博出位
剩女愛寵物
前排嘅順天邨虐貓案引起全城關注，唔少港人同媽咪姐一樣鬧爆嗰啲人冇人性。
其實圈中都有唔少藝人愛養貓貓狗狗，尤其係一班未結婚兼「待價而沽」嘅中女藝人，近日佢哋仲喺微博大晒自己寵物嘅靚相，愛心爆燈。
舒淇 狗陪瞓
舒淇同馮德倫嘅戀情疑幻似真，近日佢就貼咗張同玩具貴婦狗仔瞓喺牀上嘅咀嘴相，話陰陰天有你（狗）就有陽光。同着住低胸衫嘅舒淇一齊瞓，相信狗狗心中都有陽光啦！
小儀 黐到實
42歲嘅小儀，多年嚟一直有隻忠心狗 DeeDee相伴，最近佢仲收養咗隻同 DeeDee差唔多樣嘅「細佬佬」。雖然近排小儀傳同舊男友黃志暉翻撻，不過兩隻狗仔成日爭寵黐到實，想有時間拍拖都幾難囉！
何韻詩 貼錯門神
大膽公開「出櫃」嘅何韻詩，最近忽然拍低兩隻貓咪向左走向右走相，仲笑佢哋係「左右門神」，唔通佢想講自己同密友 Joey家陣嘅關係？
胡杏兒 輪住
胡杏兒同黃宗澤分手之後，八隻貓貓輪流佢開心。尤其係佢最錫嘅「包包」，近日忽然喵喵叫嗲佢，搞到佢唔捨得出門。唉，揀隻嗲貓貓仲好過搵隻「無腳嘅雀仔」啦！
薛凱琪 谷肥貓
薛凱琪簽咗新經理人公司日日忙到甩轆，不過都冇忘記養咗多年嘅貓貓 Ponyo。 Ponyo肥到成個波咁，證明貓貓好食好住，一定唔會被虐待啦，不過係咪要幫佢減吓肥呢？
全站熱搜
留言列表
