叉燒拉麵$85

尋澄味

日本人的 BEST BUY　長浜 No.1拉麵

2012年12月07日 ~~ 第906期飲食男女

連串密集式的紅色炸彈，俾人情都俾到窮，相約舊同學一齊去飲宴，那些年 friend過打 band的當然要逼埋一枱，既可避免悶到瞓着，又可以婉拒「重批盪」的姊妹自拍高炒集郵照，更可以在入席前齊齊搵嘢食頂肚。
一班麻甩佬用微信密密傾，相約在開席前到中環食拉麵。香港地日本拉麵店的比例，已經接近日本賣波鞋的 ABC Mart，密集程度遍佈各區。九如坊的長浜 No.1，開業未夠半年，由 Leslie和她的日籍夫婿 Yama San由日本帶到香港。祖籍東京的 Yama San，自小愛食拉麵，由老家東京食到福岡，最愛就是長浜 No.1。

要打動固執的日本老頭到香港開分店並不容易，不過緣份來到誰也擋不住。他們在福岡長浜 No.1的屋台總壇，巧遇了名字同樣叫 Yama San的麵店師傅並為他們穿針引線。這位噸位十足、外形似足「功夫熊貓」的拉麵達人來自福島，原來又是麵癡一名，在老家做了幾年拉麵師傅，卻因為一次被客人「詐型」所煮的拉麵不知所謂，毅然劈炮去尋找最完美的拉麵。
揹背囊搭火車去到長浜 No.1拜師學藝，卻被老闆一口拒絕，流落在福岡用盡盤川食勻所有拉麵，電波拉麵男的事迹，最後感動了老闆收為入室大弟子。
兩位 Yama San一齊煮麵，吸引了大量居港日人：料理課長、企劃社長、卡娃兒少女、代表取締役、電車癡漢，通通去捧場。自幔的叉燒拉麵，豬骨湯底濃而不膩，蛋味強勁的半熟蛋，加上幾片半肥瘦叉燒，配吸湯的幼滑麵條，完全倒模了 JR旁邊拉麵車仔檔的日本屋台風味。大量一味粉和麻油爆炒的芽菜任食唔嬲，非常爆辣，是很多麵癡送麵的一級選擇。
比拉麵更限量供應的叉燒丼超受歡迎，煎到燶燶哋的半肥瘦叉燒，拌大量京葱已經肯定勁好送飯，最攞命還要加入醃半熟蛋的醬油撈勻，相信加藤鷹食完都要放下中指，直豎拇指。
除了拉麵和丼，晚市還有送酒小食，爽口銀芽炒肥美叉燒，肯定是珍珠米白飯的最佳拖友。腐皮福袋的出現，原來是兩位 Yama San在處理廚餘的小發明，脹卜卜的腐袋，一客三件，分別塞滿銀芽和雞蛋，另一個則塞爆了極重口味的納豆。炸得乾身的雞翼，原來是香港分店的別注版，經過悉心的骨幹移植手術，最終成為了單骨雞翼，簡單好食，是減肥 OL的公敵。

腐皮福袋$35

叉燒飯$50（大）、$28（小）