Fun App

iPhone Android組隊　射異形打空戰

2012年08月29日 ~~ 第275期 Face

實體道具配合 app玩嘅 game，之前已出過唔少，但絕大部分都係專為 iOS而設，唔受 Android玩，搞到好鬼獨家村。不過最近有間廠 APPGEAR，一次過出咗兩隻打通 iOS同 Android嘅 fps同戰機 game，兩種手機都可以加件道具上去，打完手槍打飛機，更可以跨平台連線對戰添，實行與眾同樂唔自閉！

Elite CommandAR: Last Hope

機種： iOS、 Android
App售價： Free
手槍售價：$268
電池： AAx2
查詢： JC Shop（ 3102 2783）

邊 fing手槍邊睇芒
Elite CommandAR: Last Hope

個 app靠水平 sensor去瞄準，所以要不停連手機連槍四圍 fing，但因主角識自己跟路線行，所以唔使 fing槍行路。

首先試打隻手槍 game，因支槍變成實物，再套落手機上去玩，成個感覺就同玩普通手機 app唔同晒。以前玩 Wii之類嘅體感槍 game，槍遙控離電視總有一段距離，但係𠵱家手機個芒就喺埋槍上面，將把槍 fing嚟 fing去射怪獸時，個芒亦會四圍郁，其實幾難瞄準。仲要一開波玩就有成堆異形撲埋嚟，真係有啲失控，搞到亂咁射，嘥晒啲子彈，玩完一輪習慣咗先控制到場面咋！

手槍解構

因手槍係靠 3.5mm線連接手機，所以支援埋 Android機，而且手機夾有得校闊度，窄身至 iPhone同 GS III、闊至 G-Note都夾到。玩嗰陣手槍除咗係手掣，仲會變埋喇叭，音量比手機大好多，勁爆！

槍身除咗開槍掣，左邊仲有揀槍、手榴彈、盾牌同 reload 4粒掣，所以右手揸槍後，左手都要成日擺喺呢排掣前。

雙打 AR仲要等

隻 game嘅玩法其實同一般 fps差唔多，都係跟劇情喺宇宙背景中喪射外太空怪獸，打完大佬就過關，愛嚟 kill time都唔錯，同 friend連線雙打就更襟玩。只可惜連線功能仲未開通，要等廠方遲吓 update個 app先有得玩。另外，其實 game名中有個「 AR」，係指佢仲支援 AR擴充實境功能，可以喺 game中特定地方，用手機鏡頭影 AR咭嚟加入角色，但呢個 function同樣未玩得，又要大家等。

外星士兵大大隻又行得慢，而且多數只會同時出現一、兩隻，所以唔難應付，平心靜氣瞄準就射得死。

但呢啲爬行異形就會十幾隻咁高速撲埋嚟，好多時未瞄得切就俾佢打中，於是要亂射自保，搞到成日見 reload警告。

手榴彈可炸晒畫面所有怪獸（下方正中見到剩低幾多個）；生命 bar上面仲有盾牌儲氣 bar（紅圈），儲夠就能㩒手槍粒掣使用擋攻擊。

儲夠分有得 unlock升級武器，但使用方法唔會變，都係靠槍手掣幾粒掣去操控，除揀 menu外，玩 game全程甚少需要篤芒。

手槍套裝入面已包埋兩張 AR咭，應該唔係吹水，遲吓一定有得玩 AR。簡介話兩張咭能喺 game中某啲位加入一正一邪角色幫拖或單挑，玩落正唔正，就要遲吓至知。

隔空對打互射
Foam Fighters

相比起前面隻 game把槍，呢隻戰機 game《 Foam Fighters》嘅道具，就只得隻好似小學雞玩嘅發泡膠飛機仔，而且就算唔裝上手機背面，隻 game亦一樣玩到，係裝飾性質居多，似乎比較流。但其實佢經已支援連線對打，你同朋友可以各操控一架戰機隔空開火，齊齊 fing部手機，一邊逃避對方攻擊，一邊又要搵有利位置，篤芒發炮射低對方，仲刺激過打手槍！莫講話雙打敵手識走位，就算只玩單打，一架機要對付成堆蚊滋咁細又飛得快嘅敵機，一啲都唔易玩！

廠方總共出咗 6款機，每盒套裝入面有兩架機，畀你變節代表唔同國家出征，但支架就只得一條，即係雙打要買兩盒。

Foam Fighters

機種： iOS、 Android
App售價： Free
戰機售價：$128（包兩架機）
查詢： JC Shop（ 3102 2783）

戰前準備

要狂 fing部機先追到飛機射，活動幅度大過打手槍！

首先個 app會啟動鏡頭，叫你 scan道具機上嘅徽號，去識別你屬於咩國家。

認到後就會顯示戰機攻擊力等資料畀你睇，但筆者覺得技術最緊要，用邊架機分別都唔大。

然後就跟指示裝戰機仔上機背，再調校位置，等架機完全 fit畫面預留嘅戰機形空位。其實唔裝機仔都得，不過冇咁好 feel囉。