古明華重燃鬥心 下一站主角

古明華憑「蘇基」一角人氣急升,更被提名今屆「最佳男配角」,入行18年的他坦言對演戲亦有「得過且過」的時候,不過當他想起廖偉雄於《網中人》的「阿燦」角色時,就會有動力繼續努力奮鬥,希望學對方由配角變主角。



古明華今年有份角逐男配角獎項,信心十足。

古明華(古佬)憑無綫劇《巴不得媽媽》的「蘇基」名利雙收,除有份提名今屆「最佳男配角」,更在無綫每年焦點製作《節目巡禮2013》等節目擔任重要角色。雖然地位突然升呢,但古佬不擔心「蘇基熱潮」過後會打回原形。他謂:「雖然我係突然爆出嚟,但我唔覺得係神來之筆,我一直都係咁做,係用經驗累積番嚟,而且我唔覺得以前生活可怕,我亦都有信心迎接以後每一個新挑戰。」


古明華化「蘇基」妝時非常認真,工作態度專業。
視阿燦為目標

貴為視帝級人馬的黎耀祥當年曾自批這輩子都不能成為主角,但祥仔證實了「冇嘢係冇可能」。問古佬想不想成為下個黎耀祥?他說:「其實如果我覺得可以做主角,好大部分都係因為幾十年之前廖偉雄喺《網中人》入面飾演『阿燦』呢個角色。雖然初初只係一個咁side cast嘅角色,但最尾時佢係可以行到去主角個位,去到一線,而且『阿燦』呢個名到依家講出嚟,人人都知係代表大陸嘅一個icon,所以我覺得每一個演員做任何一個角色都應該要好努力,唔好浪費手頭上已經有嘅機會。」

欣賞前輩熱誠

影帝級人馬梁家輝曾透露當年在TVB做「茄喱啡」時,經常設計一些動作令自己突圍。問古佬有否試過這樣做?他說:「我一直以來都冇咁諗,冇話要做啲嘢嚟特登搶鏡,我會覺得個角色需要先會咁做,為個戲而出發,唔會齋為自己。不過講真,唔係咁多人肯為角色而做咁多嘢,好多人都只係當返一份工咁,冇熱誠。我自己有段時間都係咁,得過且過,交行貨就算。」他很欣賞前輩汪明荃、鍾景輝和黃日華等,多年來對演戲仍充滿熱誠,除了真心佩服,還重燃他心中那團火。

文:影視組

創作者介紹
創作者 tvblife 的頭像
tvblife

TVB娛樂八掛週刊雜誌大分享☆

tvb4life 發表在 痞客邦 留言(0) 人氣()