上周五（ 3日），林子善與合夥人在舖內打點。該舖前身是糖水舖，他透露慳皮翻新冰室計劃：「裏面裝修都算新淨，轉一轉牆身顏色就 OK，枱櫈可用番，唔使大改慳番筆！」
娛聞樂
拒做無綫親生仔 林子善開冰室發圍
林子善在《怒火街頭 2》飾演為人正直但傻頭傻腦的米佐治，啱晒一眾師奶口味，與 98年跟隨周星馳拍《喜劇之王》的「洪爺」相比，爛仔形象洗得乾乾淨淨。
霉足 14年，如今成功入屋，無綫當然想將林子善私有化，最近以高薪利誘林子善簽經理人合約做「親生仔」。不過林子善一口拒絕，原因是他不想「打完齋唔要和尚」，飛起共患難多年的經理人。
放棄簽無綫，拍劇機會自然買少見少，林子善惟有另覓出路搵真銀。最近他豪擲五十萬，與友人合資搞冰室，邊個話講義氣冇發達！
林子善一直以部頭形式與無綫合作，拍過《鐵馬尋橋》及《怒火街頭》系列等劇集之後，形象討好入屋。據知無綫希望能招攬他為親生仔，增強二線小生陣容。「早前樂易玲（製作資源部總監）搵過林子善傾經理人合約，話佢嘅戇直形象，喺藝員之中較少見，有好大空間發揮。如果佢答應，加人工唔在講，更會考慮俾個台慶獎項佢。」知情人士說。
向經理人報恩
林子善亦深感 TVB條件吸引，但礙於有位一直跟自己共患難多年的經理人 Carol，所以最終決定婉拒 TVB。「林子善拒絕 TVB，唔係吊高嚟賣。因為喺佢最霉嘅時候， Carol對佢好照顧，四圍撲幫佢搵 job。近呢一兩年子善工作量叫做多咗， Carol至搵得多啲，所以佢唔想咁快簽 TVB，當係對 Carol報恩囉！」
林子善婉拒做 TVB親生仔，故拍罷新劇《雷霆掃毒》之後，無綫就再未有新工作安排。現時其經理人 Carol惟有盡量替他接內地劇和打碟登台騷，而林子善亦主動在香港另覓出路。
在《怒火街頭 2》飾演法官的林子善，為配合戇直形象，刻意將髮型弄到「薯嘜」效果，與兩位同劇兄弟鄭嘉穎、李璨琛造型分別好大。
林子善 09年拍《學警狙擊》與苗僑偉特別投緣，二人在新劇《雷霆掃毒》再度合作（圖），之後無綫再未有為林安排工作。
新舖開張忙打點
近日他跟友人在大坑租下一個近 500呎的空置地舖，打算合資搞冰室。上周五（ 3日）下午，記者發現他踢住人字拖到新舖打點，檢查店內水喉及冷氣系統，巡視約半小時才跟一名友人離開，不過就未見其拍拖多年的黑妹女友蹤影。
對於開冰室進軍飲食業，事後記者致電林子善，他說：「始終想為自己搵多條出路。依家興番傳統冰室，嘢食選擇唔使多，最緊要個通粉好食，炒蛋夠香。我同朋友都有門路請到好師傅，所以夾份拎咗成百萬，貪呢一帶多食肆夠晒旺場。嚟緊 20號會開張，呢幾日都會好忙。」再問到無綫希望簽他為親生仔一事，林坦言：「無綫係有同我傾經理人合約嘅事，但我唔會咁衰仔踢走 Carol，我做唔出。呢件事我都問過大哥鄭嘉穎點處理，佢話做咩決定都好，總之唔好反骨！佢呢一句我明白晒！」
為此記者亦曾致電樂易玲，她透過短訊表示，現正於倫敦放大假，不便回應。不過，林子善義氣大過天，相信樂小姐同 Carol都會收到。
林子善間冰室位於大坑食肆集中地的浣紗街，喺正 7仔隔籬，月租約九萬。當日他在店內執拾半小時，更親自拿起掃把清理門外垃圾。
林子善認識浣紗街一帶的街坊，當日鄰近食肆阿姐專誠來搵佢打牙骹。
林子善透露有意與相戀多年的女友結婚，做個有膊頭有腰骨的男人。其實他不用開工時，經常與女友十指緊扣行街拍拖。
與經理人共患難
30歲的林子善星路並不平坦。 98年 16歲時憑《喜劇之王》飾演洪爺一角彈出，可惜跟隨星爺好幾年並無發揮機會。 06年得到曾志偉賞識，加入 Star East，由經理人 Carol（上圖）安排工作。
林早於《喜》片年代已認識 Carol，所以一拍即合，不過他加入 Star East後，形象依然停留在「洪爺」階段，不太討好。子善講起當年亦不禁欷歔：「嗰陣 Carol好出力幫我，不過冇乜人騷我。嗰陣好多人話我唔掂，但佢冇放棄我，叫我北上頂住先，最緊要有飯開。」就是經過這段艱難日子，林子善跟 Carol建立了深厚友誼。
林子善 16歲與周星馳、張栢芝拍《喜劇之王》，飾演黑社會洪爺， 14年後依然有人叫佢洪爺，就知當時幾巴閉。
黃子華欽點角色
未拍《怒火》前，林子善工作量唔多，為了維持生計， Carol安排林以「香港藝人」身份北上打碟，渡過難關。
直至 08年，林子善得到黃子華「欽點」做無綫劇《奸人堅》的金錢豹角色。「子華當時搵我，講明呢個係下把角色，問我制唔制，我即刻問 Carol意見，佢話呢個係黃金機會，更加要出力演。之後我喺 TVB就開始有運行，我有今日成就要多謝 Carol。」
對於林子善拒簽無綫做親生仔，經理人 Carol表示：「我同子善有晒共識，依家合作得相當愉快。當然我都想佢有好發展， TVB真係幫佢好多。」 
留言列表
