Beauty Hunt
我的歌聲裡 周美欣
當初因為 auntie一句「去選港姐玩吓識吓朋友」， 07年由加拿大放暑假回港的周美欣 Lori無心插柳下參加香港小姐，得到季軍外，亦憑 5呎 9吋 S身形贏埋「魅力美腿大獎」。
Lori初入行拍過劇集，其間發覺自己鍾意唱歌多過做戲，喺無綫捱咗 3年約後便決心出去闖，成為林建岳寰亞唱片旗下歌手，今月 2號推出個人首張 EP，星夢達成。
Lori說︰「唱歌有人讚，做戲反而冇！」有啲嘢勉強真係冇幸福。
Lori在加拿大讀書，每年暑假都會回港放假，選港姐原因例牌係因為 auntie叫，她說：「嗰時聽 auntie講先去參加港姐，心諗住自己年紀仲細，咪去玩吓當見識吓，自己攞咗季軍，講真又唔覺有啲咩興奮嘅感覺，後來先決定喺呢行發展，要留喺香港生活喎！」
去年 5月，爆出 23歲女星錄音室被醉姦一事， Lori有份捲入疑似受害人名單中，她澄清：「其實完全唔關我事，只係受害人資料同我太相似，自己去錄音室通常都係正常時間，唔會半夜三更，仲有埋同事一齊上去。」
07年 Lori參選香港小姐，奪得季軍和「魅力美腿大獎」，應屆冠軍和亞軍分別為張嘉兒和王君馨，其後三人還成為好朋友。《蘋果日報》圖片 
Lori於 05年參加《 TVB8全球華人新秀歌唱大賽》，得到「時尚形象大獎」，並由李玟親自頒獎，始終唱歌先係佢強項。《蘋果日報》圖片 
Lori於 10年加入寰亞唱片成為旗下歌手，本月 2號更推出個人首隻 EP。
港姐變歌手
在無綫只留了 3年時間，就決定離巢兼轉行做歌手， Lori興奮地說：「其實自己 05年參加溫哥華新秀歌唱大賽攞咗個冠軍，之後識咗啲寰亞唱片公司嘅同事，喺傾出唱片嘅時候，我走咗去選港姐，仲要唔知有 1年藝員約；加上自己學唱歌仲早過學做戲，唱歌有人讚、做戲反而冇，所以之後就決定做歌手。」
Lori現時為寰亞唱片旗下歌手，本月推出個人首張 EP，同時又到廣州參加《麥王爭霸》歌唱比賽， Lori說：「之前國內啲觀眾認識我，係因為港姐身份，所以參加呢個歌唱比賽，等佢哋知道我𠵱家已經係歌手喇。𠵱家啱啱入咗 12強，好開心可以俾評判之一嘅肥媽讚我，平時俾人讚都冇咁大感覺，但係台上以參賽者身份俾人讚法，我真感動到喊！」
為洗甩港姐味， Lori專登參加內地歌唱比賽《麥王爭霸》，現時成功晉升 12強。 
Lori當選港姐後不單拍過電視劇， 09年還拍住影帝黃秋生、吳鎮宇和謝天華拍攝《 Laughing Gor之變節》，戲中飾演秋生其中一個女友。
Profile
Name：周美欣 Lori
年齡： 25歲
身高： 5呎 9吋
facebook專頁：周美欣 Lori（粉絲人數 139人）
Weibo：周美欣 Lori（粉絲人數 4,089人）
Instagram： Lowwie（粉絲人數 7,585人）
撰文、採訪：張志威
攝影：范仲良
化妝： Jessica Chow
髮型： RENTON HUNG@VIA IL COLPO
形象： Bryan@the Flaming
服裝： Lily Brown
留言列表
