漫遊毒物

Wii U現身美國瘋炒 1倍！

2012年11月21日 ~~ 第287期 Face

美國又打風？集「 Wii體感」、「 NDS雙篤芒」兩大賣點於一身嘅任天堂新家用主機 Wii U， 11月 18號率先登陸歐美，美國遊戲網吹起一股強風，爆料任天堂唔夠零件起貨滿足需求， 18號推出日必定大炒。雖然寫文時未發售無法證明，但上美國 ebay𥄫 𥄫，原價 349.99美元嘅 Wii U黑機套裝，都 set到 900美元炒價！

ebay炒價 900美元

上 ebay睇吓市價， 32GB黑色主機，已經有人叫價 900美元（約$7,000）。問番香港 game鋪，唔少都話無法報價，因為根本唔知返唔返到貨來港，個人估計 Wii U黑機香港最少都賣$6,000。 

全球首創子母雙芒

呢部機點解咁爆？因為佢係全球第一部手掣有 touch screen，可以跟大電視子母芒互動嘅遊戲機。每部 Wii U附送一個 6.2吋體感觸屏手掣「 Wii U GamePad」（只可駁一部，其他 players用舊款 Wii remote pro手掣，但跟機 1支都唔包），支 GamePad有齊體感、篤芒功能，子芒跟大畫面互動性大，比如玩 FPS可當瞄準器睇目標，左右移手掣搜敵，子芒畫面會跟住改變。混合 Wii同 NDS兩種玩法，唔怪得行家同用家都寄予厚望啦！




截稿前，美國 game informer.com已經拎到實機，原來個盒有成 1.5個 Wii盒咁大。


手掣比想像中更巨型，單係子芒面積已經有如一支 PS3手掣。但就唔算好重（ 500g/iPad 4代重 652g），拎耐啲都唔會手痛。

購買貼士

買美版　多 game玩
買家一定要留意， Wii U美日版遊戲係唔兼容，暫時睇嚟美版唔只遊戲款式更多，甚至任天堂同其他日本廠，都係先出美版再出日版。個人就建議等到 12月出手，但一樣係揀番美版機。因為炒風一過，美版碟一般在港售價都比日版平$100左右，抵玩！






黑白色　唔同價
黑/白 WiiU主機唔只轉色咁簡單，黑機內置 32GB記憶體，白機就只得 8GB，雖然內置容量主要係配合外國先有嘅電影、遊戲網購功能，香港用家用唔到。但單係黑機送嘅《 Nintendo Land》光碟、主機企立架、手掣支撐架、手掣充電座已值回 50美元差價（港幣約$400）。

Wii U主機

處理器： IBM多核心 CPU、 AMD Radeon GPU
GamePad： 6.2吋 LCD觸屏（重 550g）
體積： 46× 172× 268.5mm/1.55kg
對應： USB2.0存取、 HDMI輸出、可另購 Wii Remote Pro手掣
售價：
黑機 32GB套裝$349.99美元（約$2,800）
白機 8GB套裝$299.99美元（約$2,400）

孖寶最新作 New Super Mario Bros.U

可 5人同玩，惟獨操作 Wii U GamePad的主玩家可用手掣子芒為地圖增加磚頭、開出隱藏秘道、捽死啲怪物。原來單打時，仲可以直接用手掣子芒玩，電視都唔使開。（ 59.99美元/約$450） 

跟機送必玩 Nintendo Land

呢款遊戲，用唔同手掣會有不同體驗，比如小遊戲「玩捉」，做鬼玩家拎 GamePad，喺子芒可睇清所有玩家位置。相反其他手掣玩家就睇大電視分割畫面，見唔到隻鬼喺邊！（跟黑色 32GB主機附送，單買 59.99美元/約$450） 

第三廠十卜 COD： Black OPS 2

剔除雙芒玩法， Wii U本身有 1080p高清輸出，配以 AMD Radeon圖像 GPU，足夠製作一般多邊形遊戲，如跟機推出之《 COD Black OPS 2》，來年嘅《 Bayonetta 2》《 Monster Hunters 4》，第三廠落力支持，唔怕買機齋玩任天堂 game。（ 59.99美元/約$450） 

性能全示範 Zombie U

一般情況下子芒係指南針地圖，埋身殺喪屍時，按住開槍掣升起 GamePad，子芒就會變成手槍瞄準器或透視鏡。同時亦對應埋 fing手掣劈友，係 Wii U性能示範作。（ 59.99美元/約$450）

奴 COMMENT

好想試雙芒美系射擊！
呢部機由去年 E3公布已經好想買，我自己都係喜歡美系遊戲，所以會揀美版機。跟機最想玩係《 Zombie U》，因為睇 YouTube見人用個手掣細芒當瞄準器，用 sniper槍做狙擊手一定好爽！另外仲想買埋《 COD》，佢可以 1P睇手掣子芒、 2P睇大電視合作，超正！ 

撰文：鍾世傑