面對面
如果命運能選擇 C AllStar
改編自重慶深山一段避世忘年戀的《天梯》，無綫拍了成年終於面世。
換成陳豪和張可頤演繹這段戀足半世紀的愛情故事，到底能感動多少人還是未知之數。不過，早在年多前，先知先覺先把《天梯》故事寫成廣東歌的 C AllStar，已經先行用歌聲感動了無數香港人、橫掃了樂壇一共七個歌曲獎項，並且一舉改變了四名成員、四個年輕人的生命。
我們都曾經年少過，但並非每個人年少時都必定無知， 26歲的釗鋒說，為了唱歌他曾經跪求父親成全；同樣 26歲的 On仔，向現實低頭，邊唱歌邊考護士牌，但是同時警惕自己要堅守理想，絕對不吃回頭草再做護士； 22歲沉默寡言的 Jase說，唱歌是自己獨有的溝通方式； 27歲的 King則是心裏一直住了一個她：「我做所有嘢都係為咗有一日可以聽到佢講一句：『我願意！』」
2012年， C AllStar紛紛從大學畢業，畢業生沒有變成失業生，因為他們得到一個改變命運的機會。
最怕蝕本
梁釗鋒（釗鋒）
畢業於城市大學市場營銷學系
要身材沒身材、要靚仔沒靚仔， C AllStar就是四個參加歌唱比賽成為前四強的大學生，膽粗粗逆市出道純屬唱得。其他三個成員都是因為愛所以唱，沒有野心沒有壓力，惟有讀市場學的釗鋒說，計過條數，為了唱歌蝕掉多少，呢一鋪，只准贏不許輸。
「我係屋企獨子，我媽咪就係嗰啲由細到大谷到我行、為讀名校搬屋去中西區住、每日返屋企陪我補習做功課、勁到自己周不時出成份試卷操 fit我嘅虎媽。佢哋對我太大寄望，悉心栽培我入大學，我反而將所有課餘時間攞去參加歌唱比賽，可想而知，父母有幾失望、有幾反對。
「參加歌唱比賽，我唔敢同父母講；上 TVB做節目，我驚到死會俾爹哋媽咪睇到；為咗掩飾歌手正職，我甚至求唱片公司安排一份文職工作畀我，每日朝九晚五但求按時按候畀到家用。為咗唱歌，媽咪話唔畀我再返屋企；為咗唱歌，我試過跪喺爹哋面前同佢講：『我任何事你都可以幫我安排，但係唱歌係我第二生命，你乜都可管，呢樣嘢求吓你唔好管……』我最記得， 2011年 1月 1日，我畀咗兩張叱咤頒獎禮門票爹哋媽咪，佢哋第一次到場、第一次親眼見到我哋攞咗『叱咤樂壇組合』金獎，從此由反對變咗支持，徹底相信我唔係玩玩吓。
「爹哋媽咪嘅態度雖然有所轉變，但係我冇轉變。佢哋得我呢一粒仔，佢哋喺我身上投資咗幾多我好清楚，我讀市場系，冇人比我更清楚計過條數，為咗唱歌，我放棄咗幾多再升學嘅機會、放棄咗幾多份高薪厚職工作，我真係唔衰得，做呢行，我真係諗住捨棄咗幾多，就一定要攞番幾多！」
我是奇蹟
何建曦（ Jase）
畢業於浸會大學文化通識系
Jase是四子裏年紀最小、家境最好的一個，同時亦是說話最少亦最倔的一個。今年剛從浸會大學副學士畢業的他，違抗父命不肯繼續升學，原因是：「唔繼續讀書，我第時未必會後悔，但係放棄呢個做全職歌手嘅機會，我一定會後悔。」
「 C AllStar成軍三年，屋企人就擔心咗我三年。我哋每日錄音出騷去做節目，夜晚十二點收得工已經叫早，第二朝仲要返學考試，全家都驚我捱唔到。終於捱到畢業，老豆想我繼續讀，但係我實在唔想錯過呢個追求夢想嘅機會。
「我屋企第一個鍾意唱歌嘅係家姐，記得小學時媽咪帶我去睇家姐比賽，我已經喺台下話畀自己聽，原來上台對住咁多人唱歌係一件咁型嘅事，開始唱埋一份，校內校外比賽一個都唔會報漏。由輸唱到贏，由俾人噓唱到俾人讚，我諗如果有雞蛋喺手，我由細到大都唔知俾人掉過幾多次……終於唱到今時今日，有唱片有演唱會，唱到阿媽當我係光榮，所有大小表演商場騷佢一定會到場支持，仲 set埋〈天梯〉做電話鈴聲，逢人就話呢個係佢個仔。
「以前唱歌純粹因為自己鍾意，揀邊首歌用邊種唱法，係為咗滿足自己、自 high咋嘛。直到有一次唱完，有個歌迷話聽到另一個我，聽得出我有啲嘢想講，我開始覺得唱歌嘅意義唔係滿足自己咁簡單。我唔鍾意講嘢，但係唱歌原來可以係一種同人交流溝通嘅方法，唱歌可以令人哋刮目相看、可以令自己有影響力，試問讀書或者其他工作又點會得到呢種滿足感？」
無路可退
陳健安（ On仔）
畢業於理工大學護理學院
就在今年暑假前， On仔剛剛成功考獲護士牌，還開玩笑說，將來樂壇冇得撈，起碼可以撈回護士老本行，唔怕冇飯開。實情， On仔踢波踢進過港隊，後路唔只做一個護士，不過，正是因為有得選擇， On仔說，更不能吃回頭草。
「我喺屯門公屋長大，爸爸做過海鮮、做過搬運，養大我哋七兄弟姊妹。我屋企比釗鋒屋企熱鬧得多，一家九口連房都冇間過，永遠都咁嘈。阿 King又係獨仔，最恨有家姐，我有晒佢想要嘅嘢，有成三個家姐。
「我係孻仔，同最大個阿哥差十幾年，全家最得寵係我，個個家姐阿哥鍾意做乜都帶埋我一齊做，次次學校有勞作功課，個個人連老豆都搶住嚟做，所以全屋我最幸福、最自由，我亦因此最多興趣。阿媽乜都畀我做，唯一要求係唔好作奸犯科，阿哥家姐亦都全力支持，希望佢哋追求唔到嘅夢想可以由我實現，對我嚟講，唱歌最大滿足感係，阿爸阿媽以我為榮，兩個手機鈴聲都叫家姐幫佢哋轉做我唱嘅歌。 C AllStar開騷、出碟，六個家姐阿哥搶住撲飛買碟、喺 facebook share畀班 friend，然後好自豪話畀人聽：『嗰個係我細佬！』
「我覺得 C AllStar係個奇蹟，四個仔，唔夠高、又唔夠好樣，唱歌都係 ok咋嘛，竟然都俾我哋行到第三年。講就話我有路可退，大不了咪唔唱歌去做護士囉，但係我偏偏好倔，想呢個奇蹟延續落去，所以我成日提醒自己，有幾厭惡護士份工、又有幾享受唱歌，就係因為有得揀，我一定唔要行番轉頭。」 
成名作〈天梯〉至今已錄得六百多萬點擊，不過無 綫電視劇版主題曲搵自己友胡鴻鈞主唱，激嬲不少〈天梯〉粉絲。
上週五（ 21日），既是 C AllStar新專輯發布日、也是演唱會門票首發日， 11月 24日， C AllStar將在九龍灣展貿舉行演唱會。
11年 1月 1日， C AllStar在《叱咤樂壇頒獎禮》上獲得「生力軍」金獎，主唱釗鋒說，坐在觀眾席的父母因此從反對變支持自己做歌手。《蘋果日報》圖片
C AllStar連續兩年出書，講 80後如何看時代曲，講時代曲如何影響自己成長。
預咗被噓
吳崇銘（ King）
畢業於廣州私立華聯學院音樂系
同樣賣實力的 At 17曾經說過，初出道時一上台就被觀眾柴台：「好樣衰呀！」 King說 C AllStar四子都有自知之明，第一天上台就預了會有噓聲會被喝倒采，不過當同年出道的 boy band Pan4a和 Square都不知所蹤，而 C AllStar還站在台上時，他們開始相信實力原來在香港樂壇行得通。
「唱片公司同我哋四個都一樣，第一日走出嚟就預咗俾人噓、預咗俾人話我哋又矮又唔靚仔唔知乜水。所以第一日我哋就打定輸數，我哋四個唔會 chok、唔使着高踭鞋，係點就點。事實證明，呢一行搞咁多花臣冇用㗎，包裝得再漂亮，冇餡乜都冇用，肯用心做，就一定唔會衰得去邊。
「其他幾個拍檔都話我係嗰種泰山崩於前而不變既人，其實我都有啲嘢好在乎。唔知係唔係個個人都有一個人，神聖不可侵犯一直擺喺心裏面。我有呀……已經兩三年啦，佢唔知，而我亦都唔想畀佢知。有時嗰個人愈係重要，我就愈係唔想出手。我唔急於一時畀佢知我嘅心意，但係我呢幾年嘅努力，某程度上都係為咗得到佢嘅肯定，有朝一日，我要佢肯定咁話畀我聽：『我願意。』」 
講挫折， C AllStar說最難過的就是初入行時在行人專用區獻唱，身水身汗零觀眾的日子。
去年尾四子跟着 DJ謝茜嘉去內蒙古拍攝旅遊特輯，都說做歌星能滿足自己又能滿足別人；還能見多識廣是份優差。
年少不知
四個八十後少年，因為一首唱五十年忘年戀的歌而成名，我不禁問，小朋友真懂甚麼是愛情嗎？
釗鋒說：「曾經同一個女仔三分三合，次次都係因為佢有第三者，仲要次次個第三者都唔同，明知戇居，但都係覺得冇咗佢唔得。」
On仔說：「有一次一段愛情無疾而終，我覺得好傷……（一齊幾耐？）個幾月……」
Jase說：「我公私分得好清楚，你哋喺街度撞到我拖手，我都唔會認自己有拍拖㗎……」
四個人當中，阿 King放在心裏兩三年的那個女神最讓我詫異，不過路還很長，風波會有很多，希望將來有一天，他們都會記得，自己那些年少不知愁滋味的歲月。
釗鋒
Jase
King
On仔
緊貼 K-pop潮流，請即 Like FACE K-pop官方 facebook專頁：
FACE K-pop 
留言列表
