23歲 DaDa有樣有身材,加上肯博肯露,出道兩年倒模 Chrissie模式,轉戰影圈洗底。

封面

撇奀星攀富二代  DaDa炸錯空心闊少

2012年08月29日 ~~ 第275期 Face

《低俗喜劇》勁收過 2千萬,除了導演彭浩翔同主角杜汶澤威盡,連女一「爆炸糖」 DaDa(陳靜)亦令觀眾改觀,片約輪住送上門,有機會轉型離開脫模行列。升呢在望,據知與三打七奀星男友王宗堯分手後一直藕斷絲連的 23歲 DaDa,早前改向 38歲印尼餐廳太子爺蔣翹帆埋手,更已秘密拍拖 2個月。上週二晚( 21日),本刊發現兩人拍拖睇戲,蔣更親自送 DaDa返回荔枝角寓所。以為釣到金龜,但蔣翹帆原來表面富貴,實則冇樓冇鋪揸手,仲犯過官非守行為。
爆炸糖炸着個空心闊少, DaDa都係留番包糖炸過第二個罷啦!

由百果園廣告彈起的 DaDa,兩年前由純轉型靠剝搵食,無論出寫真定出活動,必定低胸狂騷事業線,成功儲到一班宅男粉絲。賣肉賣唔長,好在 DaDa憑《低俗喜劇》中演天真善良的「爆炸糖」一角洗底成功,年尾更有兩套戲開拍,分分鐘可以步 Chrissie後塵做電影界搶手新人。


21/8
上週二 DaDa與蔣翹帆睇完戲後,孖住行去停車場攞車走人,蔣不時回頭冧望女友,明顯仍處於熱戀期。


DaDa做完活動即趕去戲院會合男友,兩人前後腳入場,十分有默契。不過又係睇《低俗》(右圖),悶啲喎!


大少車 DaDa返到泓景臺樓下,更要睇住女友入埋大堂先肯走,夠晒細心。





管接管送


DaDa在《低俗》入面要含住爆炸糖幫杜汶澤口交,直接令爆炸糖同戲中另一特色食品「牛歡喜」成為近期 hit爆食物。

事業得意, DaDa的愛情亦同樣得意。曾與《喜愛夜蒲》奀星王宗堯拍拖的 DaDa,雖在去年分手,其後又與上市公司主席傳過緋聞,但據知她與王宗堯仍有繼續來往,期間亦和前無綫超奀星李雨陽「 flirt來 flirt去」,疑似踏幾船,直至約 2個月前,才劃清界線不再和王、李玩曖昧。上週二, DaDa與邵音音在旺角街頭派糖宣傳《低俗喜劇》,活動後, DaDa即乘坐保母車到附近的 GH旺角戲院,落車後一支箭衝向電梯,然後會合一名四眼男入場睇戲,當時只有《低》片預備開場,估計 DaDa應該是捧自己場。
晚上 11點幾散場後,四眼男與 DaDa到停車場攞車離開,直接駛往 DaDa荔枝角泓景臺寓所,不過四眼男相當規矩冇陪上樓,只在樓下等女神安全到埗先開車回北角寶馬山道寓所。

執剩一鋪


原本喺銅鑼灣、旺角、尖沙咀同沙田都有分店,但去年因租金狂加 3倍而被迫結業,轉在中環 L Place開新店。蔣的父母早於 68年開設印尼餐廳,但多年來都冇任何自置鋪位,最後更因租金問題被迫結業。




《蘋果日報》圖片



冇樓揸手


蔣現時與兩名孖生細佬以 5萬 2租住北角寶馬山道豐林閣,(湯盈盈、黃浩然曾居同一大廈)手頭上並無物業。





曾涉偷車


《蘋果日報》圖片

蔣翹帆與吳天瑜(左)去年曾涉嫌偷車,事後雖獲控方撤銷控罪,但仍須守行為 1年。

花弗三兄弟


《蘋果日報》圖片

蔣氏三兄弟都有幫手打理餐廳,間中在無綫收費為食台教煮餸。大哥蔣翹帆(左)同有線前主播吳天瑜傳緋聞;細孖蔣翹丞(中) 04年與關心妍拍拖, 06年分手;而大孖蔣翹光(右)則甚少緋聞,極之低調。

主動炸仔


原來該名四眼男是著名米芝蓮推介食肆,老字號「印尼餐廳 1968」大少蔣翹帆,比其前奀星男友有來頭。蔣現年 38歲,在澳洲讀完多媒體設計學士課程後回流返港,曾與有線娛樂台前主播吳天瑜傳緋聞。當日用來接載 DaDa的 Benz屬蔣翹帆名下, 02年落地,新車價約值 60萬。
據知蔣與 DaDa撻着 2個月,而且是 DaDa做主動。「幾個月前, DaDa突然周圍問人關於 Hudson(蔣) 嘅嘢,又問佢好唔好仔、鍾唔鍾意蒲、有冇女朋友之類,我哋成班 friend都知佢對人有意思,點知早排發現原來佢兩個已經一齊咗! DaDa話佢今次好認真,唔想好似以前咁拍散拖,所以一有時間就陪 Hudson睇戲食飯,盡快培養感情。」知情人士透露。


分手後仍有來往, DaDa同王宗堯喺《喜愛夜蒲》更有肉搏場面,咁鬼激,想唔翻撻都難!


兩人拍拖期間,曾有貼頭自拍流出, DaDa亦承認同王宗堯拍過拖。


蔣鍾意去 party飲酒, instagram內亦有多張同女友人嘅親密合照。


「印尼餐廳 1968」多名人捧場,令蔣翹帆與多位明星相熟,連周慧敏亦係其好友。


DaDa嘅 instagram關注咗蔣翹帆,但並冇二人合照,明顯要保護新戀情。

DaDa讚好好


一心釣金龜做闊太,態度清晰的 DaDa終於的起心肝,撇甩糾纏多時的奀星王宗堯。可惜蔣翹帆只是表面風光,實則並非身家過億的富二代,現時手上並冇任何物業,家族經營的餐廳亦執剩一間分店,去年又與緋聞女友、有線前主播吳天瑜牽涉一單偷車官非,事緣蔣的一名洪姓女友人於 09年將一架 Benz交給蔣保管,但蔣與吳擅自駕駛該車,洪得知後報警,兩人最後被判守行為 1年,絕對是空心闊少。
炸錯目標,爆 DaDa上週一( 27日)在電話中死撐冇拖拍。「你哋影到咩呀?我單身㗎!嗰晚其實仲有一男一女,係個女仔同 Hudson熟,叫埋我去,佢送我返屋企係因為 gentleman啫!(你哋點識?) 1年前去過佢間餐廳做訪問識嘅,之後都有同朋友落去食飯。(覺得佢點?)好好,好好,好有風度!同埋好叻,佢自己設計網頁㗎!不過佢 𠵱家唔喺香港喎!」
連人哋人在澳洲都咁清楚,你話唔熟搵鬼信咩!

黐仔脫貧


拍百果園廣告彈出的 DaDa,初出道時外貌清純,早期的緋聞男友只是王宗堯等奀星,但上位後 DaDa即向有米男埋手,更由租住屯門 500呎豆腐 膶,到現時手揸約 400萬泓景臺,極速脫貧。


四線組合
DaDa入行前已同樂隊組合 Square成員 Gary(趙俊承)拍拖,一度分手後再次翻撻,可惜最終都要散。


無綫閒角
曾被影到同 DaDa遊澳門的 TVB閒角李雨陽,被 DaDa指佢放料博宣傳,李死撐話二人性格唔夾,冇可能發展。


上市主席
嗒慣大隻仔的 DaDa,被發現同 51歲、上市公司中盈國金( 766)主席梁毅文撐 枱腳 3粒鐘,其後 DaDa堅稱冇被富商包養。


九巴後人
有傳 DaDa經理人施念慈介紹九巴第 5代後人雷德賢畀 DaDa,更指兩人正在拍拖,但 DaDa喺微博否認識對方。

採訪、撰文:娛樂組
攝影:娛樂突發組

arrow
arrow
    全站熱搜

    tvb4life 發表在 痞客邦 留言(0) 人氣()