甲

So Comment

300分點心　名苑

2012年12月07日 ~~ 第906期 飲食男女

去邊度飲茶呀?
唔識答，因為香港愈來愈少飲茶食好點心的地方。我常答：「去澳門呀！葡京最好！」
不過最近有個意外收穫。唔覺意朋友約了去名苑。

着數

那天星期六，拍完嘢大概兩點半， call朋友食晏，剛巧他們在名苑，於是由中環急急腳去灣仔。心裏沒有甚麼期望，只想聊聊天，醫醫肚。一坐低便問朋友好唔好食，原來他們都未起筷。不過先話畀我知原來星期六、日和紅日 2pm-4pm係 8折，我仲話生意難做，我問經理，原來平日 2pm後，很多點心有特價，仲平過 8折，不過平極都冇用吖，如果唔好食，請都唔去啦！係咪？

食物

第一樣食的是 BB鴿$38，燒得一點都唔乾，頗 juicy，並且相當好味。

跟住食了一嚿豬腳薑的豬腳。我覺得味道可以酸多一點，濃少許更好，但豬腳好化，我食骨時，大力吸下去吸到啲骨髓，正！

炸兩的汁亦調校得很好，不太鹹亦夠甜味。

各樣點心都唔錯，不過當蝦餃一到時，先先有點失望，因為又係大蝦餃。我常說大家都唔明白食蝦餃的道理，最重要係千祈唔好趁熱食，要等到啲蝦餃冇煙，啲蝦餃皮開始變實色才夾，這樣才不會黐筷箸。最蠢就係又用筷箸又用羮夾，黐來黐去，爛晒啲皮。而蝦餃最好食就係一啖一隻。這樣，蝦、餃皮和蝦餃裏面有少少汁一齊食先至係食蝦餃。要不然蝦餃太大隻，要咬開，蝦還蝦，皮還皮，有乜好食！畢竟名苑的蝦餃都係太大隻。但係我一咬之後，立即叫朋友食，因為好耐好耐好耐都未食過呢隻蝦餃味——正是我兒時的蝦餃味。好香麻油味。食得我好開心。因為而家啲蝦餃既唔香，皮又韌亦冇蝦味。名苑蝦餃啲皮又係兒時啲蝦餃皮，實白色的！正！大家一定要去試，有 50歲以上的更加要去食吓兒時的蝦餃！

大讚!!!

要大讚嘅係佢哋嘅服務態度， 200分！ 1.坐咁耐，我自己未斟過茶，朋友斟過一次，但次次都有侍應嚟加茶。 2.朋友叫豉油，侍應拿了一碟來，她未放低已發現自己可能弄錯了，於是問朋友：「你要的係生抽豉油？」朋友說：「是！」她說：「對不起，我拿了食腸粉的豉油，但我見枱面已經有腸粉豉油，那你一定係要生抽了……」多麼的細心。通常記得拿豉油來已算好彩，就算拿嚟就放低算鬼數，理得你吖。哈，呢位侍應會睇吓你枱面，仲識話自己錯，真難得， 300分！ 3.我一路食晏未滿八成客，竟然會自動自覺幫我哋換骨碟。不要忘記，我係 8折時間去，換來的不是 8折招待！ 300分！
各位，不要以為因為他們知道我係蘇施黃，朋友告訴我，他們的服務一向都係如此好的！大家真係要學習，學習。
大廚知道我到了，靜靜地問侍應我的反應如何？這是我的答案。
「名苑，大家都要落力支持！」哈哈！

名苑酒家

地址：灣仔軒尼詩道 288號英皇中心 1樓
電話： 2892 0866




蘇施黃
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。 

撰文、攝影：蘇施黃

(蘇施黃)