探熱針
拒用欣宜 唔講大話 農夫企硬個唱玩完
原定本月十一日舉行的農夫個唱突然取消，除了因為票房滯銷，籌備期間，農夫同公司至老闆何哲圖（ Herman）有分歧，亦是個唱胎死腹中原因。
據了解，星煥為求有下台階，曾勸陸永謊稱喉嚨生繭，聲帶出事；農夫堅決反對講大話，並勁唔妥星煥。
個唱爛尾，未有打擊農夫信心，打算重新籌備，擇日再開演唱會。
農夫堅持搵艾粒做嘉賓，都不肯起用欣宜，令唱片公司大有微言。
各不相讓
臨開騷前個多星期，農夫突然接獲公司星煥唱片老闆何哲圖通知，取消下週六（十一日）在九龍灣展貿舉行的個唱。
「 Herman同佢哋講啲飛去得唔好要取消，仲叫陸永出嚟認自己聲帶生繭，但農夫唔肯，寧願講真話唔想呃人！」知情人說。
據知，個唱籌備期間，農夫跟公司早已為製作問題鬧意見。「 Herman叫佢哋唱 MMO（預錄伴奏），又想佢哋同欣宜 featuring；農夫全部唔肯就範，堅持要用樂隊同搵艾粒做嘉賓，但星煥覺得搵自己友做嘉賓合情合理，農夫堅持創作自主，嘉賓要配合主題。」
雙方各持己見，宣傳準備時間又不足，個唱滯銷，意料之內。個多星期前，陸永和 C君見勢色唔對，自動自覺諗橋谷飛，連搵服裝贊助都自己搞掂，當時 C君亦忍不住在 Fb呻公司無 backup，成個演唱會幾乎自我營運。
老婆余詠珊在無綫掌控綜藝科，何哲圖要宣傳公司歌手話咁易，但早前有指英皇不忿余詠珊偏幫星煥人，曾向無綫大老闆陳國強投訴，余詠珊為避嫌，大減農夫曝光率，令個唱宣傳雪上加霜。
星煥老闆何哲圖（後排左三）近年發展係威係勢，加上老婆係無綫高層，簡直如虎添翼。
前年農夫開個唱大收旺場，今年開個唱卻撞大板，之前 C君還在 Facebook大呻冇 backup，結果最後個唱爛尾。
寸農夫冇智慧
對於降旨要用欣宜做嘉賓，農夫經理人 DJ Tommy回應說：「我 哋反對，唔係因為唔鍾意欣宜，其實農夫好歡喜欣宜把聲，仲會度首歌一齊合作，但唔係呢個演唱會。依家諗住自己搞番個演唱會，只係時間未定。」
至於星煥何哲圖則另有說法：「我 哋冇逼農夫用欣宜，反而提議用胡鴻均，希望佢 哋幫吓 啲新人。取消演唱會係因為賣飛情況唔好，勉強開會對歌手都唔好；歌手同公司合作需要有智慧，做唱片亦一定由市場主導，好多歌手只講創作，唔肯迎合市場需要，咁樣音樂行業會好唔健康。至於提議陸永話自己聲帶生繭，係希望佢 哋好落台，佢 哋唔領情都冇法。」
星煥新人組合 Super Girl本來亦有份在演唱會內做嘉賓。
農夫跟鄭裕玲因合作主持節目成為好友，兩子本來已開口請嘟姐撐場。
留言列表
