26歲的 Lana Del Rey，身高 5呎 6吋半，雖然唔算係標準 model身高，但勝在身形均勻，樣貌又有古典味，最近以懷舊 look拍 H＆M新秋季廣告，令好多人都記得佢。
西面
H&M女模 Lana Del Rey懷舊洗腦
最近大家經常見到 H& M廣告喺電視密密播，廣告中最搶眼當然係有個以 60年代懷舊打扮的靚女對住支咪唱歌，而呢位靚女正是今年於美國超紅的才女歌手 Lana Del Rey。
現年 26歲的 Lana憑 H& M廣告成功入屋，做 model有型格，唱歌更加係拿手好戲，特色係聲線低沉夠磁性，加上識作曲，今年頭推出大碟《 Born To Die》至今已勁賣 280萬張，下年格林美新人獎肯定冇走雞。
現年 26歲、於紐約出生的 Lana Del Rey，自小已鍾意唱歌。 18歲啱啱成年已於紐約做酒廊歌手搵食，由於聲線低沉夠特別，好快已有唱片公司搵佢簽約，可惜一直紅唔起，直至上年跳槽大公司 Stranger做旗下歌手，年頭推出大碟《 Born To Die》，主打歌〈 Born To Die〉更由美國 hit到歐洲，至今此碟全球銷量已高達 280萬張。
Lana成為今年 H＆M秋季代言人，佢嗰張瞓身海報大大張掛喺中環鋪面櫥窗內，唔少人行過都係咁望。
Lana以 60年代打扮拍嘅 H＆M新廣告，最近在電視日播夜播，超洗腦，而廣告歌亦由 Lana主唱。
新 Fashion Icon
Lana唱歌有 feel，樣貌同外形又夠型格，唔只被手袋名牌 Mulberry邀請做生招牌，更成為 H& M新一季 Exclusivel Concious平價晚裝系列代言人。揀中 Lana嘅原因係 H& M新一季秋冬裝想玩復古，所以就搵樣貌同輪廓有古典味的 Lana做 model，以 60年代打扮拍廣告， 𠵱家個廣告喺電視日夜播，入晒屋。
今年 1月推出大碟《 Born To Die》，唱片封套上 Lana以半裸姿態攬住男模，夠晒大膽。
網上圖片
14歲酗酒
唔只 H＆M， Lana仲係名牌手袋 Mulberry代言人，上週三晚 Mulberry於新加坡慶祝旗艦店開幕， Lana亦以復古造型上台唱歌贈興。網上圖片
Lana充滿古典味又優雅，但估唔到曾經爛蒲爛飲， 14歲便試過酗酒。最近她自爆：「當時我曾經日日飲酒，就算一個人都照飲，當時我飲到認為酒已經重要過世上任何一切，我嘅思想同情緒都變得好陰暗，搞到我父母都好擔心，最後要送我去寄宿學校先戒到酒。」好彩搣得甩鋪酗酒癮， Lana有今日成就，真係要多謝父母。 
留言列表
