西面
Blake Lively 3P教主
兩個月暑假話咁快就完。
今年暑假電影檔期，就由新一代荷里活性感女神、美劇《花邊教主》主角 Blake Lively主演嘅《偷天毒犯》壓軸。
《偷天毒犯》一聽個戲名就知係犯罪片，暴力場面唔少得，不過最吸引一定係 Blake Lively嘅豪放演出，戲中教主唔只隊草，至激係玩埋 3P，更慘遭凌虐。
教主一鋪過晒冷，簡直係從影以來最大膽一次。
《偷天毒犯》
上映日期： 8月 30日
改篇自美國著名犯罪小說作家 Don Winslow同名小說嘅《偷天毒犯》，故事講男主角 Taylor Kitsch、 Aaron Johnson同女主角 Blake Lively 2男 1女，原本以種植大麻維生，但之後被販毒集團收購，為迫兩男就範，集團不惜綁架 Blake做要脅，最後激發一場大廝殺。
要食鎮靜劑
憑美劇《花邊教主》和《 Gossip Girl》上位嘅 Blake，話就話係女神，但喺《偷》片中完全唔錫身，除跟 Taylor Kitsch同 Aaron Johnson上演大量性愛場面，被綁架時更慘遭毒犯虐打同欺凌。講到性愛場面， Blake就話睇過小說，覺得角色有得發揮，所以唔介意有大膽演出，但一提到拍凌虐場面就表示勁驚：「可能我太入戲，被班男人虐打時真係嚇到喊，之後仲經常發噩夢，搞到要食鎮靜劑。」 Blake唔只演技，連講嘢都咁誇張。
至於電影公司點解搵 Blake做女主角？唔係因為佢演技好，原因係上年電影公司諗住搵 Jennifer Lawrence擔正，點知佢嫌角色太過大膽，寧願拍同期開拍嘅《飢餓遊戲》而推戲，最後因 Blake咁啱有期，之後就頂替 Jennifer做女主角，即係執二攤囉！
水戰露股
戲中， Blake雖冇露三點，但同男主角 Aaron Johnson喺浴缸激咀時，半個八月十五露出， sexy到暈。
勁食波餅
濕身戲夠激，床上戲亦唔輸蝕，同另一對手 Taylor Kitsch纏綿時， Blake仲將個頭黐貼對方胸部，男人波餅一樣照食。
兜面噴煙
被毒犯 Benicio Del Toro綁架後，迫供時 Blake慘被二手煙兜面噴，睇見都戥佢可憐。
綁口綁手
Blake做人質時，唔只被扯頭髮凌虐，最可憐係被綁口兼綁手嘅情況下，被迫要喺沙漠四圍走，我反而有興趣想知佢點解走難都要着小背心晒身材。
Blake主動求婚
上年同里安納度狄卡比奧甩拖後， 24歲 Blake Lively即搭上合演《綠燈俠》拍檔 Ryan Reynolds，雖然 Blake換過唔少次男友，但據知 Blake𠵱家已定性，唔只認定 Ryan係 Mr. Right，仲打算主動向 Ryan提出結婚，希望綁實呢位曾被《 People》雜誌封為「全球最性感男士」嘅荷里活型男。
Blake唔只想同現任男友 Ryan結婚，佢仲想為對方生仔，所以最近積極增肥，希望養好身體「造人」。
上年 Blake同前男友里安納度經常被影到行街拍拖，但有傳里安納度因控制慾強令 Blake頂唔順，最後提出掟煲。
留言列表
