還記得五月底,地下rapper曲尺N年前與女伴的夜蒲親密照流出。而你多數不知曲尺是誰,但女事主之一的連詩雅(Shiga),你一定識。

不幸中的大幸,是事件沒有鬧出軒然大波,甚至不及台灣富商李宗瑞慾照風波的十分一。但連上數天娛樂頭條,被冠上「慾女」之名,該足夠讓Shiga難受,「嗰陣啱啱拍緊《喜愛夜蒲2》,本來每日都過得好充實好enjoy,點知發生呢件事,心情即刻跌落谷底。」

食得鹹魚抵得渴,而從小到大讀國際學校的Shiga,則只懂用「sacrifice」(犧牲),「唔係淨係呢樣嘢(夜蒲),作為公眾人物,所有行為特徵都會被放大。我又唔會特別覺得唔抵,正如普通人唔會有機會enjoy到擁有自己嘅唱片同電影,有咁嘅收穫,要sacrifice嘅嘢就會比人哋多。」

太陽底下無新事,吃了鹹魚不喝水就等同sacrifice,只是二十四歲的Shiga,經過風吹雨打,還是享受陽光燦爛的日子。

 

''好好過''

夜蒲照風波過後不久,Shiga的新歌〈好好過〉便告推出,歌詞提到如何克服情傷,多少令人聯想到是對事件的回應,「歌其實一早已經錄好,係前作〈到此為止〉嘅續集,係想講一段救唔番嘅關係,就算幾唔捨得都要放手,重新振作,只不過件事咁巧合發生咗。」

歌曲透露了Shiga逝去感情的看法,至於那位前度,她其實不欲多提,「從來都無怨恨佢(曲尺),事實上佢係前男友,真係相愛過,所以無謂再諗(追究責任),反正對件事都無幫助。

「畢竟自己只係個普通人,見到呢啲(報道)一定會唔開心。不過我好快就話畀自己聽一定要振作,唔好再諗啲無謂嘢。我知道再畀壓力自己,只會對工作表現有影響。做得呢一行,預咗會有好多出人意表嘅經歷,今次就當係一個challenge。」

入行前,一個月收入都有幾萬;反而入咗娛樂圈,要問公司借糧……

''幸運兒''

別因開首的問答而誤會,事實上整個訪問中,Shiga的心情輕鬆兼笑容滿面,看來心頭大石早已放下。

「屋企人同朋友反而唔會多提呢件事。有人以為你關心一個人,要不斷咁講安慰說話,其實係最好嘅做法,就係當無事發生,等佢自己recover。

「至於唱片同經理人公司,喺我亂諗嘢之前,已經就show咗十足嘅支持。『Actions speak louder than words』。」

是的,從來都認為Shiga是樂壇新一輩中的幸運兒。初出道就有公認才子方大同給她寫歌,同門師兄周柏豪為她執導其MV;又憑處女電影《喜愛夜蒲》獲得金像獎最佳新演員提名,路已比很多人好走。「所以我覺得自己其實好好彩,際遇就係咁奇妙,畀我認識好多真心、不厭其煩幫我嘅人,完成我嘅夢想。」

不論在之前的微電影,還是新戲《喜愛夜蒲2》,Shiga跟周柏豪(左圖)及關楚耀(右圖)都有激吻戲份。

''慳妹''

其實娛樂圈的表面風光,訪問這天,Shiga與經理人一個拖着小行李箱,一個拿着一大袋衣裝,準備訪問之用。小行李箱是她的私伙裝備,內有斗零踭三對、多雙襪子等,化妝她也自己一手搞掂。看似受盡萬千寵愛,Shiga也曾勒緊肚皮過日子,一腳踢?不是難事。

「入行之前有教過baby gym同playgroup,亦有做英文繙譯,一個月收入都有幾萬;反而入咗娛樂圈,試過有近一年時間,斗零收入都無,要問公司借糧,係拍咗戲收入至多番。

「就算依家嘅使費,我都慳得就慳。出入會搭地鐵、巴士,慳番book保母車嘅錢,絲襪買十蚊一對嗰種,有時就咁食個腸仔包當一餐。大家都知唱片有幾難做,真係要有熱誠,先至會留低。我想趁自己仲係廿歲出頭,做自己真正想做嘅事,點樣去搵大錢係之後再諗嘅事。

「十歲之前,我嘅夢想係做老師,十歲之後迷上鄭秀文、Christina Aguilera,就變得好想做歌手。結果我兩樣都做到,所以真係好好彩。」

比起怨恨或追究責任,Shiga寧可忘記舊愛曲尺。

因為陳年舊照而要開記招兼聲淚俱下地交代,應該就是Shiga口中的sacrifice。

歌曲〈到此為止〉,不知有多少是Shiga個人經歷的投射,但網上過百二萬的點擊率,已表示她「年紀小的不智」,market勁buy。

''母親''

Shiga不斷強調自己「好好彩」,其實早在童年就碰上最「唔好彩」的事:雙親在她十多歲時離異,自此便與母親相依為命。

「嗰時我未夠十歲,好唔開心,好唔慣,始終覺得一家三口先叫齊整。我記得自己成日無端端喊,有成個幾月都無點同媽咪講嘢。但諗番轉頭,如果佢哋為咗佢而勉強繼續一齊,大家只會更唔開心。」

失去一個完整家庭,卻賺了跟媽媽的深厚感情,算是補償。「雖然我同媽咪各自有工作,佢係做繙譯嘅,依家都要為工作周圍飛,我哋雖然唔係經常碰面,但我只要夾到時間,一定留畀佢。每逢生日、過時過節,盡量都同佢喺正日慶祝,我好珍惜兩個人相處時光。」

所以直至現在,Shiga還是跟媽媽同住,「畢竟想留多啲時間畀佢,最好可以賺多啲錢,畀媽咪退休、再買樓,等佢有好啲嘅生活啦!」

對於家庭,Shiga這個女兒家對婚姻仍有憧憬。「我好喜歡小朋友,一直有個好早成家嘅念頭。但暫時首要目標,只係想畀媽媽最好嘅生活。其實我都諗過,最好喺三十歲前結到婚啦……」

Shiga因為彼此的母親是好友,跟方大同自小已認識,更會稱呼對方為「Khalil哥哥」。

提起媽媽,Shiga眉飛色舞,母女的深厚感情溢於言表。

巨蟹座的彼岸

對話中,Shiga又不經意講到,自己於6月29日生日,屬於巨蟹座女孩。

我不諳星座分析,所以稍為翻查了有關巨蟹座女性愛情觀的資料,特點包括「是個好太太、好媽媽」、「要穩定持久的忠誠伴侶」、「長遠目標必定包括婚姻和孩子」等等。

只是我們總愛舊事重提,對此,她從容應對。

 

「就算唔係因為呢一件事,其實入行三年以來,我每日都不斷探索緊呢個圈子嘅運作模式。人哋點諗點講,我控制唔到,只係相信時間可以證明一切,當你自問放好多時間心機喺工作,觀眾一定會睇到。」Shiga說時一臉認真,絕不似hea我。

「不過,第時再拍拖,應該會保持低調喇,我仲諗住三十歲前結婚o架。」我相信她不是那種靠炒作私生活博上位的藝人。人生要有遺憾,才令人更懂得珍惜幸福。至於結婚嘛,對在訪問中N次強調要「畀心機做嘢」的Shiga來說,彼岸依然很遠。

所以,星座決定性格這回事,不知你信不信,反正我信了。

arrow
arrow
    全站熱搜

    tvb4life 發表在 痞客邦 留言(0) 人氣()