今日好玩嘢

光復貝澳　港人露營攻略

2012年10月31日 ~~ 第284期 Face

秋高氣爽又係露營佳節，黃金周驢友迫爆營地令人猶有餘悸，所以今次《 FACE》搵 嚟各種不求人露營裝備，等你食、住、如廁完全自助唔使同人爭，再搵 嚟專家教路，教你輕鬆實惠執好露營 checklist，今個秋天無懼驢友齊齊去 camp光復貝澳！

互動片段

光復貝澳　港人露營攻略

清潔篇　自搭廁所不求人

Vivian一聽到去露營，即時話最擔心廁所問題，雖然貝澳及部分康文署指定露營地點都有廁所及沖洗設備，但要同人迫、衞生情況又冇保證。其實 𠵱家有唔少露營用品都會照顧大家如廁需要，自建私人廁所沖涼換衫，甚至流動馬桶都有， 啱晒怕去公廁 嘅女士。




喜瑪拉雅流動廁所$420（ a）
實用度：☆☆☆（ 5☆最高）
•直拉式帳篷，安裝同一般帳篷無異，高約 2米，水袋、坐廁需另行添置，用作更衣、洗澡頗為方便，缺點係比一般帳篷重。 




路客太陽能淋浴袋 20L$75（ a）
實用度：☆☆☆☆☆
•水袋裝水後能用下方花灑出水，黑色有助吸熱保溫，放 喺太陽下能加熱水溫。用途廣泛，洗手、洗碗碟、簡單沖身也頗為方便。 


用一般黑色垃圾袋就可更換，便便完自己執手尾，乾淨過用營地冇水 嘅旱廁。

Reliance Collapsible Portable Toilet Fold to Go$960（ b）
實用度：☆☆☆
•可摺式流動馬桶，打開三隻腳鋪上膠袋即用得，使用方便，重量亦算輕，反而係體積較大，不能放入背包。 

貝澳營位小 tips

貝澳露營指定地點共有 52個營位， 喺入口辦事處登記即可使用， 1人可留 1個位，營友記得守規矩唔好過界侵佔其他營位！登記後冇限住幾耐，但要 喺每星期 1日 嘅清潔日搬走。近年 嘅公眾假期多數爆滿，所以記得晨早入 嚟霸位。除指定營位外，草地位置都有人紮營，康文署職員雖然好少驅趕，但為免迫爆貝澳，唔建議大家咁做。 

其他營地推介
灣仔西營地

難度：☆
（ 5☆最高）
交通：星期六、日或公眾假期，由鑽石山巴士總站乘 96R號巴士往黃石碼頭總站，再轉乘往灣仔半島渡輪。落船後沿碎石小徑步行約 5分鐘，便可抵達營地。
設備：燒烤爐、 枱、凳、大型浴室、洗手間、水喉。
評價：可由黃石碼頭坐船直達。有沖涼設施，配套設備可以話係最完善，適合露營新手。 

鶴藪營地

難度：☆☆
交通：在粉嶺火車站乘 52B號往鶴藪專線小巴，於鶴藪村總站下車。沿鶴藪道往鶴藪水塘前行，約 15分鐘，便可抵達營地。
設備：燒烤爐、 枱、凳、標準洗手間、水喉。
評價：鄰近有生態農場等景點，可順道參觀。交通方便，設備亦齊全，缺點為面積較細。 

馬鞍山昂平營地

難度：☆☆☆☆
交通：由馬鞍山耀安 邨乘 NR84村巴，在馬鞍山村總站下車。沿馬鞍山郊遊徑步行約 1小時前往。
設備：燒烤爐、 枱、凳、旱廁、溪澗。
評價：屬香港少有，地勢較高 嘅高山營地，可飽覽西貢市中心風光。惜交通不算方便，需步行一段距離。設備亦較少，要步行至溪澗取水。 

浪茄灣營地

難度：☆☆☆☆☆
交通：由西貢市巴士總站乘 94號，在北潭涌巴士站下車。沿麥理浩徑第一段車路，經萬宜路向萬宜水庫方向前行，經萬宜水庫西壩及東壩，再轉入往浪茄灣的小徑，步行約 3小時，便可抵達營地。
設備：燒烤爐、枱、凳、旱廁、溪澗。
評價：位處 嘅西貢東有香港「後花園」之稱，景色怡人；鄰近地質公園，但交通不便，適合有經驗人士。 

住宿篇　小型營帳豐儉由人

Vivian同 Kyle兩個都係無營新手， 𠵱家營帳種類繁多，如果只係兩人用 嘅話選擇$500左右已經夠用。想 瞓得舒服可以帶睡袋、眼罩等用具幫手，但最緊要反而係要有地蓆，事關鋪 咗營都會 feel到塊地硬倔倔，所以有張充氣地蓆，背包做枕頭都可以 瞓得舒服。




Therm-A-Rest ProLite Regular充氣地蓆$840（ b）
實用度：☆☆☆☆
•打開栓塞就會自動充氣，可當床墊使用，就算用睡袋都應該考慮帶番張蓆。 


可以掛 喺營內或平放地面亦可，另外更能拎開個蓋當電筒用。

Mountain Ace C3 Comet$260（ b）
實用度：☆☆☆☆☆
•露營一定要有燈，露營通常用 gas油燈或入電 嘅電燈。我 哋就建議用方便易用 嘅摺合電燈，好似呢支 C3只需 4粒 AA電就可用 40小時以上，仲有 IPX5級防水。 


營帳平放地下，將金屬支架作 X狀安裝好就可輕易撐起營帳， 15分鐘左右就起到。

Mountain ACE Castor 2 Tent$520（ b）
實用度：☆☆☆☆
•經濟營帳，金屬鋼架用料尚算堅固，拍攝當日秋風大起都冇話周圍郁，係空間細 啲，最多只夠兩個人用。 

奴 COMMENT

營具可租
我自己少露營，唔會花太多錢買營具，以前都係朋友推介去戶外用品店租營具，套餐 full gear都係$300一晚，新手可以一試。 

專家教路　住宿營具

二級山藝教練仇燕雲

新手想初嘗露營體驗，最好有專家教路，中國香港攀山及攀登總會二級山藝教練仇燕雲（ Cloudy）建議本地遊 嘅營具最好一切從簡。「盡可能輕便，選用配有全蚊紗或半蚊紗內膽營帳已相當足夠， budget預$300至$500已可買到新手 啱用 嘅自立式蒙古包營，睡袋就一般保溫棉睡袋即可。反而有張地蓆可避免凍醒，除自動充氣款，預算不足亦可選購約$100嘅乳膠地蓆。」 

煮食篇　最緊要輕便

雖然 Kyle大大隻，但專家教路煮食用具最緊要輕同安全，出發前買齊成套露營 cook set，連埋氣爐其實都係$400左右，已足夠煎 嘢食或煮各種麵類。唔想同人爭燒烤爐更有 gas BBQ爐選擇，輕便兼易打理過用炭燒，燒烤不求人。

STS X BOWL$130（ a）
實用度：☆☆☆
•能夠屈成碟狀 嘅大碗，可有效節省行李空間。 




火楓 2-4人 cook set套裝$480（ a）
實用度：☆☆☆☆☆
•組合有齊 3個煲具、 3個小碗、氣爐、擋風板、調味料樽都唔使$500，入門新手必備，而 gas需另購。 




山岳小布 枱/中摺椅$150/$220（ a）
實用度：☆☆☆☆
• 枱、凳用料極輕，食用器材唔使下下放喺地，手提行李唔多 嘅建議入手。

STSPoly Carbonate Cutlery/GSI Tekk Cutlery餐具$50/$25（ a）
實用度：☆☆☆☆
•餐具主要有聚合塑膠同 鈦合金兩種，膠比較經濟實用。 




KOVEA Dream Gas BBQ$785（ a）
實用度：☆☆☆
•用打邊爐 gas嘅 BBQ爐，食厭公仔麵 嘅營友都會考慮露營時打邊爐或 BBQ，冇咁悶。 

露營裝備檢查表

新手去 camp好易帶漏 嘢，半夜 喺荒山野嶺唔會有 7仔俾補給，所以每次出發前睇睇下面個「露營裝備檢查表」就萬無一失。

炊事用具：
爐頭　□
燃料　□
風擋　□
刀具　□
鍋具　□
水袋　□
環保洗潔精　□
水杯及食具　□
主糧及備用即食糧食　□

照明用具：
電筒/燈　□
後備電池　□

營具類：
營幕　□
睡袋　□
地蓆　□
枕頭　□

個人用品：
急救藥品　□
梳洗包　□
毛巾　□
廁紙　□
牙刷　□

專家教路　煮食用具

聚碳酸酯製叉羮二合一餐品，數十元有售。

仇教練覺得煮食用具，最緊要安全第一。「其次就係操作上要簡單易用，摺合式爐具及餐具，節省行李空間，方便攜帶。目前流行使用氣爐，將氣罐和爐頭接駁使用，可多帶後備燃料以備不時之需。餐具要選可循環再用夠環保，不妨選用數十元左右 嘅聚碳酸酯製品。」 

Shop list：

a）新經緯（ 2489 8848）
b） Overlander（ 2117 1810） 

撰文：司徒港燊
攝影：黃家活
模特兒:Vivian、 Kyle@M.SPY