搵命搏救人
突然有人飛跌落嚟，青雲即跪低救人，全程冇替身，影帝果然夠專業。
媽咪姐
買千萬保險 劉青雲奪命騷
媽咪姐從來都相信「見微知著」，從小事就可以判斷一個人嘅品性。舉個例吖，高官犯錯，一有問題即 BMW（ blame my wife），卸晒落另一半身上。呢種「 gentlemen」風度，媽咪姐引以為恥，不提也罷。好在香港仲有個劉青雲。
大家都知啦，青雲不嬲錫老婆，係城中嘅模範老公。上周六（ 24日），佢憑《奪命金》首度封金馬影帝，大家估佢第一時間做咩？咪就係多謝老婆郭藹明囉。
未止呀！雖然青雲早喺香港封帝，但拍戲時一啲都唔錫身。前排佢為彭氏兄弟嘅 3D電影《逃出生天》到泰國拍外景，三十幾度高溫，着住件消防衫，焗死都未天光啦。佢仲要擒高擒低，被火燒被水淋被煙燻……唔好唔記得，青雲有「原發性高血壓」，佢咁搞法，可以話係搵命搏！
據知電影公司謹慎為上，早就為青雲買定份過千萬嘅保險。不過媽咪姐都係嗰句：小心駛得萬年船。你呢種又錫老婆又工作認真嘅男人，應該要裱起嚟俾班高官學習。
新戲《逃出生天》中，講飾演消防員嘅青雲要走上吊臂救人，在旁嘅李心潔、古仔睇到鬼咁肉緊。
青雲（箭嘴）因劇情需要，愈行愈出。雖然吊咗威吔，但都三層樓高，都幾驚險！
2008年 4月，青雲夫婦被拍得到中建大廈睇醫生。原來青雲有「原發性高血壓」，不但要定期 body check，更要小心調理身體，難怪拍危險鏡頭要買重保險。
劇組喺泰國一棟大廈外圍拍攝，演員喺三樓單位外準備，另有吊臂車駐紮，場面龐大。
劉青雲同郭藹明結婚多年仍恩愛如昔，早前金馬獎，青雲戲稱老婆為護身符。結果真係冇講錯，青雲終奪金馬影帝，佢更於台上公開多謝太太。
古仔帶傷上廣州
講搏命，其實唔止青雲。劇組攝影師先被燒傷，武指林迪安慘遭鐵通插親右腳。禍不單行，最近連古仔都遭殃，喺泰國拍攝時右手被玻璃割傷，之後仲傷埋左手。未夠時間休養，佢哋成班人即馬不停蹄上廣州繼續拍攝。
就本周二（ 27日），劇組 喺廣州珠江新城封街拍攝，除出動到十五部消防車，導演仲安排幾百名臨時演員扮消防員同傷者，場面浩大，製作認真。
雙手一齊傷
古仔早前喺泰國拍戲時，不慎被玻璃損右手，為免影響進度，佢叫導演繼續 roll機，待休場先搵醫生包紮。
由泰國走到廣州，又熱又凍，搞到古仔小腿皮膚爆晒坼，睇嚟要搽番啲潤膚膏滋潤下。
真消防員上陣
最無奈天公不做美，全晚落住微微雨，幾位主角加埋幾百位臨記消防員局住冧雨。
消防員以外，導演仲安排醫護人員在場。不過全部都係臨記扮嘅。
周二晚（ 27日），劇組喺廣州珠江新城取景。廣州市政府出動二百名公安，消防局亦出動 15部消防車同數十名現役消防員協助拍攝。
留言列表
