吳卓羲的微博上週三（7日）凌晨驚現國產乳模張馨予的自拍床照，事後吳卓羲主動同記者交代事件只是一場誤會，更承認二人「拍過拖」，首次確認女友關係。擺明被人出賣仍要處處維護，曝露了吳卓羲與張馨予的相處，並非如外界所想般男尊女卑。據知愛自拍的張馨予，除了喜愛在男友家拍下過夜證據，以便隨時宣示主權外，更同Edison（陳冠希）一樣有鋪影相癮，與吳卓羲拍拖短短1年多，留下唔少「美好回憶」。女友有嘢揸手，吳卓羲要賣甩呢位國產「飛佛」，惟有甘心做愛奴，聽教聽話。
食女無數的32歲吳卓羲，入行11年緋聞多到數唔晒，由小花馬賽到阿姐級的佘詩曼徐子珊一一追到手，卻從未公開承認與圈中人拍拖，即使當年多次被影到與官恩娜斷正，仍死口唔認對方的女友身份。
代女求情
食完花旦唔認數，偏偏對24歲的36F國產模張馨予投晒降。二人去年合作拍攝內地電視劇《大丫鬟》撻着，張馨予不時人肉速遞來港密會男友，但機心重的張馨予「送外賣」之餘，不忘在吳卓羲屋企自拍私相放上微博高調洩密，又疑似放料畀傳媒，令二人密會斷正。上週更將行動升級，趁男友掛住出席Toby婚宴，直接用吳卓羲的微博戶口post床照，視男友私隱如無物。微博被入侵，吳卓羲無奈焗住認拍拖，但被出賣後竟然冇炮轟有人博出位，反而代女友求情，「佢入行日子好短，意識唔到呢啲嘢，唔小心做咗，佢同我講唔好意思，知自己錯，希望大家唔好迫得佢咁緊！」咁有風度，原來吳卓羲有錯在先。Toby婚宴當晚，吳聲稱直踩after party到凌晨5點，實情孖住林峯去無綫音樂總監鄧智偉私竇狂歡，但估唔到大話被前度佘詩曼踢爆。
慘過坐監
前Cookies成員、現時在港台做DJ的區文詩（圖），上週在節目大爆吳卓羲受張馨予嚴密監控，「佢哋兩個溝通方法好特別，佢哋唔單只有晒對方微博、facebook同email嘅password，仲有個特別嘅rule，例如張馨予喺外地做緊嘢佢會WhatsApp阿Ron，『你喺邊呀？』。如果阿Ron同朋友食緊壽司，佢就要即刻影低嚿壽司send畀張馨予睇，又或者show個location畀對方知。」
前度博入行
疑似成為張馨予床照對手的國產男陳錫，與張馨予是大學同學，二人分手後，陳錫在江蘇無錫的夜場做歌手，在當地酒吧界略有知名度，更自稱是「娛樂圈人士」。經常喺微博擺自己潮look的陳錫，想入行不妨請教吓攻心計前度！
隨時爆大鑊
多次被張馨予擺上枱仍未狠撇對方，據知全因女方有嘢揸手，令吳卓羲唔敢輕舉妄動。「個女仔（張馨予）擺明博出位，阿Ron（吳）自己都知㗎，我哋成班friend初時都唔知點解硬係唔肯撇佢，後來有次出去飲嘢，阿Ron幾杯到肚後先同我哋講，佢話驚個女仔亂嚟，會好似潘霜霜咁爆大鑊，先忍佢咁耐咋！」吳卓羲身邊人透露。
「影相唔擔心！」
男友有把柄喺自己手，張馨予定過抬油，但為免遭吳卓羲的粉絲狂插，惟有扮死狗道歉。「我很謝謝他，在這段時間還為我講這麼多，他是最大受害者，但還這樣包容我。這次真是我不小心登錯微博，我是最大的罪人，我真的沒意博宣傳和宣示主權！」但懺悔一輪後，張馨予又繼續晒命，「我也有他的MSN密碼，主要想對方更加安心。」分分鐘步好兄弟林峯後塵，吳卓羲週一（12日）表示唔怕有淫照流出，「唔驚，因為冇！普通影相我絕對唔擔心！（佢同前度啲床照家仲喺網上瘋傳喎？）呢啲登過晒，我一早知啦！其他唔答喇！」有個鍾意自拍嘅女友，吳卓羲今次食錯嘢喇！
同女唔同命
鍾情長頭髮、有身材女仔的吳卓羲，對待前度官恩娜同現任張馨予完全兩種態度，一個死口唔畀名分；另一個就錫到燶爭住公開，唔通港女真係唔值錢？
栢芝師妹宣傳易
國產女為上位一向不擇手段，張馨予9月同吳卓羲喺北京斷正，隔幾日就有消息指佢會加盟張栢芝的公司；咁啱今次潛行微博事件又撞正來港拍賀歲片，夾都冇咁準，話冇放料都好難喎！ ####
擁有36F魔鬼上圍的張馨予有樣有身材，博出位手段亦屬專業級數，吳卓羲真係好難走得甩！
出事微博吳卓羲的微博驚現張馨予自拍床照，以為兩人決定公開戀情，但原來連吳卓羲都唔知情，事發幾個鐘更將呢條微博鏟走。
我哋係拍過拖，畀啲空間我哋！真實對白 8/12 認拍拖潛行微博事件後，吳卓羲罕有主動同記者解話，代女友求情嘅佢，仲叫傳媒畀空間佢哋發展。
12/12 繼續幫口吳卓羲週一回應張馨予床照時，除堅稱自己冇影過，更幫最近有床照再流出嘅女友拆彈解圍：「我唔識佢以前嗰個（男友），呢啲相舊聞嚟啦！」
區文詩再爆：當事人講先知！大爆愛奴吳卓羲秘密，區文詩堅稱消息來源非常可靠，「我唔識佢兩個，但我作為傳媒人都係報道事實，其實呢啲嘢都要當事人講出嚟先有人知 ！」
掛住玩吳卓羲參加Toby婚宴當晚，同場有緋聞女友佘詩曼做姊妹，又難怪張馨予擔心到要入侵微博引男友關注。
報行蹤即使做正經嘢，吳卓羲都會拍低工作環境，證明自己冇出去夜蒲。
管三餐除咗做嘢要報告，連食乜都要管。呢日吳卓羲同朋友食日本嘢，都影低畀女友睇。
張馨予同陳錫的床照意識大膽，雖然輯相疑似由女方揸機，但出名後的張馨予聲稱被前度利用博出位！
國產味十足的陳錫成日喺微博晒肌。
張馨予本週三將來港拍賀歲片《喜上加囍》，吳卓羲已率先自爆女友唔會蝸居佢屋企，出口術引開狗仔隊。《蘋果日報》圖片
Benz跑接送今年6月張馨予來港，吳卓羲親自揸過百萬Benz跑去機場接機，更落手落腳搬行李，唔敢勞煩女友。《蘋果日報》圖片
送暖到北京拍劇拍唔停，吳卓羲今年9月專程飛北京陪女友撐枱腳，去到咁遠都斷正，但唱K選擇繼續相信女友冇放料。《蘋果日報》圖片
12/12唔肯回應前度同國產模拍拖，官恩娜週一出席活動時堅持唔回應：「唔關我嘅事唔答，人哋嘅事我唔方便講！」唔踩多腳算有品。
自己返歸 06年有雜誌影到官恩娜一早由吳卓羲的寓所離開，當時Ella衣衫不整又拎住一袋二袋，但唱K都唔肯做司機車佢返屋企。《忽然1周》圖片
張馨予同栢芝拍《河東獅吼2》成為好姊妹，現時更成為栢芝旗下首位藝人。
張馨予月頭來港出席活動，佢話呢個係佢第一個香港商業活動，希望「多來賺點錢」，想賺港紙，難怪要借唱K宣傳啦！
留言列表
