螢幕上的King Sir鍾景輝，無論角色性格是頑固不堪，還是開通明理，總是觀眾心目中一位親切的老人家。螢幕下，即使他是香港舞台劇界、影視界或學術界中受人尊敬的戲劇大師，但他依然沒有把自己放得高高在上。

「『戲劇大師』？唔好咁講。呢個名號，其實都係七十年代，我喺電視台做做吓嘢，間中幫佢哋搞吓啲話劇，佢哋為咗宣傳定係乜嘢，先安畀我咋嘛，哈哈哈！我都只係盡自己努力去做嘅啫。」

事實上，今年七十五歲的他，由大學選科，至幕前幕後和提攜後輩的工作，都離不開跟戲劇和電視廣播有關。○一年屆滿退休之齡後，他的興致還沒有減，繼續拍電視劇，繼續演出舞台劇。

「如果我真係退咗休、冇嘢做，又冇人搵我拍戲、做舞台劇嘅話，我會覺得好鬼悶o架！」聽起來猶如一般長輩退休後搵細藝過日辰，然而他的「細藝」卻令他獲得「銅紫荊星章」、「最佳男主角獎」和「終身成就獎」等榮譽——

King Sir，King Sir，他確實受得起這個「王者」暱稱有餘。

四海為家

沒幾多人知道，King Sir是在泰國出世的。「我太公係台山人，做船塢生意，結果去咗泰國曼谷落腳，我阿爺、爸爸都喺嗰度出世，不過我爸爸十歲左右就返嚟廣東讀書，一路讀到大學畢業，之後喺上海識咗我媽媽，結咗婚，返去泰國見佢老竇嗰陣，我就喺嗰邊出世。到我兩、三個月大，我爸爸唔鍾意留喺泰國，就返咗嚟香港喇。」

回港後沒多久，遇着中國抗日戰爭，他雖然隨着家人四處走難，但童年還是過得很快樂。「我哋住過上海、安徽省、南京。其實我自細已經好鍾意做戲、扮呢扮路，成日喺後花園度做戲畀啲街坊睇，亂咁做一通，叫做有啲表演慾；喺幼稚園，先生搵我去扮羊咩仔、扮聖誕老人，我都覺得好有樂趣、好好玩！

於中大崇基讀書時，他（左三）曾是短跑健兒。

「到我八、九歲左右，我喺上海住，又成日自己去買兒童飛睇話劇，啲人話三歲定八十，我覺得真係有啲理由o架！哈哈！」

到他十歲時，局勢終於定下來，舉家又回到香港居住，他入讀培正，又於中文大學崇基學院修讀英文系。「我中學嗰陣，已經知道自己好鍾意戲劇，而我嗰陣嘅體育亦都好唔錯，跑短跑，所以當時已經打算，如果讀完中學，可以選擇嘅話，首選係讀戲劇，唔得，我可能會讀體育。不過嗰陣香港根本冇得畀我揀讀戲劇！」

結果，他選擇負笈美國，分別於奧克拉荷瑪浸會大學修讀演講及戲劇系學士課程，以及於耶魯大學入讀戲劇學院修讀藝術碩士課程。

六○年，King Sir於美國留學期間，於自由神像前留影。

六二年，他從美國回港後，開始在浸會學院任教。

父親的話

然而，在King Sir入讀大學的五十年代，照計當時的父母，思想應會比現在的更保守，只會希望子女讀醫學、法律等專業科目吧。「我爸爸細細個就已經離開屋企，思想比較獨立。佢自己喺大學讀政治經濟，都係因為我阿爺想佢做官，但結果佢畢咗業之後一路都係做會計，所以佢好明白揀科，係要自己興趣為先，思想好開通。

「我五五年讀大學，我同爸爸講想去美國讀戲劇，佢完全冇反對，仲同我講：『你只要有興趣，鍾意讀乜都得！只要我支持到你嘅，我一定會支持你！行行出狀元，你鍾意讀乜嘢，你咪讀囉！』就係佢呢個鼓勵，令到我揸緊咗呢個方向去做，從來都冇後悔過。

大導演李翰祥（右一）在邵氏影棚拍戲，King Sir（左一）往探班。

七十年代初，King Sir（前排右四）與陳有后（前排右五）開設藝訓班，學生包括了盧海鵬（前排左一）和周潤發（第三排右一）等人。