GaGa喺 twitter上載萬聖節造型相，佢仲話自己係「大麻女王」。事實上佢當晚好入戲，迷幻 chok樣由頭 keep到尾。
出外埠
怪誕荷里活
一年一度嘅萬聖節過咗一個禮拜鬆啲，但寶物沉歸底，好多造型特別嘅藝人狂歡之後，陸續將當晚嘅相上載上網，就等媽咪姐同大家數吓邊個最搞鬼。
夾都冇咁蹺
Lady GaGa同天后 Rihanna兩個都出名形象百變，照道理好難撞衫，之不過萬聖節當晚，兩人不約而同性感綠色裝束上陣，仲要夾都冇咁蹺，齊齊以大麻做主題。哎喲，撞衫事小，教壞細路事大。兩個國民偶像，生性啦！
Rihanna一身綠色新娘打扮，手持嘅花束跟大麻相似，認真教壞人。
最和諧/河蟹
《吸血新世紀》玉女姬絲汀史釗活早前偷食，幾乎被男友羅拔柏迪臣狠撇。難得箍得番愛郎，姬絲汀梗係攬實男友過一個恩愛萬聖節。
至於姦夫導演 Rupert Sanders亦一家大細扮鬼扮馬，似乎同太太和好如初咁話。不過究竟係真正和諧定製造和平假象，媽咪姐就不得而知嘞！
成功翻撻愛郎嘅姬絲汀一頭粉紅假髮，拖住羅拔進場，兩人不時喁喁細語，恩愛如昔。
偷食導演 Rupert（左）同老婆、囡囡一齊出動扮鬼扮馬，表面上都恩愛如昔嘅。
最可愛溫馨
珊迪媽嘅牛女同囝囝 Louis嘅巴斯光年造型雖然唔算好特別，不過溫情分搭夠， cute到暈。
影后珊迪娜布洛領養嘅黑人 BB Louis，不經不覺已經大個仔，萬聖節更同媽媽去玩 trick or treat。當日兩母子以《反斗奇兵》角色為藍本，媽媽扮牛女 Jessie，囝囝做巴斯光年，絕對啱 feel又溫馨。
最飽飽滯滯
Christina肥到撐爆件衫，難得佢唔知醜，提起象腿扮可愛。
做人呢，最緊要有自知之明，近日肥到一 pat嘢，被大家彈佢逼爆舞台嘅 Christina Aguilera，竟然罔顧大眾安全，以極暴露裝束展示一身肥肉，勢要唔嚇死你，都滯死你！ 
全站熱搜
留言列表
