無可否認，因為《430穿梭機》，因為「芷珊姐姐」，我們對黎芷珊是有些情意結的。

所以，當知道她入行近三十年來，終於有屬於她的個人清談節目《最佳男主角》，大家會戥她高興；節目叫好叫座，大家也會覺得這是她應得的。

螢幕上，她憑其軟性訪問技巧和私下交情，令劉德華、劉青雲、黃秋生個個影帝打開天窗說亮話；螢幕下，她當上了被訪者，亦同樣處處流露真性情，坦白得可愛——我想，就是因為她這些不造作兼簡單直接的性格，令她的情路上，出現了梁家輝、鄭伊健、陳小春和邵傳勇這幾位「男主角」。

「我覺得係條命嚟o架！我真係信我有條『可以識到靚仔，啲靚仔又OK你』嘅命o架！同埋我後生嘅時候靚啲，應該係溝到仔o架喎！哈哈哈！」她說。

我是信的，因為她現任那位在《愛．回家》中飾演律師的男友張達倫，也是靚仔一名呀。「佢係靚仔o架！連錢國偉第一次見到佢，都話：『嘩！靚仔過鄭伊健喎！』哈哈哈！不過呢，我哋七月嘅時候已經分咗手啦……」她的語氣忽然低沉下來。「嗯……都幾無奈o架……」

接着，坐在我對面的她，不停地用飲管和長匙羮攪動着那杯凍檸茶內的冰塊，靜默了好一會，垂下來的眼簾邊緣悄悄地出現了一道小小的淚珠。

 

張達倫

今年七月，在戀情第九個年頭時，黎芷珊和張達倫和平地分手了。從芷珊的話語間，不難感覺到她和他其實還是相愛的，可惜年齡差距卻成了這段情的「致命傷」，因為，她比他年長十二年。

我哋之前其實好耐o架啦，不過佢又唔紅，我又唔紅，冇乜人有興趣知咋嘛。哈哈哈！佢細過我十二年，我嗰陣時都以為得，其實唔得o架！

以前啱啱開始時，大家會好愛，乜嘢都唔理；但到咗依家九年，啲人就會問我哋點解唔結婚呢？跟住大家就好似覺得：「死喇！係咪真係要諗呢件事呀？」任何人拍拖咁耐，之後先去諗結婚，呢件事就已經變咗個責任囉！我諗佢會覺得好大壓力！

影帝劉德華與劉青雲罕有接受電視訪問，主持人是黎芷珊，而非查小欣。see，這就是友情！

雖然佢咁多年嚟都畀到我100%信心，冇令我懷疑過或者擔心過，亦都對我好好，但我係佢第三個女朋友，呢個世界好多嘢，佢都未睇過！我諗，佢自己都會好擔心，將來仲keep唔keep到呢樣嘢，好驚自己遲啲真係會對我唔住，呢件事係好無奈！你諗吓我五十二歲嘅時候，點都皺晒皮啦，但到嗰陣佢先四十歲，啲男人味先出嚟，有型有款，咁死未？年齡差距係好有問題o架，仲要佢係一個靚仔喎！

另一個問題係，佢覺得同我一齊，佢好受保護，佢覺得我好多嘢都好take care佢，自己好似冇長大到咁，佢話，趁依家起碼大家仲可以做到朋友，我哋仲好錫對方，咁不如……咁我哋依家嘅關係，就變咗好似屋企人咁囉，佢到依家仲好錫我，我有乜嘢搞唔掂，一個電話打畀佢，佢都會即刻飛過嚟！

其實我都好明白佢嘅心態嘅，無奈囉……嗯……真係無奈囉。

《最》早前開記招，芷珊的老死兼中學同學何超蕸（後排右三）畀面撐場。

邵傳勇

因為九八年情人節發生的一宗車禍，芷珊當時的男友邵傳勇頸椎受傷，差點癱瘓。在治療的半年光景，芷珊一直貼身照顧，外界都看好他們經歷過此患難後，照理就是拉埋天窗，不過最後此情卻在千禧年成了追憶。

我哋一齊咗都有八年！嗰陣佢撞車好大鑊，又斷頸骨又盛，仲整咗個好似巴斯光年咁嘅頸箍，仲要喺頭骨度開四個窿，成半年行動唔方便，我咪一路喺度照顧佢囉！咁大家覺得我好偉大，覺得患難見真情呀，覺得我哋應該結婚啦，但世事難料呀！哈哈！

當時係我提出分手嘅，唔知呢，so far其實覺得佢嘅性格唔係好啱我啦！

其實呢，有時候呢，有好多嘢唔係理所當然嘅！唔係話共患難就一定有結果嘅！不過，我哋分咗手之後，到依家都仲係朋友嚟嘅。

十年人事幾翻新，《娛樂大搜查》的主持們，只剩下芷珊繼續跑新聞。

陳小春

和陳小春拍拖，正值他在拍《晚九朝五》之時。多年來，二人對此守口如瓶，直到今天，差不多廿年過去了，公開不公開也沒所謂了。

其實我同小春嗰陣只係年幾貨仔，唔係好多人知。佢嗰陣仲係「風火海」，後來同我一齊，就開始拍《晚九朝五》。

嗰陣我哋啱啱開始冇幾耐，我唔係好想畀咁多人知，有日晏晝，佢出咗去做嘢，我喺佢屋企等佢。跟住咁啱Michael（謝天華）上去佢屋企攞嘢，我原本喺度聽緊歌，一聽見有人入嚟，我就即刻擰轉面對住個露台，唔郁，哈哈哈！

Michael當時雖然識我係乜水，但又唔夠膽走埋嚟問我，我又唔想公開，又唔想畀佢知道，結果，佢最終都淨係知道有個長頭髮嘅女人喺度對住個露台，冇郁，好得人驚！哈哈哈！

我唔知Michael仲記唔記得呢件事，但佢當其時一定以為自己撞鬼囉！哈哈哈！正常人都會擰過去打招呼呀，但我冇囉！哈哈！跟住佢攞完嘢，我聽到佢急急腳就走咗！哈哈哈！不過，冇耐呢，風火海佢哋幾個都知道我同陳小春一齊過。

N年前的《430穿梭機》合照，當年周星馳、嚴煥全、譚玉瑛及黎芷珊多青澀。

有傳星爺當年曾追求過芷珊，事實是他們兩個經常在開工時顧住玩。

鄭伊健

八十年代因為主持《430穿梭機》而跟鄭伊健拍拖，對外界來說，實在是芷珊最「經典」的一個男朋友。每次見她拿着咪訪問他跟蒙嘉慧的戀情，觀眾總會戥她尷尬。

老實講，我真係唔覺得尷尬喎！喂，我同佢幾廿年前嘅事喎！哈哈哈！對我嚟講，太遠啦！同埋，我又唔係因為邵美琪或者梁詠琪而同佢分手，冇牴觸o架！

我哋嗰陣做兒童節目，拍咗三年幾拖，但就成日鬧交，又勁呷醋、勁小器，佢同女仔講嘢又唔得，我又影響到佢，都唔畀我同男仔講嘢，真係好低能白癡兼無聊！試過好多次喺化妝間嗌交嗌到呢……哈哈哈哈！啲同事睇到，都唔夠膽行埋嚟，譚玉瑛都睇唔少，佢一見到我哋嗌交就唔出聲o架啦！

初入行時，芷珊、陳慧嫻及陳樂敏推出《少年雜誌》一碟，可惜只紅了陳慧嫻。

試過有次佢啱啱去完歐洲拍完嘢返嚟，買咗個玻璃音樂盒嘅煙灰缸畀我，我可以變態到發脾氣將佢揼爛咗！你話我嗰陣幾乞人憎！哈哈哈！所以嗰陣好多人都驚咗我，好似伊健班朋友、訓練班啲同學李家聲嗰啲，佢哋都叫我做「黎監製」！所以人哋飛我係正常o架！我係抵畀人飛o架！邊個頂得我順呀？

跟住分咗手之後好幾年，我哋都冇聯絡，係到我要開始出去做娛樂訪問，大家先再見番，開頭都有少少尷尬，但跟住都冇嘢。我有時有嘢要搵人幫手，都會搵吓佢，好似開二手衫店，佢又會畀一堆衫我；到今次我做呢個節目咁，佢又會肯撐我，好有情有義！

梁家輝

芷珊跟梁家輝拍拖，已是三十年前的事，那時女的才十六歲，男的，則已經廿五歲。

我細個好貪玩，成日都去disco，好反叛！嗰陣我由DD（八十年代初一間著名disco）開始蒲，我同梁家輝就喺嗰啲地方度識，係上山詩鈉介紹嘅，講講吓其實都有三十幾年啦！

我同梁家輝一齊時，我只係得十六歲，啱啱入行仲未出碟，佢大我九年，啱啱拍咗《火燒圓明園》，《垂簾聽政》啱啱上，我仲同佢一齊去睇，連雜誌都有做過封面o架！

嗰陣我爹哋仲未走（離世），我都帶過梁家輝返屋企，爹哋見過，好唔鍾意我哋一齊！因為佢覺得，點解我咁細個，要同啲做戲嘅人一齊呢？佢覺得戲子無情o架，但我當時點會識諗啫？

不過，後來我哋都只係拍咗年幾貨仔，因為我當時太細個，呢啲都擺到明唔會……同埋佢又覺得我貪玩，佢當時廿五歲，幾乎都覺得自己係可以結婚o架嘛，但佢點可以同一個十六歲嘅o靚妹結婚呢？

然後呢，我哋分咗手第二年，佢就做咗金像獎影帝——其實同過我一齊啲人都會紅o架！我條命就係咁囉！所以我係認命囉！哈哈哈！

這些屋企人

今年四十六歲的黎芷珊，擁有四分一葡國血統，爺爺黎登是澳門法律界翹楚，姑姐黎婉華則是賭王何鴻燊的元配。「我原本個葡萄牙名係Luisa Maria Leitao，中文名係我媽咪改，黎呢個姓都係跟Leitao呢個譯音。其實超蕸係我小學同學兼死黨，我嗰陣已經成日去佢屋企玩。「就算係大個咗之後，我同超蕸到依家都好friend好friend，大家姐（Pansy）同二家姐（Daisy何超鳳）佢哋，亦都會成日hang out，所以我哋成日都見到面。不過我哋都唔會提乜嘢親戚關係嘅嘢，反而係朋友關係多啲。」

芷珊小時候已常到何家玩，超儀長大後跟她說，當時對她的印象：「呢個姐姐成日攞住支結他嚟，紮住條辮咁，幾型喎！」

芷珊本身對下還有一個弟弟，父母自她五歲離異後，姊弟便跟父親生活；直至父親於她十八歲離世後，才開始跟母親多了見面。「我同佢（媽咪）冇乜緣份咁，嗰陣見親面都會鬧交，係依家大個咗先好啲。」

訪問尾聲，我要她如《最佳男主角》內的被訪者一樣，跟我公開一個秘密：

原來雖然芷珊於香港土生土長，職業是電視主持，說的是廣東話，但其實她並不太懂中文字。「我細個讀書，爹哋幫我drop咗中文，佢覺得冇乜用，到我大個嘅時候，咪知道要後悔囉！我啲劇本都要寫拼音，咁多年到依家，我都係識睇唔識寫。」

結果，即使是「最佳男主角」五個字，她都要我先寫一遍讓她跟着寫。「中文字啲筆劃咁多，我真係唔想記！」明白的，明白的！