今年生日古仔雖然要開工，但有靚女 Melanie Z陪，都無咁慘。
探熱針
打破常規 生日破例開工 古天樂換索女津貼
閉關泰國
最近崛起的 Melanie Z擁有 34、 24、 35身材，被指同是鬼妹 Jessica C的新勁敵。
影壇大忙人古天樂，七月開始，留守泰國為彭氏兄弟執導，以消防員為題材的 3D電影《逃出生天》埋位，為集中精神拍攝多場救火動作場面，古仔寧願賺少啲，在這段時間，盡量推掉其他工作，專注留在泰國拍戲及操練體能。
但礙於一早接落 PCCW一站式智能家居服務廣告，廣告又要趕在十一月出街，加上拍攝時間正值他在泰國趕戲，還要撞正拍攝重頭救火大場面，電影公司企硬唔放期。
不過，古仔原來有個規矩，每年生日（十月二十一日），必定放假 no show，所以在《逃出生天》開拍前，他已向電影公司攞定三日假返香港，最後古仔唯有打破多年慣例，生日假期開工，二十號返到香港，便趕往外景現場，通宵拍廣告，正日當日，早上拍平面，夜晚同屋企人食飯慶祝，第三日又一早再開工，拍到傍晚，才趕搭最夜一班機返回泰國，三日假，開足三日工。 
因為 Melanie Z廣東話唔好，對白講到歪晒要 NG，古仔冇唔耐煩之餘，仲好開心，扮她講嘢。
廣告中古仔唔再做 Mr. Cool，加插不少搞笑動作同表情。
生日正日古仔要在影樓度過，廣告商特別送上蛋糕幫他慶祝。
古仔對今個廣告製作好嚴謹，不時同導演商量鏡頭角度同研究對白。
日前才完成泰國戲份返港，即刻與苟芸慧出席活動賺錢。（《蘋果日報》圖片）
最近四個月古仔都在泰國扮消防員，操得勁 fit。（《蘋果日報》圖片）
有女氹
古仔犧牲了假期，但今次接拍廣告，除了有七位數字酬勞外，合作的女主角胡惠珊（ Melanie Zeller）亦十分有本事，氹得 Mr Cool相當開心，還加料在廣告中自度搞笑場面。
「因為 Melanie係中美混血兒，啲中文講得唔係好正，未 roll機都仲講到，但一 roll機就緊張，講到歪晒；古仔就有樣學樣，同佢一齊講歪晒，仲專登拍咗一個歪音版本，但呢個版本唔會出街，純粹留俾古仔自娛！」一名工作人員說。
港女至愛
由李澤楷揸旗嘅 PCCW，近兩年推出新產品，都落重本，搵來城中超級靚仔，港女爭住愛的「筍盤」做代言人。
陳豪
41歲的陳豪，被稱「無綫筍盤」，形象正氣健康，也是無綫吸金力最強的小生之一，深受廣告客戶歡迎，試過一口氣速接六個廣告，年賺千萬計。去年， PCCW搵陳豪扮安裝員 sell光纖上網，成功入晒屋。 
郭富城
47歲的郭富城，有「舞台王者」之稱，近年轉戰電影，先後兩次奪得金馬影帝，早前，電盈重金禮聘阿王（ Aaron）擔任 mobile系列代言人。 
留言列表
