大封面

09年拍拖兩個月即閃電奉子成婚,現年27歲徐淑敏(Suki)和39歲黃浩,即使年紀相隔12年,卻愈來愈恩愛。兩歲大女黃心瑤(Vianna)已經識行識走。周一(19日)Suki再為老公誕下6磅半細女Renee。黃浩更在Suki臨盆前兩天,親自為老婆操刀影大肚寫真留作紀念。 

黃浩向傳媒報喜時,曾揚言會送鑽石或車俾老婆,不過本刊在Suki產女前20小時,直擊黃家總動員到大埔富匯半島睇豪宅。就快入住四千萬風水豪宅,Suki生多兩個都抵啦!

 

兩年抱兩,Suki再為黃家添喜事,老公黃浩日前興奮向本刊獨家發放Suki產女前的大肚寫真。「都係Suki入院前一晚(17日)喺屋企忽然諗到,因為佢佗大女時冇影到。我見佢今次個肚佗得幾靚,就好隨意咁影低,都影咗十零張㗎。我本身識影相,不過之前都係影食物,今次真係第一次影大肚婆。」在旁的Suki即中氣十足說:「都影得唔錯,合格啦!」第一次影大肚寫真的Suki,坦言女人一生中,最靚最幸福便是懷孕時期,所以今次才肯讓老公操刀,留下自己最美一刻。

細女旺父母 

Suki同老公今回是搵楊天命擇日開刀生女,最佳時辰是19日(周一)午時。當日下午四時,黃浩興奮現身養和醫院大堂向傳媒報喜:「Suki生咗喇!囡囡6磅半,Suki幫佢改咗英文名Renee,中文名就等楊師傅改,但老婆就要求個名要有個心字。楊師傅仲話個女呢個時辰出世,唔單止會好健康,好叻,而且旺我又旺Suki,仲話我十年內就退得休咁話。(送咩俾老婆?)未諗呀,佢話依家咩都有。可能送鑽石或者車啦!」

產前一日睇樓 

黃浩把口話未諗,實情已經做緊嘢,搵定大屋俾老婆產後入住。據地產經紀透露,黃浩近月多次到大埔富匯半島獨立屋睇樓。「黃生第一次嚟係自己一個,唔同尺數都睇曬,之後就帶埋老婆、個女同屋企人前後嚟過三次。黃太就鍾情頭排望街有泳池嗰間,黃生同佢媽媽就比較鍾意尾排嗰啲。都係睇緊四千幾呎嘅屋,價錢大約四千萬左右。」 

周一(19日)開刀生女,但前一日下午五時,本刊發現腹大便便的Suki和老公、囡囡及黃母一行六人到富匯半島作最後睇樓。現場所見,Suki甫落車,即坐上屋苑預先安排好的golf車。眾人首先參觀第一排最近海景的獨立屋,抱住囡囡的黃浩與Suki更走到窗邊俯望樓下的泳池和花園。據知Suki對這間面積近四千三百呎的大屋情有獨鍾,逗留近半小時,眾人再坐golf車到屋苑其他獨立屋繼續睇。

新屋旺丁又旺財 

玄學家吳佩孚師傅曾為富匯半島睇風水,吳師傅形容住進此屋苑,無論財、運、健康都會好。「呢度屬於八仙嶺峰,前見水,明堂見水廣活財旺,而且群山相連,旺丁又旺身體。如果住最前排,由於近馬路,噪音多啲,健康會差啲。不過種大葉植物擋煞就可以。如果住近海,財就會旺啲。如果住近山,就健康好啲,人丁健康,人丁亦代表人緣,人緣好自然生意好。」

大女呷醋 

睇足個半鐘,黃浩和Suki等乘車往跑馬地,先到附近小菜館食晚飯,約8時食飽即浩浩蕩蕩出發往養和醫院辦入院手續。其間素顏Suki發現記者影相,即緊張躲在老公身後避開鏡頭。到達醫院,黃浩再做廿四孝老公陪老婆登記兼上房安頓。 

再次開刀產女,醫生原本要求Suki留院多幾日休息,不過Suki開刀翌日已能自行落牀,加上老公準備好坐月補品,醫生都認為Suki今次開刀復元得快。周四(22日)她便可抱細女回家,順道與老公一家慶祝自己27歲生日。 

據知細女出世後,大女Vianna不時要求要抱要錫妹妹。Suki就向Vianna解釋妹妹太細,未可以同姐姐玩。黃浩說:「Vianna聽完解釋都明白。後來見到媽咪餵妹妹飲奶(Suki餵哺人奶),佢就呆咗望住,雖然佢冇講嘢,不過我哋估佢呷醋。」

揀定風水屋 

問到日前和老婆睇樓,黃浩直認會搬屋。「係打算搬屋,大埔嗰度環境幾好。咁Suki生完要坐月,所以就趁佢生之前去睇咗先。佢坐月期間我就去準備,坐完月佢就咁行入去就得啦!(決定買邊間?)我哋睇中三間,依家等緊楊天命師傅幫我睇風水,應該日內會決定到。不過依家樓市咁唔穩定,租嘅可能性大啲,發展商仲俾咗個discount我哋,八萬八,好意頭喎!不過價錢唔係問題,最緊要老婆同囡囡住得開心舒服。」 

周四出院正值Suki 27歲生日,據知月前黃浩已到車行訂了一部近四百萬的Aston Martin跑車Suki開心。「係落咗訂,不過架車要等到下年至到。我見Suki鍾意,都打算等佢坐完月帶佢去英國自己揀,直接運返嚟咪快啲有得揸囉!(生日點慶祝?)Suki又唔出得街,喺屋企撐枱腳同攬住兩個女都夠啦!」

誓追慈姑椗 

至於會否短期內再追仔,黃浩笑言現時一屋女人,當然希望將來陰陽平衡啲。「屋企依家成屋女人,除咗媽咪、家姐同工人外,連隻狗都係女,不過我都要睇Suki嘅意思。我想Suki休息幾年先,其實照顧兩個小朋友要花好多心機,等兩個女大一啲返學先計劃再追,反正Suki都仲後生。」有心又有力,黃浩同老婆生夠十個八個都冇難度啦!

大肚寫真勁hit 

狄美摩亞 

早在1991年,美國性感女星Demi Moore(狄美摩亞)懷住7個月B女時,已經大膽地全裸影大肚寫真,此照片成為雜誌的封面,轟動一時。

名字十揀一 

剛出生的黃家二小姐,暫時只用Suki改的英文名Renee,中文名則等堪輿學家楊天命師傅夾埋Renee的時辰八字才起名。據知楊師傅已挑選十個名字供黃浩揀,其中心瑩、心榆、心柔、晞芝和梓恩五個名字,黃浩和Suki比較有興趣。大女叫心瑤,Suki又鍾情心字,妹妹好大可能性個名都有個心字喎!

 

翁虹 

07年前亞姐冠軍翁虹亦於北京影過大肚寫真。當時身穿三點式泳衣的她懷住9個月巨B,雖然佗B重了35磅,但面形和身形都能保持纖瘦,所以翁虹要影相留念。

 

葉一茜 

曾在湖南參加《超級女聲》的大陸歌手葉一茜,07年與國家遊泳隊田亮奉子成婚,並於08年5月誕女。誕女前田亮仲陪老婆影大肚寫真,非常恩愛。



鍾麗緹 

月前開腔承認與嚴錚離婚的鍾麗緹,在去年1月佗住第三位千金時亦影過大肚寫真。向來唔吝嗇曬身材的她,影寫真時卻披住浴袍,有欠睇頭喎!



陳倩揚 

前港姐陳倩揚於7月誕下囝囝前一周,到影樓拍下大肚寫真。當時陳倩揚不但換上多套靚衫,而且表情多多,老公陳浩然亦埋位齊齊影,溫馨到暈。



姚嘉妮 

06年與林祖輝結婚多年的姚嘉妮,於懷住B女7個半月時亦影過大肚寫真,雖然無老公在場。不過習慣面對鏡頭的嘉妮亦影得充滿喜悅。 ####



17/9 Suki大肚寫真首曝光 

產女前兩天,黃浩忽然醒起要幫Suki的大肚留倩影,即要求老婆換上泳衣,並在房中拍照,Suki望住肚皮露出慈母笑容,冧曬。



溫馨合照 

周一(19日)Suki擇了吉時開刀,黃浩幫細女剪完臍帶之後,Suki即嚷着要見囡囡(細女Renee),在場護士即幫忙影合照。

 

有女萬事足 

黃浩兩年內喜獲兩位千金,大女Vianna亦十分歡迎妹妹Renee,見親妹妹都要抱要錫,相中Vianna正懇求Suki讓她抱抱妹妹。



18/9總動員睇樓 

同日(18日)黃家一行六人坐住富匯中心的golf車四圍參觀,睇啱邊間即落車睇。女經紀對黃浩落足嘴頭。梗係啦,睇第四次,梗有心幫襯啦!



周日(18日)Suki、黃浩和大女Vianna站在大廳,打開窗簾細看樓下的私家泳池。據知屋苑內只有部分獨立屋有泳池,故Suki對此屋特別情有獨鍾。



屋苑全為獨立屋,雖然屋與屋都黐得好埋,不過每間屋都有車位,部分更有前後花園,活動空間很大。



新型屋苑點少得會所。富匯半島的會所除了應有的泳池、球場外,更有小型賽車場、滑雪練習場等特別設備。





富匯半島屬背山面海,難怪吳師傅對此屋苑讚不絕口。

 

18/9食飽入院 

睇完樓,Suki同老公、囡囡和黃家上下到跑馬地小菜館食晚飯醫肚。食飽飽的Suki笑容滿面,似乎心情靚爆。

 

孕婦味弱 

Suki自稱懷孕令她多出35磅,不過手腳仍見瘦削,而且步履輕盈,羨慕死唔少孕婦。



到達醫院,囡囡Vianna突然興奮四圍走,黃浩即時捉番囡囡,並交託黃母看管至敢行開。

 

開刀前化妝 

Suki臨入產房前都要靚,竟化上淡妝,準備生B後馬上影全家福時,不致面容憔悴。



Suki再次住進養和至top套房剖腹產女。

 



細女Renee

 

 



 

 

《蘋果日報》圖片

, , , , , , , , , ,

Posted by tvblife at 痞客邦 PIXNET 留言(0) 引用(0) 人氣()