因為二月當黃偉文作品展演唱會嘉賓時反應熱烈，停了五、六年的Shine，就這樣再次重組開騷兼推出新碟。初出道時還是個十多歲o靚仔的徐天佑和黃又南，跳跳脫脫、嬉皮笑臉，一晃眼來到了今天，估不到已是個廿八、九歲的沉實青年。

入行以來的十年青春光景，由試音、被送往日本求學半年、推出首張專輯、獲取新人獎，到後來停滯不前需要分開發展，五味雜陳，天佑坦言，曾經迷惘過。「Shine嗰段時期，我曾經有諗過唔做呢行，但我又唔知點可以唔做。嗰陣好迷惘，見身邊啲朋友個個做金融、做基金，實實在在有份工，當佢哋問我：『呢排見唔到你嘅？做緊乜呀？』我就更加lost！」

至於又南，則因為要承擔父親那六、七百萬債務，曾經要搏命搵錢、搵錢和搵錢。「嗰陣我淨係知道我要錢，幾唔開心都要堅持做落去，冇得諗辛唔辛苦。」

一切事過境遷，重組的Shine，經過成長的歷煉，已學懂了更珍惜當下。

「我哋依家會好好做好呢個演唱會，咁先有可能會有part 2！」他們異口同聲說。

是的，青春畢竟沒可能無盡期。

 

天真歲月

雖然徐天佑和黃又南當年同樣由陳果發掘，但兩人初次見面，卻是在試音時。「嗰日十幾廿個人喺卡拉OK等試音，我好記得天佑當時仲着住校服，同我坐得好埋，點知佢突然走埋嚟問我有冇紙巾！咁啱我又有，我哋就咁樣撻着咗囉！從男仔角度睇，當時我第一眼見佢，都覺得佢靚仔o架！」又南說。天佑在旁補充：「其實我嗰陣個年紀，唔係好識尷尬，見到人合眼緣，覺得佢好nice喎，咪傾偈囉！後生仔嘛！」

接着，兩人被經理人撮合成Shine，更被送往日本學日文、結他。「嗰段日子其實好難忘，得我哋兩個十五、六歲嘅o靚仔喺嗰邊相依為命，為咗慳錢，日日都去松屋食牛肉飯，二百八十円，好大碗！」天佑說罷，又南即搶着說：「仲有我哋學日文嗰班同學，乜人都有，韓國、大陸、台灣，甚至巴基斯坦都有，嗰陣我哋仲有食煙，一放break傾偈，幾國語言都出晒嚟，blablabla，好好笑o架！」「最估唔到我哋走嘅時候，佢哋會同我哋farewell，個老師玩得仲癲過我哋！哈哈！」「其實幾感觸o架，我哋走嘅時候，啲同學真係好唔捨得我哋o架。」

將於八月三日至五日在九展舉行演唱會，Shine多次強調會盡力做到最好。

今年二月為黃偉文再度站台，久未露面的他們即獲得熱烈反應。

○二年，兩人懷着一股熱誠加入樂壇，推出首張專輯《電影男孩》。天佑不諱言，那段日子是入行以來最開心的。「嗰陣我哋仲好細個，個人好天真、好單純，簽約嗰陣，我自己係好有理想，好有目標，做音樂時乜嘢都會同監製傾，好清楚做緊啲乜嘢。到出碟之後，我哋啱啱接觸呢行，所有嘢都好新鮮，每日做訪問，都好似玩咁，唔需要承擔任何責任o架！」

「最初去頒獎禮都開心o架！可以攞晒啲金獎喎！」又南說。「尤其係當攞到獎之後，我望到一班工作人員，真係喊晒、好感動o架！因為我哋攞到獎，都代表咗佢哋嘅辛苦，係有人認同嘛！」

十年前初出道，便橫掃多個金獎，聲勢直逼當年的Twins。

現實舞台

可惜，○四年因為唱片公司大執位，兩人隨即被調往發展台灣市場，本來不錯的聲勢亦因而每況愈下；加上娛樂報道只愛着重花邊新聞，令兩人變得更心灰意冷。「真係沮喪o架！當十單訪問有九單都係問你有冇拍拖，影到你同邊個邊個一齊喎，你就會發覺，原來你做音樂背後嘅意義，係冇人會理o架！嗰陣我哋都好迷惘，唔知跟住落去個方向應該係點。我有諗過唔做呢行o架！不過唔知點樣唔做，其實我都可以去做基金o架，但我唔係想返嗰啲工囉。」天佑說。

拖拖拉拉，直至○六年，他們最終決定要停下來沉澱一下。又南解釋：「當時大家真係冇乜火花，真係唔知要點樣行落去，咁不如大家分開試吓做其他嘢先啦！跟住就停咗，都冇特別同出面宣布。」

今年二月，他們得到黃偉文邀請再以Shine的名義站上紅館舞台，結果除了得到現場熱烈掌聲外，就連他們演出的片段，在YouTube也有三十多萬的點擊率。「我哋當時其實好緊張o架！咁耐冇上台唱歌，本來生活又已經低調咗，都冇諗過會有咁大嘅反應，所以能夠咁樣開到演唱會，我哋會盡力做好佢，希望可以開part 2啦！」兩人異口同聲說。

關於又南

黃又南，原名黃德謙，出身富裕家庭，對上還有一個家姐。「我入行前，屋企算係中上，我爹哋嗰陣開印刷舖，專幫渣打印catalog，可以話係長期飯票。所以我細個時，唔憂食，生活得好好。」

直至○三年，因為沙士，黃家即遇上巨變。「沙士之後好多人走咗佬，我爸爸收到嘅都係空頭支票，嗰度成六、七百萬，我爸爸就係咁要宣布破產。我由○四年尾開始，就幫爸爸還呢啲債。

「當時係好唔開心，好辛苦o架！但我只係知道自己要搵錢還，根本冇時間放假去消化呢件事。我將入行以嚟賺嘅錢都攞晒出嚟，又去啲好高息嘅財務公司度借錢。試過有好幾次，臨上台唱歌前，就收到電話係咁鬧提我還錢，畀人鬧完，我仲要即刻上台唱歌，笑晒口，真係好無奈！」

所有債務結果於○九年九月清還，又南說，回想起來也不是沒有得着的。「呢件事之後，我發覺自己真係硬淨咗，尤其喺我成長上同思想上都多咗好多嘢！」奈何這樣日捱夜捱後，換來的，還有本已患上哮喘的體質弱上加弱，如去年底，他出席北京一個電影宣傳活動時，便曾經當場暈倒，需送入休息室吊點滴。

「其實我已經比以前強壯咗好多，因為我有學詠春。」他說。

又南（左）初出道時，跟周迅合演陳果執導的《香港有個荷里活》。

當作家一直是天佑的志願，○六年沒有Shine後，他便致力寫作，更推出了懸疑小說系列。

關於天佑

徐天佑，原名徐文健，家中么仔，對上還有比他年長七、八歲的哥哥和家姐。「我細個時屋企好窮，一家幾口，住一個好細嘅地方。阿爸做玉器工人，我細個時得佢一個出去搵錢養起頭家，好彩我家姐好叻，佢喺機場控制塔做過，公司仲派佢去德國考直升機牌，佢依家又做律師！好犀利！」

還以為他應該是家中萬千寵愛，但查實天佑卻擁有一個很孤獨的童年。「我五、六歲左右，屋企人個個都已經要出去搵食，日頭屋企得我一個，成日一個人落街過馬路去大快活買嘢食，嗰度啲人已經認得晒我，個收銀員每次都要趴半個身出嚟問我食乜。不過我都算自律，最多只係去公園玩吓，都唔會周街蒲。

「其實入行之後，喺我最迷惘嗰陣，都曾經嫌阿爸煩，發過佢脾氣，我每次諗番起呢件事，都好唔開心，覺得自己好唔啱，好想呢件事喺我歷史度抹咗佢。」

○六年暫停Shine後，天佑既繼續拍電影、短片等，同時也開始寫書。「寫作雖然搵唔到食，但算係我細個時嘅一個情意結，而且，我發覺喺文字裏面，我可以搵番我自己，所以，無論幾忙，我都會keep住寫落去！」

小時候的天佑，年紀輕輕已開始過獨立生活。「如果係依家，我父母已經犯咗法！哈哈哈！」

又南小時候，家庭環境富裕，生活無憂。

金城武與郭富城

把組合命名為Shine之前，原來他們曾考慮過叫Automatic。「因為佢（天佑）嗰陣喺日本，好鍾意宇多田光，佢有首歌叫〈Automatic〉嘛。」又南解釋。「改Shine呢個名，一來正面，二來易讀啲，起碼好過Automatic呀！」天佑笑着補充。

查實，雖然Shine至今已組成十年，但仍有很多人經常把他們的名字天佑和又南搞亂。「係o架！我依家有時喺街畀人認得我，都只係會話：『Shine呀！Shine呀！』唔敢叫我個名，驚搞錯o架！」又南說。

 

 

所以，當年我和我的朋友會這樣分別兩人：眼大大、貌似郭富城的那個叫徐天佑，眼細細、有酒粒有啲似金城武那個，叫黃又南。

又南笑着說：「以前我哋聽到話似郭富城同金城武，都會幾大反應：『吓？佢似我多啲！我邊度似佢呀？』」天佑又謂：「係呀！我會話：『唔係呀？我似我自己！』其實當時唔係抗拒，只係想做番自己囉！不過依家我哋大個咗，梗係唔介意似佢哋啦！如果唔似，我都唔會拍到《父子》（飾演郭富城長大後的兒子）啦！」「其實有佢哋咁成功都係好事呀！同埋人哋畀唔畀你似佢先？係咪？哈哈！」

簡單來說，總之「似郭富城和金城武」這個方法來記他們的名字，一定冇搞錯！