突破再爆肌,於是再減多十磅,並加重料又舉又曬燈谷到行。由細都唔鍾意食生果、長期缺乏維他命 C的阿葛,在一輪催谷下,搞到手心不停甩皮。

再爆驚喜

在林珊珊健身教練男友 Michael督操下,葛民輝由一身豬腩肉變六嚿肌,搣走三十多磅後,繼續勤操,以免六合一,下月軟硬在紅館開騷,阿葛更加搏命,戒汽水、舉啞鈴,又將皮膚曬黑,務求加強人魚線,再給觀眾驚喜。
「阿葛一向鍾意飲可樂,直情係當水飲,朝早起身就飲一罐,而家就連可樂都戒埋。佢本身皮膚敏感,但為咗出嚟效果好,走去曬太陽,直到啲皮膚頂唔順,佢又轉去曬燈,點知曬燈都唔得,最後又改搽 self tan太陽油,總之乜都試。操得勁,但阿葛又從來唔食生果,長期缺乏維他命 C,搞到皮膚好乾,手心仲不斷甩皮,大家都驚佢好似之前咁唔舒服出事。」知情者說。
上週四(十二月十九日)中午十二點半,著住外套牛仔褲的阿葛去到九龍城獅子石道排舞室,與林海峰彩排五粒鐘,阿葛還跟記者表示,已成功減去四十多磅:「我舉埋啞鈴,由上次軟硬大戰草蜢到而家,前後減咗四十幾磅。」


排舞當日,阿葛部車泊九龍城街邊,五個鐘後,已經被抄牌。 

08年,阿葛未瘦身前亦曾經以豬腩肉示人,在拍檔林海峰的棟篤笑露肉亮相。(《 Face》圖片) 

去年跟草蜢一齊搞 show,阿葛明顯弗咗黑咗,但要 keep住就要繼續落功夫。

有錢唔敢賺

身形縮荷包脹,這年來軟硬先後與草蜢到澳門及馬來西亞等不同地方巡迴演出,甚至有主辦商開出三百萬包起軟硬到內地演出。「個主辦商都有搵《古惑仔》返內地做騷,同樣都係呢個價,《古惑仔》有五個男仔輪住唱唔使點講嘢,筆錢好易賺,但軟硬得兩個人,又講多過唱,仲要事先講明唔可以亂講嘢,佢哋驚自己臨場收唔到掣,會搞到有手尾,加上筆錢唔算好多,因為三百萬包埋台燈聲製作費,七除八扣,軟硬實際落袋唔算多,所以寧願賺少啲。」知情者說。


愛上做運動的阿葛,去年主持旅遊節目,更踩單車環島遊介紹台灣。 

《古惑仔》在內地開騷,跟軟硬一樣都係收 300萬。 

賀年騷,阿葛同 Jan玩嘢之餘,繼續有騷肌環節。 

跟草蜢開演唱會,做開運動的阿葛在台上表演掌上壓冇難度。 

反效果

為咗達到瘦身效果,藝人幾乎無所不用其極,但欲速不達,甚至出現反效果,損害健康。

 

苟芸慧
曾經是宅男女神的苟姑娘,因與城城傳緋聞,困擾加工作壓力,搞到荷爾蒙出事,身形不斷膨脹。有指她為減磅亂食減肥藥、去水丸,結果體重不跌反升,高峰期 180磅,被冠肥茍。

 

黃秋生
以前體重有二百磅的黃秋生,為速成減磅自度怪招,每天飲檸檬加辣椒水排便,結果傷及腸胃,要停止減肥調理身體。

 

細細粒
由細肥到大的細細粒(陳嘉佳),,每日只食一個蘋果,兩個月內雖成功減去四十磅,但事後體重火速反彈。唔死心的她繼而亂食減肥藥,搞到一個鐘排尿二十次,昏迷入院。事後始知服食的減肥藥是開給嚴重腎衰竭病人所用的水去丸,執番條命,細細粒從此不再減肥。


撰文、攝影:娛樂組

arrow
arrow
    全站熱搜

    tvb4life 發表在 痞客邦 留言(0) 人氣()