做娛樂圈,當然人人想紅,只是每個人走的路都不一樣。談到事業低潮、生活辛酸時,曹永廉(阿廉)沒有半點避忌,反而樂觀豁達地看待一切。對他來說,娛樂圈是個不斷磨練人鬥志的地方,若缺乏鬥志就隨時「玩完」。時至今日,未知他的鬥志還剩多少?他即微笑着說:「近排鬥志又高返啦!」看來《大太監》中的安德海不但為他帶來觀眾的掌聲,還帶來了鬥志呢。

撰文:Emily Tsui
攝影:Daima
場地:XD Cafe

做太監壓力大

太監安德海這個角色,是慈禧太后身邊大紅人,同時是李連英的好兄弟,戲分甚重。阿廉坦言接拍《大太監》時壓力非常大,因為安德海的性格很難捉摸,對不同人有不同態度,起初拍攝時甚至不清楚到底自己在做甚麼。他說:「初初知道有得拍真係好緊張,一來劇中演員個個都係高手,有祥仔又有米雪姐;二來自己好少拍古裝,加上我個角色好有機心,對白又多,所以都好有難度。」

雖然角色帶來的壓力頗大,但拍攝《大太監》卻給予阿廉無窮的歡樂。「其實我好開心,套劇反應好之餘仲贏埋友誼。識得祥仔的人都知佢好到加零一,米雪姐亦教我好多,仲有黃浩然、蕭正楠同陳國邦。我會不停問他們意見,討論一下點樣先可以做得更好,令大家漸漸成為好朋友。見到邊個做得好,大家都會拍爛手掌,個個都一樣開心,完全無私心。」《大太監》各演員之間的鼓勵,令阿廉慢慢投入角色,愈做愈好,由起初的緊張變為享受。

曾跌入谷底

眾所周知,阿廉當演員前曾經是個歌手,還出過4張唱片,可惜銷量不濟,即使曾經簽過不同的唱片公司,對歌唱事業都毫無幫助,最後阿廉被迫放棄做歌手的理想。他淡然的說:「我相信十個歌手有十個都認定自己一世都會唱歌,但到頭來條路行唔通都無辦法。」生活迫人,他唯有轉型拍電影,結果一拍便拍了20幾部,但全部都是大配角,角色沒有發揮空間之餘,片酬亦未如理想。

「其實初初拍電影時係好唔開心, 片酬低,又無知名度。 收得最平試過二、三千蚊一組戲, 雖然亦試過收萬幾蚊一組,但後來跌返落三、四千蚊,自尊心變得好強,心情好差。這個人生的低潮,令我發覺長此下去唔係辦法,只會愈做愈差,所以就諗不如返無綫發展啦。」在友人穿針引線下,他終於得到重返無綫的機會,不過換來的竟是每月3,600元薪金。「當時真係接受唔到,不過路係自己揀,唔想輕易放棄,所以就繼續行落去。」

高峰曇花一現

阿廉重返無綫後,事業繼續波折重重,99年的首部劇集《雙面伊人》便撞正《還珠格格》,十分運滯。他更坦言當時曾欠下銀行近6位數字卡數,根本無法還清。「其實條數一直都還唔晒,好手緊,但我一直有個信念,就係入得呢行,我終有一日一定可以還得清!雖然《雙面伊人》反應真係麻麻,不過都起碼坐穩個位先,就係咁坐吓坐吓就做了13年。」

阿廉在無綫10多年的演藝生涯中,其實不乏小高峰,而《妙手仁術》中的角色向眾仁,就為他帶來事業上的第一個高峰,工作機會接踵而來,卡數債務終在數月內一次過還清。可惜高峰過後,阿廉的人氣又再度回落。

「我以為終於可以翻身啦!點知又沉寂了幾年,2010年時,有監製肯收留我做兒童節目,勉強可以生活。我唔係話睇小兒童節目,但我目標係想拍劇, 所以那段時間非常之失落,不過都好感謝當時有呢個機會,至少唔需要為生活擔憂。」

數年後,阿廉在曾經紅極一時的劇集《戇夫成龍》中擔演第二男主角。他一心以為藉着該劇的人氣,自己的事業亦能蒸蒸日上,豈料該劇播出數月後,竟有監製找他在新劇中扮演大閒角衙差。他不禁慨嘆:「《阿旺》咁收得, 大家都應該有留意到我啩?點解到頭來我仲要做衙差呢?」

為仔女努力

多年來在娛樂圈浮浮沉沉,阿廉直言曾經心淡,亦想過放棄。「老實講,其實都累積唔少怨氣,我唔係眼紅其他人有機會, 只係想自己有多些工作量。曾經有人同我講過我做得唔差,既然唔差點解又唔畀機會我?」

後來,他明白到公司規模實在太大,根本沒可能照顧到所有員工,從此就學會靠自己。「咁多年來唯一可以做的,就係從來唔遲到,仲有熟讀劇本,唔會麻煩到人,希望咁樣可以贏口碑,得到監製的賞識。我好衷心感激曾經畀過機會我,欣賞過我的所有人。」

阿廉和太太姜依蘭結婚5年,一對子女出生後,家庭開支大大增加,經濟上難免逐漸出現壓力。阿廉坦言:「我唔係想賺大錢,只係想三餐溫飽咋!」去年,其太太更辭去高薪厚職,雖然令阿廉的擔子百上加斤,但他卻反而大拍手掌叫好,「雖然太太以前份工好高級, 收入比較穩定,但成日要早出晚歸。而家自己搞生意雖然比以前賺得少,但反而有多些時間同仔女相處,好開心,所以係值得的。」

雖然暫時未能賺大錢,但他表示只要有機會拍劇就已感滿足,對於近日鬧得滿城風雨的頒獎禮提名,阿廉坦言:「有冇獎冇所謂,有機會搵多點錢仲好啦!」在圈中打滾多年,早知道頒獎禮只是遊戲一場,與其分豬肉獎,倒不如期望公司畀多些演出機會更好。

曹永廉

曹永廉

曹永廉

曹永廉
” 路係自己揀,唔想輕易放棄,所以就繼續行落去。”

曹永廉
” 咁多年來唯一可以做的,就係從來唔遲到,仲有熟讀劇本 ”

曹永廉

曹永廉

曹永廉

創作者介紹
創作者 tvblife 的頭像
tvblife

TVB娛樂八掛週刊雜誌大分享☆

tvb4life 發表在 痞客邦 留言(0) 人氣()