上期本刊率先報道楊思琦於美國洛杉磯為空心老倌吳帥誕下女嬰,未幾她在微博才肯留言認生咗:「很開心我已順利誕下BB女,母女平安而且BB很健康!接下來我會俾心機照顧我的小寶寶!」言語間充滿喜悅,但暗示日後要獨力照顧囡囡。思琦只向傳媒透露女兒英文名為Krystal,本刊從特別途徑得知,其中文名已定為楊卓穎(譯音),跟媽咪姓楊。日前網上有一張短髮思琦的婚紗照流出,據知她去年赴美前,曾秘密在港跟吳帥影過婚紗照,打算誕下B女後便正式簽紙結婚。點知吳帥真面目逐一被撕破,思琦痛定思痛,決定拒婚兼斬纜,吳帥隨即匿藏大陸。下周便會抱B返港的思琦,將會展開單親媽媽新生活,為囡囡卓穎努力搵奶粉錢。而舊愛李泳豪最近又爆出誤溝人妻Miki,思琦同豪仔真係同是天涯淪落人。


01年戴上港姐冠軍后冠的楊思琦,多年來乖乖女形象深入民心,不過去年6月單方面宣布與拍拖九年的男友李泳豪分手後,即被指一腳踏兩船,與前香港運動員吳帥劈腿半年。隨後被指珠胎暗結的思琦更多次理直氣壯否認,直到去年聖誕節被傳媒於美國洛杉磯其胞兄門外影到大肚照斷正,乖女形象即時破滅。本刊上期報道思琦大嫂親口透露思琦已於二月中產女後,思琦即在微博寫感受,更大方上載寶貝女Krystal近照,其後接受傳媒訪問時,又自爆:「BB出世重六磅九,係順產出世,由媽咪陪我入產房。過程好辛苦呀!正式名字未改,留番俾媽咪決定,我暫時叫BB做Krystal。」

獨家消息
Yeung Cheuk Wing, Krystal 楊卓穎(譯名)

為B女姓氏煩惱
據知思琦曾為女兒姓氏煩惱,不過思琦產後心情已回復輕鬆,既然決定與吳帥斬纜,最後索性讓BB跟自己姓。本刊從特別途徑得知Krstyal已由婆婆改名,落實跟阿媽姓楊,譯音卓穎(英文名為Yeung Cheuk Wing)。據思琦密友透露:「英文名係思琦改嘅,中文名係思琦媽嘅主意。當初思琦一知道係女,兩母女已經開始諗名,有幾個心水,最後思琦揀咗卓穎。其實名一早已經改好,係掙扎跟邊個姓。」思琦初時以人奶餵哺Krystal,不過生B後思琦即染上感冒,故後期即改以奶粉餵B。」思琦早前亦曾透露:「我搜羅咗好多公仔、靚衫仔、BB牀,又喺網上買奶粉、尿片。養一個小朋友真係唔簡單,雖然我唔會俾囡囡太大壓力,但都會同教師朋友update吓,讀書嘅嘢都要逐步諗。」雖然B女已順利誕下,不過思琦的婚姻大事卻變得遙遙無期,她於近期訪問中表示:「感情生活唔想講太多,總之未結婚,現階段無進一步消息。我依家每日見到BB就開心滿足喇!」不論在訪問中或是微博上,思琦都多番明示暗示會獨力撫養B女,隻字不提經手人吳帥。據知吳帥去年聖誕曾到L.A.箍煲不果,現時身處大陸,其微博戶口內一切有關感情的留言,亦已一一刪除,恍如人間蒸發。

BB出世即攞護照
楊思琦囡囡在L.A.出世,即使父母不是美國居民,BB都擁有美國國籍。而根據美國出入境條例,在美國出世的BB,如已改名,可即時領取出世紙,並可憑出世紙申請美國護照,快則可於一個月內辦妥全部手續。領取護照後,便可自由出入境。由於楊思琦是香港居民,BB留港期間可帶齊美國出世紙,到香港人民入境事務處幫BB辦理香港長期居留權申請特區護照、香港身份證,故此楊思琦囡囡擁有雙重國籍。

平價婚紗攝影

大肚秘影婚紗照
據知去年9月遠赴洛杉磯前,思琦曾秘密與吳帥影婚紗照,據知情者透露:「思琦始終係個好傳統嘅女仔,有咗未結婚已經好介懷,所以有段時間佢迫得吳帥好緊,最終佢哋傾好咗先影婚紗相,等生完B之後至簽紙結婚。」今年2月28日,本刊在一間名為TouchUp伊樂形象設計顧問公司的微博上,發現一張楊思琦穿婚紗的照片,雖然思琦曾多次穿婚紗為婚紗雜誌做model,但照片上思琦已剪短髮,明顯是去年9月離港前的髮型。照片中思琦依然明艷照人,但該件婚紗胸下位置離奇寬鬆,攝影師更刻意只影上半身,思琦背部更因逼爆婚紗而要加布。當時明顯她是因懷孕而腰部變粗,相信婚紗照於八至九月期間拍攝。本刊與該公司職員聯絡,並查問有關該照片問題時,職員異常緊張,並先後兩次問清楚本刊名稱,抄低所有問題後說要稍後回覆。半小時後職員致電記者說:「楊思琦嗰張相無乜特別㗎!我哋reference用㗎咋!點解你哋會問起呢張相㗎?(想知道係幾時影?思琦喺你哋公司影?)係呀,喺公司。(佢自用?)唔係……係幫雜誌影㗎!(係邊本雜誌?)都係婚紗雜誌嗰啲囉,真係無咩特別!(咁幾時影呢?)吓……好耐㗎喇!07、08年啩!」記者再追問為何要在幾年後先上載這張照片上微博,對方沒有回應。記者再翻查資料,確定楊思琦06至09年期間根本從未剪短過頭髮。而該形象設計公司價錢大眾化,影一輯婚紗相只需約萬三蚊,相比起其他大型婚紗店,慳妹思琦揀這間影樓跟吳帥影婚照,絕對好合情理。

李泳豪再陷愛情陷阱
思琦與吳帥連女都生埋,奈何最終還是選擇撇甩空心老倌,獨力湊大愛女,面對單親媽咪所承受的一切精神和金錢壓力。而舊愛李泳豪的感情事近日亦備受關注,忽然被指情陷三女,除了有他口中所說「正在發展中」的韓妹Jinling Huang外,還有因拍劇熟絡的黃瑩及張秀文,不過與黃瑩與張秀文的戀情都屬煲水新聞。該名韓妹本周三卻被踢爆原來已為人妻,瞞住老公Jerry四處溝仔,還化名Miki和玫瑰Kitty掩人耳目,她亦曾與洪天明拍過半年散拖。不過自從被揭為李泳豪新歡後,該韓妹近日亦大玩失蹤,連facebook和微博都刪除。

微博肉麻互溝 
李泳豪啱啱先被指有新戀情,話咁快韓籍新女即被大起底,唔止係wet妹,仲已婚。盲舂舂嘅李泳豪早前仲喺微博同新女肉麻調情,又送Hello Kitty香水冧女,至純情都係佢咯!

豪仔:唔會做第三者
就此事本刊記者向李泳豪求證,當他知道對方已婚後,反應極大話︰「我都係今日先知(結婚),之前真係唔知佢有老公,我絕對唔會做第三者。(你哋發展到咩地步?)仲未正式開始,隻馬未入閘已經彈閘,我絕對唔會做第三者,就算對方有男朋友,我都會即刻離場,佢有老公就更加唔會諗。感情嘅事搞到好煩,我真係唔敢拍拖,我想專心做好工作先。(有指你專登拍拖向思琦示威?)我唔會做呢啲嘢,況且我一直都係單身,件事曝光後我哋已經冇聯絡。我同黃瑩07年拍《同事三分親》後friend咗,張秀文就係拍《結•分@謊情式》時識,大家係同事囉,平時收工後說話都唔多句,我只係同班男仔玩。」誰是誰非都好,思琦依家有女萬事足,無論豪仔係咪有新女朋友,一心只想湊大卓穎的思琦只會專心搵錢囉!

月供十萬樓 
慳妹楊思琦獨力養女已經夠吃力,但原來每月仲要供樓。現時她手持市值逾二千萬物業,包括麗港城、泓景臺、以及清水灣半島,三個單位每月合共要供約十萬,難怪思琦妹生完即急不及待要返港復工搵錢。

遭狂插講大話 
上期本刊記者遠赴L.A.採訪楊思琦產女後,思琦即於上周四(8日)下午在微博發放母女平安的消息,大部分網友反應非常激烈,狂鬧思琦妹當日擘大眼講大話,只有少部分人力撐她是個堅強的媽媽。 ####


絕密曝光雖然思琦做過數次新娘model,但去年中懷孕後才剪短髮。而此婚紗照的髮型與9月思琦出席活動時的髮型如出一轍,相信她和吳帥影婚紗相的時期,是8月至9月期間。正因為她腹部微隆,更需設計師從後加布遮掩。


擺思琦上枱形象設計公司突然在上月28日將思琦婚照放上微博,唔知係咪為思琦產女贈興呢?


晒婚戒去年9月吳帥難得在港,被影到左手無名指已戴上婚戒,仲春風滿面㖭,奈何隨後其欠債等負面新聞不絕於耳,思琦更要避走美國生女。《壹週刊》圖片


微博訴苦自戀情爆出,吳帥的微博不斷受到抨擊。去年9月23日,思琦出走美國,他就在微博大嘆慘痛,可惜都係俾人鬧,結果微博在11月底關閉。


剛滿月的Krystal即將要坐長途機返港,認真辛苦命。


思琦和李泳豪都異口同聲咁話,Krystal的高額頭和大耳仔最似思琦。


產後現身上周四(8日)本刊率先爆思琦已秘密在洛杉磯產女,同日思琦在微博公告喜訊承認此事。


大爺上身去年9月初,有雜誌影到思琦充當司機車住大爺吳帥返清水灣半島寓所。當時兩人關係還未擘面,不過至月尾兩人關係急轉直下,女方更毅然到美國待產。


思琦和吳帥影婚照的形象設計公司位於九龍塘,樓高兩層有多個室內場景,大樓兩旁更有室外園景,影相唔使四圍走。


設計公司擁有多個化妝間,更有多位專業化妝師,可以幫思琦化身靚靚新娘。


公司職員十分醒目,發現記者見到楊思琦和化妝師合照時即快揭走,並說:「呢張唔係㗎!」


大肚照搏去年7月,當時懷孕近三個月的思琦到內地搵人仔,更被國內同胞抽水搭膊頭都仲要保持笑容,為咗囡囡,惟有頂硬上。


美國秘匿半年去年9月尾起,思琦匿喺胞兄屋企半年,與世隔絕,專心在加州安胎。


生女想喊思琦去到洛杉磯嘅五星級醫院生Krystal,雖然生產過程好辛苦,不過事後思琦都話:「見到BB嗰一刻,真係好感動,好想喊!」


阿媽玩狗雖然思琦媽要幫手湊B,不過閒時都會走出後花園,玩吓狗之餘,吸吓新鮮空氣。


樂小姐撐到底樂易玲周三(14日)向本刊說:「同思琦聯絡咗,佢依家未坐完月,冇咁快返嚟,工作要等思琦返嚟公司報咗到至同佢安排。公司唔會特別優待佢㗎,又唔係得佢一個生完BB!」《蘋果日報》圖片


單拖愁爆本周二(13日),李泳豪趁開工前到又一城內的LOG-ON行街,他無意識遊逛,行了半小時乜都冇買就返廠拍劇。


其間,李泳豪沒精打采,但他電話不離手,唔係打電話就係睇信息。


踢爆係人妻


Jinling Huang同老公Jerry嘅婚照被公開後,jinling Huang即人間蒸發,就連李泳豪都搵佢唔到!


調情對話


上周至喺微博調情調到出面嘅李泳豪和Jinling Huang,被踢爆係wet妹同有夫之婦後,即剷走微博同facebook相關資料。


有指愛子心切的李家鼎,反對李泳豪翻兜思琦,不過對於思琦產女,鼎爺亦送上祝福:「都替佢開心,始終佢都有交代,而且生咗個精靈B女,希望佢盡快回復狀態,BB身體健康。」


去年恩愛去年初思琦參與舞台劇,當時仲同李泳豪大晒恩愛,估唔到一年後思琦已經幫第二個男人生咗個女。


哭訴委屈去年6月,思琦單方面宣布分手不特止,仲要喺訪問中講李家不是,不過隨着她的大話被撕破,形象破產。



arrow
arrow

    tvblife 發表在 痞客邦 留言(0) 人氣()