媽咪姐
千嬅醒咗
就嚟結婚三周年嘅楊千嬅，周一（ 30日）趁老公丁子高 33歲牛一，特登約咗成班 friend去黃竹坑食私房菜，連丁太嘅歌迷都自製蛋糕同丁生慶祝，認真愛屋及烏！玩到凌晨 12點左右，成班 friend先陪主角落樓，即刻俾記者圍攻。略帶醉意嘅丁子高不慌不忙拖實老婆，千嬅亦小鳥依人咁跟喺老公身後，仲笑晒指住自己啲腳趾話：「補番啦！」回應之前話佢甩甲油嘅報道，果然係精叻媽媽！
媽咪姐問丁生有無收到老婆嘅禮物？佢即刻冧爆，笑住口話好多謝太太送咗個仔俾佢，係最好嘅禮物喎。當晚千嬅喺微博話， 12點嗰陣係同老公喺電梯口攬住講 Happy Birthday㗎！媽咪姐提提大家，佢哋兩個甜到咁，有糖尿病嘅朋友最好都係迴避吓嘞！
千嬅講過，同丁生一齊之後，由烈女變到小女人。呢晚佢入匿埋老公後面，出又拖實老公，確係幾「小鳥」！但不忘手指指回應報道，真性情未變喎。
人前晒完恩愛，丁生喺網上再騷千嬅送俾佢嘅生日蛋糕同神秘禮物。丁太叫老公做「 bb」，噢！起雞皮呀。
全站熱搜
留言列表
