26歲嘅澤尻英龍華， 5年前出席《塵封的筆記》首映會時態度囂張，被媒體指摘，自此一沉百踩， 2009年更被事務所解約。如今復出，又因為工作態度有問題招人話柄，負面新聞源源不絕。
來路貨
澤尻英龍華 唔扮嘢做自己
港姐一人一票，爛尾收場。
事實上，有些東西，唔需要一人一票，結果已經呼之欲出。
正如你唔會選邊個同事最乞人憎一樣。
澤尻英龍華唔使一人一票，已經惹人厭惡。佢早年憑《一公升眼淚》彈出， 2007年態度差遭封殺； 2009年被事務所炒魷。好不容易復工，點知被踢爆詐病缺席宣傳活動，因而激嬲同劇演員。
難得新作《整容天后》，同樣都係講臭寸阿姐、整容、濫藥、 3P等劇情。角色未必討好，不過以澤尻嘅人生閱歷，應該演得好自然。
澤尻英龍華嘅乞人憎，已經街知巷聞。日本傳媒仲慌佢唔死，本月中搞咗個「日本人最厭惡女星」選舉，澤尻毫不意外成為首位，乞人憎得相當實至名歸。
電影根據原著《 ヘ ル タ— ス ケ ル タ—》改編而成。因題材新穎， 2004年贏得「手塚治虫文化賞」。
以攝影起家嘅蜷川實花（右一）籌備電影長達 7年，有指佢不滿澤尻演技而鬧不和。
犯眾憎
不過愈乞人憎，澤尻就愈有話題性。據知拍攝新作《整容天后》時，因演技達唔到水準惹起導演蜷川實花不滿。及至拍畢之後，澤尻自言抽離唔到角色，宣布停工，就連早前舉行嘅試映會亦被迫缺席。點知話口未完，就被傳媒拍到佢夜蒲。大話被拆穿，澤尻固然爆，同劇演員桃井薰更發火，揚言不再同佢合作。
澤尻飾演嘅人工美女，為上位跟電視台高層上牀，意識大膽。
肉搏連場
事業上停滯不前，澤尻將怒氣發洩落女助手（寺島忍）身上，更同對方男友（綾野剛）上牀，大玩 3P。
日本神化男星漥塚洋介飾演嘅富家子弟，同澤尻有激烈肉搏戲。澤尻更首次露點，據說眾人對澤尻身材讚不絕口，有鹹片老闆欲以半億日元，利誘佢拍 AV。
濫藥成癖
由於樣貌、身材都大執位，戲中嘅澤尻要長期服藥，更因濫藥而迷迷糊糊。
娛圈血淚史
《整容天后》（香港 9月 13日上映）講「扒女」全身整容，成為 top model，但隨住人氣急升，「扒女」身體愈來愈多後遺症。同一時間，後輩 model崛起威脅其天后地位，搞到澤尻濫藥玩 3P，仲要陪老細瞓。
無獨有偶，劇情同澤尻經歷都頗為相似。事緣今年 6月，澤尻前夫高城剛向傳媒爆料，指澤尻一向有食大麻、迷幻藥嘅習慣，並指前妻為求鹹魚翻生，已成為唱片公司社長嘅情婦。事實係點？只有當事人至知。不過多得呢啲花邊新聞，電影直接受惠，票房大收近 20億日元。
乞人憎，原來都唔係咁「乞人憎」。
整無可整
為保持美貌，澤尻一直整容，最後整無可整，連食藥都抑制唔到後遺症，一撻撻黑斑浮晒出嚟。
《挪威的森森》嘅水原希子飾演澤尻 model師妹。澤尻為剷除對方，派助手去毀佢容。
原本係大肥妹嘅澤尻成為大明星後，不欲大眾知道其過去，連親生妹都唔可以見。不過姐妹始終情深，兩人喺家鄉重逢。
飾演經理人嘅係殿堂級演員桃井薰。當初佢曾大讚澤尻演技，但澤尻詐病後，引起老前輩不滿，揚言不再同澤尻合作。
留言列表
