設計主題是 modern classic，白色的皮梳化配上灰地氈，簡約之餘又富時尚感。單位裝修了三個月，裝修費一百萬。

私家居

當興趣變成生活

2012年11月22日 ~~ 第1185期香港《壹周刊》

每個人都有自己的愛好，如果能將嗜好、興趣融入家居設計中，仲有邊個鍾意躝街唔黐家。屋主陳小姐喜愛跳舞，希望隨時都可以在家中練習，設計師便將她位於西半山、一千八百呎的單位設計成舞蹈室，保留原有的木地板、再配上多面大鏡子，頓成私人排舞室。

鏡屋

從事電子行業的陳小姐喜歡跳舞，不介意家中有多點鏡子，於是設計師 Eric便想到將陳小姐這個跳舞的興趣融入室內設計中，「間屋最啱跳舞嘅地方係飯廳對出嘅位置，所以我喺玄關位造咗個大鏡。」除此之外，為了騰出更多跳舞空間，飯枱亦作出特別設計，四人的餐枱可縮小成二人餐枱。

樓齡三年的懿峰位於西半山，靜中帶旺。

木條子飾面的大型儲物櫃騰出空間作擺放陳列品之用，櫃子上下及每一層都安裝燈槽，營造燈光效果。

玄關位置兩邊裝了落地大鏡，跳舞啱晒。

飯廳的 jellyfish吊燈是 Eric設計， Pedrali長餐枱購自 Tint International Limited，跳舞時可縮細成 console table。

不過屋內清一色用清鏡，感覺奇怪，所以 Eric亦玩花款，例如餐枱後是條子鏡、書櫃用上灰玻璃櫃面、梳化後的牆、主人房床頭特色牆及廁所趟門則是夾絲玻璃加鋁鋼的設計，「夾絲玻璃加鋁鋼都有反光面，但唔似灰鏡、清鏡嗰啲完全照到嘢，反映出嚟嘅影像都好似照緊鏡，清鏡又太過單調，所以就用呢啲物料造番個特色牆身。」至於地板則保留原裝的木地板，「始終跳舞用番木地板會好啲。」

廚房以灰、白色為主，雲石枱面加卡撒灰牆身容易打理。

書房比較狹小，所以書櫃一邊是層架、一邊是全高設計，平衡空間感。

骰子擺設每個二百五十元。

時尚感

屋主是位時代女性，所以 Eric利用各種不同的物料作設計，令單位充滿時尚氣息。他利用卡撒灰雲石作為物料，為電視牆框加添幾分貴氣，鑲嵌的 LED燈在電視框邊滲透出微微的餘光，增加整體層次感；主人房顏色深淺不同的玻璃及鏡，都能塑造出時尚冷酷的感覺；利用黑、金的木飾面粉飾全高衣櫃，除了有足夠的儲物空間，亦呈現出摩登的感覺；至於客房則以 beige color為主，白色的木飾面房門及衣櫃，配以條子鋁鋼作為點綴，時尚感十足。

整間主人房主要以夾絲玻璃營造層次感，三萬五千元的大床及床頭櫃均是訂造。

鋼鋁製床頭燈配合房內主題設計。

善用空間

原來的單位是四房設計，不過屋主一個人住，所以 Eric便將其中兩間房拆牆打通，變成現在的書房及衣帽間，「屋主都幾多書，一邊造咗個全高嘅書櫃可以 for佢擺多啲書，另一邊就係特色玻璃飾面儲物櫃，減低書房嘅壓迫感。」 Eric亦運用小技巧，將 L形木書枱凌空架於窗台位置。另外，原本的衣帽間在主人房外， Eric將房門移前，這樣就變成一間有衣帽間的主人套房。
拆牆移門都是小兒科，最大的難度則在主人房， Eric說：「主人房電視機後、同埋床頭後都係窗，真係近到對面做緊乜都見到，另一邊就係廁所門，所以大床嘅擺位就有點兒困難。最後我哋揀咗景觀冇咁靚一邊、即係床頭一邊做咗 partition，平時閂埋就可以當一堵牆。」而電視機則造了一個矮身的屏風，主要用來擋着對面樓的天台位，「咁就可以望到遠景之餘，又可以避開個咁近嘅天台位，呢度望落去中環個景觀都好舒服㗎。」

主人房廁所保留原有發展商設計，但仍配合一屋的主題。

客房設計簡單，以捫布作床頭板，床單購自 Sogo。

衣帽間除了衣櫃，還特別造了一張可放置飾物的梳妝枱。