【萬千星輝頒獎典禮之從容不迫】無綫頒獎禮，不過是一場遊戲，所謂普選出來的視后，也可能是交換合約的籌碼。真正的視后，根本不需要獎項來肯定自己。米雪今年再憑劇集《大太監》演慈禧一角而成為視后大熱，但她對得獎毫不在乎，只渴望與一班合拍演員做一台好戲。事實上，N年前米雪演過慈禧，但她砍掉重練，重新閱讀劇本及歷史鑽研角色，時至今日，有幾多女星能認真至此？

撰文：何慧斯

■米雪明白拍戲就是要娛人娛己，自己過足癮，又可娛樂觀眾。攝影：林德雄

在08年憑《溏心風暴之家好月圓》贏得無綫視后的米雪，今年再憑《大太監》成為視后熱門人選，日前她接受訪問，問到得獎信心，她笑說：「我又冇諗，對我嚟講，拍到呢個劇本已經好感恩，但你話如果有開唔開心，梗係開心啦，係錦上添花，好似中六合彩邊有人嫌多。」

■再度在《大太監》與祥仔合作，米雪大讚可以安心交戲。劇照

觀眾口碑最重要

米雪續說：「我覺得最緊要係觀眾鍾意睇，拍戲係娛人娛己，最好梗係自己過足癮，但又可以娛樂觀眾。我明白未必人人係咁諗，如果佢哋真係付出過，有畀心機當然想考第一，佢哋有呢個諗法唔係錯，起碼畀自己有一個希望同推動力，只不過係我哋做咗咁多年人，追求嘅已經唔係獎項，反而係一個好劇本。」正如米雪所言，《大太監》的慈禧的確是她近年最愛的角色，她說：「嗰陣仲喺內地開緊另一套劇，當我收到劇本已經不停讀，我讀嘅對白有好多文言文同四字詞語，就算唔瞓覺都要讀咗佢，我仲畀個時間表自己，睇劇本見到大場面就mark住佢，好似讀書考試咁做定功課，起碼背咗有印象，開工前再溫番佢。劇本真係寫得靚，實際生活真係用唔到，所以咪辛苦啲囉。」

事實上米雪今次並非第一次做慈禧，在80年代，她已在亞視劇集中扮演過，她說：「嗰陣時已經好鍾意，衫同服裝已經好唔同，加上又係好耐之前嘅事，所以可以洗晒腦，重新去做。今次監製（羅永賢）好用心去做，佢連去橫店都做好晒功課，我哋一開工佢就落手落腳做。」

最令米雪感動的，當然是一眾演員的齊心，她說：「我好鍾意人多，同佢哋一齊拍戲嗰幾個月真係好開心，未試過拍劇係咁齊心合力做，互相幫助，遇到啲唔識嘅字，又會幫手查字典同執妝，我唔係淨係enjoy自己讀，仲有同旁邊嘅人好合拍，我哋收工成日會一齊食飯講戲，唔介意邊個多邊個少。」她口中所指的旁邊人，當然是飾演李連英的黎耀祥，她說：「我哋以前合作過，但對手戲唔多，真係合作係今次，唔只祥仔，仲有陳國邦同曹永廉都好好戲，我最鍾意祥仔係好低調嘅人，畀你一個好舒服嘅感覺，佢知道自己做緊啲乜嘢，唔會騷擾人，同佢做嘢大家都安心交戲，係一個知情識趣嘅人。」

■米雪早於08年已憑《溏心風暴之家好月圓》一嚐視后滋味。

學慈禧待人處事

談到拍《大太監》得着，米雪坦言：「今次拍咗部好戲，一班演員又好融洽，可以話完全冇壓力，如果有壓力就唔會接，一定唔會做，做戲咁多年唯一畀壓力自己，只係讀對白，慈禧太后嗰種專橫跋扈好難用喺呢個社會，我反而學咗佢嘅待人處事，佢好細心去處理每一件事。拍劇最開心係收工同同事一齊食飯，有時我哋未必有時間研究新事物，惟有靠新演員去講解，學到好多嘢。」

萬千星輝頒獎典禮：最佳女主角提名名單

米雪《大太監》
楊怡《名媛望族》
胡杏兒《怒火街頭2》
徐子珊《雷霆掃毒》
佘詩曼《天與地》
陳法拉《東西宮略》
汪明荃《巴不得媽媽…》
鍾嘉欣《護花危情》
陳茵媺《天梯》
周麗淇《我的如意狼君》

佘詩曼

陳法拉

汪明荃

戲如人生

■在圈中打滾多年的米雪，坦言獎項就如六合彩不會嫌多。

向任何人提到米雪，即時聯想到她儼如鐵人般的體力，在密集式工作下，仍精神奕奕，她笑說：「咪要檢點，乖啲囉，呢行個個都唔夠瞓，問題係爭取時間瞓，我知自己唔夠時間，乜都分期去做，你要識得呢樣嘢，唔畀自己喺一個緊張狀態，但我都怕自己記唔到啲對白，惟有將勤補拙。」
米雪續說：「我開頭係死頂，頂吓頂吓，樣樣嘢咪變咗習慣，我覺得做人係要成日去見識，見識多心態咪唔同，我都係常人，摑我一巴一定會痛，事情發生喺你身上，一定會有一個即時反應，但係又如何呢？事情已經嚟，你傷心又或者真係嬲，發洩咗都要處理跟住嘅事。人要生存，你仲要繼續落去，只有好好地面對，或者睇得多見得多，知道冇話冇咗邊個唔得。」
經常做義工的米雪更說：「其實無論係佛教同基督教嘅嘢我都成日去聽，又成日做義工，只係想將啲好嘢儲起，當有事發生後，咪將呢啲經驗變做錦囊，提自己唔好學人哋咁樣處理，要聰明啲去做。我覺得拍戲都係一個人生經歷，戲裏面都係寫緊你嘅經歷，教緊你嘅人生。」