扮嘢星二代湯洛雯
甩嘴都贏，呵呵呵！（設計對白）
比起黃心穎，湯洛雯只係獨唱林憶蓮名曲〈至少還有你〉就簡單得多，唱到中段仲甩嘴，佢亦笑騎騎勁尷尬，但咁都贏喎！有無後台，你話呢？
媽咪姐
港姐水平創「新高」 黃心穎湯洛雯長隆惡鬥
早前，因阿叻陳百祥一句：「今屆港姐水平高！」搞到與狂踩港姐嘅多年老死王晶，連日來開火互轟。嗱，媽咪姐唔熟 TVB新老細「殼王」陳國強，但就係「首席非官方資深港姐評判」，等我講番句公道說話啦！睇咗兩個月嘞，可以講嘅係——啲是非好睇啲囉！
最近媽咪姐又收到風，話自從入圍以來，湯鎮業姪女（湯鎮宗女兒）湯洛雯，同碩士港姐黃心穎向來有心病。黃一直覺得湯係靠關係，而自己係靠實力。所以佢成日恃住自己人緣好，加上湯小姐唔得人心呢一點，不時拉攏其他佳麗杯葛對方。上個月，大隊去倫敦拍外景，黃心穎已率先喺背後爆湯洛雯喺酒店房亂扔胸圍，然後唆擺李渼琦同尤蔭蔭出面篤佢。噢，兩個傻豬俾人擺咗上枱嘞！
有佳麗仲同媽咪姐爆料，話早排呢 pair仇家喺排舞室練習嗰陣，因為大動作撞到對方而嘈起上嚟。黃心穎仲誇下海口撩湯洛雯輸賭，話睇吓邊個會贏到「旅遊大使」個獎咁喎！周日、周一（ 8、 9日），一班港姐就現身長隆拍外景兼進行「旅遊大使」選舉。之前自信心滿到瀉嘅黃心穎，以強項中國舞參賽，諗住贏硬。佢將條腰拗成 7字咁勁，但最後都輸俾有後台，兼甩嘴唱〈至少還有你〉嘅勁敵湯洛雯。世事嘅奇妙，真係唔到你唔服㗎！
賽後媽咪姐分別同呢兩位當事人傾過，慘輸嘅黃心穎語帶雙關話：「我已經盡咗力，咁都輸都冇辦法，評判俾佢贏咪恭喜佢囉！」而大贏家湯洛雯就笑到合唔埋嘴咁話：「今日有啲甩嘴，但估唔到咁都贏。（黃心穎個 7字腰做得好勁都輸俾你喎！係咪內定你贏？）係咩？我冇睇佢表演喎！」嘩！真係字字珠璣，嗒落有骨。所以話，媽咪姐無點你嘅，是非幾時都好睇過正本戲！
幕後是非精黃心穎
黃心穎話跳咗 4年中國舞，出動渾身解數務求奪得「旅遊大使」獎，二話不說就拗出 7字腰，嘆為觀止。
拗晒腰都輸，睇嚟要再出動「金手指」！（設計對白）
有 friend撐
黃心穎雖然做唔到「旅遊大使」，但佢人緣甚佳，到長隆水上樂園拍外景，張鈞美非常樂意幫佢揸機，而黃小姐亦戮力表現，其彈跳力驚人，如果輸咗港姐都可以考慮加入馬戲團。 
上屆旅遊大使梁麗翹宣布得獎者時，湯洛雯（右二）笑到見牙唔見眼，而失獎嘅黃心穎（右一）好冷靜呀，係笑得牽強啲啫。
喺酒店大堂等旅遊巴離開時，班佳麗圍晒圈傾偈好開心，但縮喺卞曉帆後嘅湯洛雯，永遠都只得一個人。佢仲同媽咪姐解釋：「唔係呀，我同佢哋 friend咗好多㗎喇！」咦，你習慣神交㗎。
微博晒命
湯洛雯爆冷得獎，而頒獎俾佢嘅上屆得主梁麗翹，仲有當晚大會司儀陳庭欣，三位原來係同一間 model公司嘅，老友鬼鬼。梁麗翹仲即晚 post相上微博，湯亦立刻留言晒命。
女，有阿爸撐，無得輸呀！（設計對白）
大熱跌晒 watt
選美呢家嘢，真係路遙知魅力，日久見人心。好似最初被捧為大熱嘅「人微妍希」陳潔玲，愈嚟愈殘；以最高分數入圍海外佳麗嘅曾明俐，被揭爛蒲爛玩，仲係「見光死」一族呀！
女神幻滅
本來張堅庭外甥女張名雅（左）同「人微妍希」陳潔玲（右）同屬大熱，但喺晚會都表現失準。張表演肚皮舞時，肚腩過大，而「女神」塊面凹晒，又現晒紋，唔掂喎！
嚇鬼蒲妹
大隊原本朝早 10點半出發去水上樂園，但曾明俐（右）同岑杏賢（左）唔知係咪蒲精上身，搞到遲起身，樣都唔執吓就落餐廳食早餐。 Oh, no！素顏殘成咁，同化妝後爭得遠，咁都叫大熱！
明明已經遲到，曾明俐（左）同岑杏賢施施然食完早餐，仲掛住同酒店花園嘅紅鶴影相，全村人等你哋呀！你當咗旅行呀？
留言列表
