FACEweekly
罪不該萬死 卓韻芝
《卓韻芝罪該萬死 One Night Stand》
日期： 2012年 10月 11-12日
時間：晚上 8時 15分
地點：灣仔伊利沙伯體育館
票價：$380/$280（ 8月 31日起於城市電腦售票網公開發售）
唔講政治爆床事
海報設計由最近為海港城多啦 A夢策展的 ALLRIGHTSRESERVED設計，造型則由潮攝 Wing Shya長期拍檔 Sean K.負責。原來出拳隻手係拍攝當日剛巧經過攝影棚的《低俗喜劇》導演彭浩翔。
上年尾首演棟篤笑《死去活來 One Night Stand》，及後繼續加場，反應咁好，今年梗係食住上，「上次講'11去英國倫敦 Goldsmith大學（藝術家 Damien Hirst都喺度畢業）讀美術時，一些溝仔奇聞，今次個騷，會講好多 sex。」阿芝預告會講自己最糟糕床事，又會教高登仔點追女，嘩，咁就 18禁喇喎！「吓，家吓 18歲以下都好多床事啦！」有嗰句講嗰句，完全唔理犯禁，「就係要挑戰大家底線，個騷先叫《罪該萬死》。」唯一不談是政治，「唔講國民教育，因為唔係我強項，要聽就搵黃子華。我只係想觀眾買飛入嚟 Alice in Wonderland咁，忘記工作、生活壓力，輕鬆 2粒鐘。」又係，日日梁振英又陳茂波，聽得多都怕。
阿婆大戰鬼仔
拍攝《今日阿婆金句》封面，阿芝就話過阿婆百厭到學在場人士講英文粗口，不過第二日又唔記得，勁可愛。
早前書展阿芝親撰《今日阿婆金句》，將過往與婆婆生活點滴與眾同樂，大玩親情。今年棟篤笑亦不例外，繼續講阿婆，問阿婆性事咁爆？「係呀，佢即刻話：『啋，我得一個男朋友，就係我老公，邊有咁多性事？』笑到我標眼水。」唔講性，就講阿婆點同阿芝的鬼仔鬼妹朋友相處，雞同鴨講好搞笑，「自從上年讀完書回港，就同婆婆住，我哋性格好極端，我好執着，佢就好冇所謂，但佢教曉做人最緊要笑、最緊要寬容，就乜事都解決到。」筆者睇過《今日阿婆金句》，當中講阿芝因為趕書而忽略了婆婆，猶如各打工仔日趕夜趕卻冇時間理會家人，勁有共鳴，難怪此書不消一個月即賣去萬多本，上星期在商務印書館暢銷榜更是第 3位。
派傳單教夜蒲
撰文：陳家豪
攝影：黎韋邦
化妝： MickyChoy@Suchagood...
髮型： Ziggie@SalonLaMod
服裝： 3.1PhillipLim
場地提供： SalonLaMod
留言列表
