○五年香港先生選舉冠軍高鈞賢，在奮鬥演藝事業的同時，原來一直希望開設教育中心，教導未來的社會棟樑建立自信與良好的溝通技巧。今年八月，高鈞賢終於如願以償開設「STEPSTAGE表演舞蹈皇家藝術學院」。

該學院不僅為小朋友發掘潛力和無限的創造力，並提供一個學習的平台，引領孩子們逐步前往更廣大的舞台，他說：「之前有個中電廣告，我推薦咗三個學生去試鏡，全部中晒，所以喺呢度學嘢，除咗有證書攞得番之外，仲會有試鏡同演出嘅機會。」

該藝術學院着重自小培養小朋友「相信自己」的觀念，進而帶領他們建立日後實現夢想的信心和毅力。

高鈞賢於今年八月，於紅磡海逸坊開設「STEPSTAGE表演舞蹈皇家藝術學院」，以西式教育方法，發掘小朋友的無限創意。

提高溝通力

參選港男奪獎後的高鈞賢，隨即加入無綫兒童節目組，接觸到不少小朋友，因而奠定了日後開設教育中心的目標，「我覺得小朋友如果經常都接觸到唔同嘅人，就自然唔會咁怕醜，仲識得點樣同人哋去相處、溝通。特別係透過一啲演出，例如：跳舞、戲劇，小朋友嘅自信心都會得以確立，所以我開呢一間藝術學院，就係希望小朋友可以透過學習、演出，甚至喺排練嘅過程，增加同其他人互動嘅機會。」

該學院也有playgroup班給予兩至三歲的小朋友參與，但規定不能有家長陪同上課，目的就是要讓小孩子學習獨立、訓練膽量，高鈞賢解說：「呢啲班限制得五個小朋友上堂，我哋安排咗多位老師照顧住佢哋，就算佢哋上堂時喊都唔怕，其實家長唔喺身邊，佢哋先可以學到獨立。」