博出位
黑超兵團
呢個星期陽光勁猛烈，皆因啱啱過完小暑，大暑又就嚟殺到，真係曬到阿媽都唔認得。最鍾意戴超嘅藝人一於唔執輸，拎副黑超出嚟擋陽光，扮有型之餘又可上載靚相上微博。
咁多副靚超之中，最與眾不同係 Sammi嘅陶瓷黑超鏡框，人手製作獨一無二，包唔會同人撞超。不過男友許志安嘅烏蠅超就比較大路喎！
鄭秀文潮爆鏡框
潮流達人 Sammi擺咩上身都特別潮，今次呢副用陶瓷製嘅鏡框， Sammi貪佢係 handmade製作，全世界得一副夠矜貴。不過咁大嚿陶瓷擺上塊面度咁浮誇，相信得佢先戴得好睇。
浮誇黑超唔止得一副， Sammi仲有另一副充滿夢幻嘅黑超，一樣咁搶！ 
許志安 chok到爆
可能同 Sammi就快好事近，安仔近日都積極返大陸登台搵真銀。今次到武漢會歌迷，搭車途中都不忘戴超晒 chok樣益歌迷。
謝婷婷安志杰晒恩愛
打風都打唔甩嘅謝婷婷同安志杰，不時上載溫馨合照到微博，今次兩個坐遊艇出海，戴住靚超對住無敵海景晒恩愛，連徐濠縈都留言笑婷婷係小鳥依人。
趙薇晒幸福
喺大陸紅爆嘅趙薇難得有假期，同阿媽齊齊戴超享受陽光，玩自拍擺出無聊甫士，兩母女都好貪玩喎。
林夏薇晒靚膊
林夏薇一邊揸車一邊自拍都幾危險，不過佢着住 tube top嚟襯方形巨超，感覺好夏日，晒吓靚靚膊頭，仲可以 sell青春活力。
全站熱搜
留言列表
