5時許到場的祖藍和李亞男即時被教友催婚，李亞男笑得好甜，祖藍就死都唔肯透露半句。
拍拖 3年半， 5呎 3的王祖藍和 5呎 9李亞男長短腳戀發展穩定，近年密密做搵落不少的祖藍，驚爆最近一炮過畀 1,500萬於西貢買下千呎地皮做地主，金屋於明年初動工， 2年後祖藍正式迎娶李亞男。
週日（ 11日），祖藍帶埋女友同阿媽出席李彩華生日 P，順便向富婆兼寰宇前老闆娘趙雪英打聽行情，踏入趙位於九龍塘的 5億大宅，祖藍一家三口變身睇樓團，祖藍媽睇到嘩嘩聲，李亞男更興奮得拖住未來奶奶通屋走。據知，近日祖藍終於向身邊友人承認，今年得了傑青，對自己已有交代，現時只等 2年後起好金屋，就是結婚的好時機。
自與寰宇老闆林小明離婚後，趙雪英成為地產界富婆，香港和國內共有 15個物業，身家暴脹，除了李彩華，不少想置業的圈中人都主動向趙雪英探路。
拖實王阿媽
祖藍媽同個仔成個餅印，突然現身大屋，李亞男拖實未來奶奶睇豪宅，順便為新屋裝修搵吓靈感。
3層別墅
週日（ 11日），趙雪英借出位於九龍塘，市值 5億的 20,000呎兩層豪宅，讓李彩華在下午舉行受洗儀式，晚上則到屋內舉行 BBQ生日派對，不少教會好友都有出席，而教友之一的王祖藍，當日刻意與女友李亞男分開到場，而祖藍媽更秘密入屋，記者目擊她於派對開始前，與趙雪英密密斟，祖藍媽不停大讚屋內的間格，她說︰「呢度又大又實用，真係好好。」
消息指，幾個月前祖藍跟趙雪英一樣做了地主，雖然未買得起九龍塘的地皮，但祖藍卻於西貢買下一塊千多呎的地皮，入市價約 1,500萬，初步計劃是興建一幢三層高， 2,000呎連花園的別墅。
李彩華前老闆娘教路
睇樓團
趙雪英知道祖藍買地皮起屋，專登帶佢同李亞男上 2樓參觀主人房。
祖藍同趙雪英返同一間教會，個個星期都見面，知道趙雪英手上咁多物業，唔怪得要請教一下。
藍藍餵包 男男怕醜
李亞男嗌肚餓，祖藍即刻拎件鵝肝多士，仲餵埋女友食，不過李亞男見到記者鏡頭就即刻掩面，使唔使咁怕醜呀？
400呎廚房
祖藍媽一入約 400呎的廚房，嘩 咗 3聲，又大讚夠寬敞，仲可以 5個工人同時間煮飯添！
兩年建 5億大宅
趙雪英購入位於九龍塘的地皮後，拆掉本身逾半世紀的舊宅，重建兩層近 20,000呎的獨立屋。豪宅有 3間千呎主人套房，另有迷你電影院和泳池，足足裝修了 2年，大宅才告落成。
升價 12倍
趙雪英的獨立屋位於九龍塘豪宅地段，購於 03年沙士時期，當時作價 4千多萬，現已升值為 5億，去年有人出價 4億幾想買，但因為一對仔女好鍾意間屋，最終唔肯賣。
見 B唔放手
見到 BB仔，李亞男抱住唔放，快 啲拉埋天窗，同祖藍生番個啦！
2年後結婚
有指祖藍媽曾經營車仔麵檔，所以她最重視廚房，反而李亞男對趙家的麻雀房最有興趣，而祖藍就跟着兩個女人四圍巡視。
不少教友一見到祖藍和李亞男，都催促他們快些結婚，李亞男一聽到就笑到見牙唔見眼，冇 say no，不過祖藍就大耍太極，他說︰「未有耐、未有耐。」
據知，祖藍與李亞男已有計劃，新屋明年初開始興建，約 2015年初完工，到時便正式迎娶李亞男，記者聽到祖藍跟趙雪英說︰「新屋一家人住囉。」未入門，李亞男早已被視為一家人。
周圍睇樓
除了祖藍媽， Rain媽當晚亦有詢問趙雪英的行情。這次回港， Rain在跑馬地看中一個 1,000呎連平台的樓盤，不過趙雪英叫 Rain找另一間大一點才入市，以作收租之用。
本刊問趙雪英兩位星媽是否追擊樓市，她直言她們有向她請教，她說︰「 Rain媽每次入貨都有問我，祖藍媽就第 1次，好似搞得八八九九喇！（祖藍係咪起樓結婚用？）咁就唔知喇，你自己問佢啦，不過佢自己有朋友幫佢搞裝修，呢 啲就唔使我介紹。」
週一（ 12日）記者聯絡正為新專輯拍封面的祖藍，問他是否買地結婚，他初時以 WhatsApp鬼馬回覆，「我想買起晒成個新界東北呀，哈哈哈！」後來記者追問，是否準備結婚，他先正經說：「有諗過置業，冇諗過結婚，周圍睇樓，樓花都有睇，唔關趙小姐事，佢啲樓我買唔起，我有好多地產朋友。我冇買地呀！乜都未睇啱，只係睇吓樓咋大佬，咪嚇鬼死我啦！」
李彩華受浸生日 P
寰宇老闆林小明與前妻趙雪英的離婚案，有指李彩華在合約期間，被要求合約以外的工作。李彩華多年來一直得前老闆娘趙雪英支持，更一齊信主，週日（ 11日）趙雪英更請來牧師，借出大宅泳池讓 Rain接受基督教浸禮儀式，趙雪英女兒 Phoebe更把自己的房間，借給 Rain做臨時化妝室。
浸禮儀式之後，趙雪英準備 BBQ派對，為 Rain慶祝 29歲生日，一班名人教友更送了 10萬元的鑽石十字架給 Rain做生日禮物， Rain向記者表示︰「單官司（被林小明控誹謗）冇影響我心情，我只係講事實，前一晚都有朋友幫我搞生日。」
留言列表
