我贏收視咪得囉！（設計對白）
周二（ 27日），李克勤錄《決》第二集時，懶醒咁完成「蘋果疊羅漢」，實情係事前已有工作人員砌好。
媽咪姐
克勤送百萬小兒科啫
李克勤袋千萬回歸無綫主持嘅節目《決戰一分鐘》，首播高收 30點。收視贏開巷，但有網友就大彈啲遊戲小學雞。不過媽咪姐覺得，要喺緊張嘅配樂同幾百個觀眾面前完成十關挑戰，真係唔容易嘅！
無綫最近頻頻派錢送禮冧觀眾，《決》仲最高派百萬，都算揼本。不過由美國設計出嚟嘅《決》，至今總共有 46個國家或地區買咗版權做二次創作。睇番咁多個地區電視台，最大手筆都係澳洲，獎金有成百萬澳元，多過香港成八倍。克勤送百萬？唔算好豪啫！
以媽咪姐嚟講，一百萬 OK啦!
漏網遊戲
《決》首集播過嘅遊戲，媽咪姐唔打算再講。我哋放眼世界，睇吓澳洲版嘅遊戲，有部分環節香港版見唔到㗎！
參賽者首先笠住其中一隻襪頭包住小鉛球嘅絲襪，然後用鉛球喺一分鐘內 fing低八枝汽水樽。要笠住絲襪好難呼吸，所以無綫唔敢玩。
難度：★★★★
參賽者將掃帚拍落預先放有小鉛球嘅紙碟，趁個波彈上半空時用個杯接住，十個波接到四個就過關。無綫可能怕個波會彈中現場觀眾而放棄引入。
難度：★★★
參賽者吹出一個番梘泡，然後用口吹到舞台另一邊嘅大圈先叫過關。無綫有得玩，仲譯做「泡泡高飛」，遲吓有得睇。
難度：★★★★★
林欣彤潮拜
《決》熱播全球，喺無綫未開播前兩星期，林欣彤同狄易達原來已經喺 youtube示範「抽筋擒拿手」。
林欣彤將一打鉛筆放喺手背，以極速拋起，輕而易舉就捉住成打鉛筆。
全站熱搜
留言列表
