揞名爆
「死心眼」狐假虎威犯眾憎
媽咪姐早前同一個喺公仔箱做咗好多年嘅朋友仔敍舊，傾吓食吓，佢就講起話「死心眼」睇落斯文又乖，但其實得個樣咋！話說幾年前佢同「得把口」一齊，嗰時呢位最鍾意偷食嘅男友好得寵，逢大騷都有份，連帶「死心眼」都覺得自己係「大星」㖭！好似有次拍劇要出海，個頭俾海風吹到亂晒就梗係啦，但「死心眼」即時發晒脾氣，同隨隊髮型師講：「我唔理呀！你幫我搞掂佢！」跟住人哋好細心幫佢搞完個頭，佢都繼續彈三彈四。咁髮型師梗係谷住道氣，但又礙於「得把口」嗰時有勢力，惟有返到電視城先狂呻！估唔到成個化妝間嘅同事即刻附和，可見大家都受咗「死心眼」唔少氣。
不過，隨住「得把口」連番出事，喺公仔箱嘅得寵程度大不如前，而死都唔捨得分手嘅「死心眼」呢，亦無得咁囂嘞！就無幾耐之前啫，佢喺拍劇化妝整頭期間，又嫌三嫌四，點知髮型師一句就「質」埋去，「點呀！你唔鍾意，唔好整囉！同導演投訴吖！」嘿，估唔到會俾人寸番轉頭嘅「死心眼」當堂無聲出。講真吖，「得把口」依家先叫啱啱企番起身有嘢做吓，之前就算想幫女友都有心無力啦！而且，媽咪姐都係講嗰句，己所不欲，勿施於人。呢個世界，山水有相逢嘅！ 
全站熱搜
留言列表
