小特搜
男車搜
車除咗可以代步之外，仲可以從款式及內櫳裝飾睇出車主嘅性格。梁烈唯揸嘅福士 GTI棍波車，斯文中帶跑味，「斬尾車」易操控又夠靈活。媽咪姐再打開車門一睇，嘩！有公仔又有枕頭， feel到架車有女主人喎！
唯唯福士 GTI
易手車價： 16萬（ 10年買入）
出廠年份： 2006年
引擎： 1,984c.c.馬力： 200匹
灰黑色車櫳襟污糟，但係唯唯成塊餅放喺 seat位度隨時惹蟻，整污糟張 racing櫈就唔好啦，三千幾蚊一張㗎喎！
「呢個高達公仔喺油站換，原本有個香薰喺裏面，不過用晒就當係裝飾。」
愛心枕頭
唯唯特意要求記者影佢呢個枕頭，「我平時喺車度休息靠晒佢，枕住佢我瞓得好舒服。」唔使講又係女友送啦！
女友跟車
記者問唯唯個公仔係咪女友 Tina（右圖）送，佢即答：「呢個公仔直頭係 Tina，每次有女仔上我車，我都會介紹『 Tina』俾佢哋認識，少好多麻煩呀！」
唯唯話工作少不免會遇到一啲唔開心嘅事情，每次佢都會打開女友親手製造送俾佢嘅「鼓勵字」。
車內櫃桶放咗本簿仔，唯唯會將自己演嘅角色資料詳細寫喺入面，方便隨時拎出嚟溫習。
一車衫帽
唯唯：「件衫係私伙戲服，上次拍完嗰場戲未拎返屋企。」
唯唯：「我以前超鍾意戴帽，車尾點都放十頂八頂隨時替換，不過依家呢個短髮 look好少戴帽，啲帽當係裝飾品。」
心得
揸棍波車比較安全，一鬆油門架車自然會拖慢，遇到有緊急事故要煞掣又可以拖波，自動波就做唔到！
Bob日產 Fairlady Z
易手車價： 13萬（今年 4月買入）
出廠年份： 2003年
引擎： 3,498c.c.馬力： 280匹
阿 Bob架粉紅色日產 Fairlady超搶眼，兩座位「趕絕外母型」跑車已經夠型，車牌仲用自己個名「 XBOBX」，使唔使咁誇呀？
阿 Bob話三年前喺運輸署以七千元投得呢個車牌，「唔算多人爭，所以唔係好貴，如果『 BOBBY』我諗貴啲！」
自家貼水晶
Bob好滿意上手車主嘅裝飾，自己只略略喺倒後鏡同軚盤套黐上水晶點綴，即時貴氣不少。
Bob話上手車主都係愛車之人，「 19吋呔鈴配 45薄呔，入彎穩定，加埋日本牌子嘅硬避震，感覺好實淨。」
Bob：「跑車車尾箱放得好少嘢，不過我仲有架七人家庭車，用嚟車屋企人㗎。」
心得
我揀車最着重外形，要有型有款嘅，性能反而係次要。不過我亦要求行車時車櫳要好寧靜，一啲雜聲都唔可以有。我鍾意揸自動波車，因為我懶唔想轉波。 
留言列表
