亞熱帶
李敏鎬 專恰靚女
男人不壞，女人不愛。好似南韓靚仔李敏鎬（或譯李民浩），由開始走紅的韓劇《流星花園》到最近的《信義》，飾演的角色獨沽一味專恰靚女主角。覺得佢衰？偏偏女主角個個任糟質唔嬲仲死心塌地，連女 fans都撐佢恰得有理。就算剛於上周播放的《信義》成績平平，觀眾都只係批評復出的金喜善中女扮 cute。靚仔唔通真係大晒？
戲中李敏鎬攞正牌欺負女主角，戲外亦將女主角玩謝。拍《城市獵人》，他搭上嫩口女主角朴敏英，玩咗半年唔夠就即棄，仲高調宣布分手。就算對住復出拍劇的天后級人馬金喜善，李敏鎬都忍唔住暗寸呢位拍檔老：「佢大我十年，又早我十五年出道，都仲可以咁靚，簡直有令人怦然心動 嘅感覺啦！」明褒暗貶，擺明嫌人哋年紀大啫！
虐愛杉菜
李敏鎬在《流星花園》飾演韓版道明寺，將同校新生具惠善（韓版杉菜）玩到殘，不過玩玩吓，李敏鎬居然愛上 咗呢位小師妹。
鬥爭的士
在《扮基追女仔》中，李敏鎬先與孫藝珍爭的士，又不小心碰到孫藝珍 pat pat。兩人後來同住一屋，李敏鎬又令珍妹誤會他是同性戀，對他不設防。
復仇拒愛
《城市獵人》的朴敏英奉命教李敏鎬柔道，兩人擦出愛火，但李敏鎬為了報仇而拒愛，平日更刻意對女方寸寸貢，若即若離，傷透女人心。
拒用替身
寸得起，係因為上位快。但上位快，唔代表一帆風順。 20歲時，李敏鎬因一次嚴重車禍而要停工一年，之後首次 孭飛的韓劇《奔跑吧！鯖魚》，因收視唔掂而遭腰斬，嚇到廣告商抽起他的廣告。 09年拍《流星花園》成功上位，表面風光，但事實《流星花園》當時已是李敏鎬的最後機會。
上位機會得來不易，李敏鎬亦只有好好把握。他從不濫拍，近五年維持一年一套劇。李敏鎬拍劇有 heart，為了劇集學乜都得，在《流星花園》他就苦練鋼琴、高爾夫球及劍道；在《信義》拍騎馬及潛水戲，他都親身上陣，連原本導演為他預備定的替身，都可以慳番。
不過，拍《信義》都有件事難倒李敏鎬。「呢次係我第一次拍古裝，為 咗演好角色，我一直練騎馬同古代禮法。不過最難 嘅，就係講古語 嘞！雖然喜善姐有時好怕醜，但佢其實好識搞氣氛，令拍攝現場好愉快，我至冇咁緊張咋！」李敏鎬說。
去年李敏鎬同朴敏英打得火熱，兩人被發現在首爾一間餐廳密會，被偷拍到前後腳離開。
越空擄人
李敏鎬在《信義》飾演一名古代將軍，他為救公主而穿越時空，強迫金喜善飾演的醫生回到古代救公主。不過《信義》出師不利，首集收視只有 9.4﹪。 35歲的金喜善除了被指太老，襯不起李敏鎬，第一集她在回憶中扮嬌俏學生妹，更被指極為趕客。
金喜善飾演外科醫生，要回到古代救高麗王妃。不過由於被指似另一套改編日本漫畫嘅韓劇《仁醫》，《信義》加重李敏鎬的武士戲份，減少講醫生的情節。
回憶中，金喜善向客串飾演她前度的安在旭撒嬌。善姐已經 35歲，扮妹嘟嘴扮可愛真係好勉強。
李敏鎬卒之搵到金喜善，仲打算強行將佢由時空隧道「天穴」帶回古代。古代武士李敏鎬現身現代商店搶人，十分搞笑。
微博 冧 fans
韓星不少都開微博，用翻譯器或找專人將韓文譯成中文，以便 冧 fans同幫劇集做宣傳。為了《信義》，李敏鎬同金喜善都不時更新微博，自爆幕後花絮。
古今對照
撩粉絲玩
環保手帕
善姐拍馬屁
留言列表
