TVB娛樂八掛週刊雜誌大分享☆

中國3D數碼娛樂（8078）今年重頭戲《一路向西》，首六日已經獲得過千萬票房，成績算有交代。不過，套戲播出冇耐，已經收到投訴，惹上麻煩。

話說戲入面男主角張建聲同配角王宗堯扮學生，着校服睇鹹書同三仔，又喺屋企幻想日本女優喺電視爬出嚟，然後跟佢哋慾仙慾死，場面都好震撼。殊不知有人認出，男角着嘅，竟然係「九龍塘學校」中學部嘅校服，呢間係Band one學校，校長知道後當然大發雷霆。

蕭定一畀名校校長投訴，佢一於好少理。

《一路向西》票房過千萬，成績唔錯。

聽聞校長即時去信蕭定一間公司，大興問罪之師，質問點解未有學校批准，就用咗佢哋套校服。校長又大吐苦水，話畀家長打去投訴，今次真係畀中國3D 數碼累死，嚴重影響校譽。

雖然玩大咗，但蕭定一好少理，仲拎咗以香港有出版、發行自由做擋箭牌。校長聽到後都無佢符，只好激到「生蝦咁跳」。

不過話時話，中國3D數碼娛樂舊年四月推出《肉蒲團之極樂寶鑑》，股價曾炒高至五毫幾，但落畫後股價蒸發逾八成。命運同樣發生喺《一路向西》身上，今年取得該原著版權時，股價由七仙炒高到近一毫五仙，之後已一路向下，到新片上畫冇耐，更跌到得仙四咋。

戲入面男角個校徽跟九龍塘學校校徽一模一樣。