要閉氣潛落池底，又要顧住擺甫士， Kary不慎露出打底 T-back。
戰意十足
水底水著 吳雨霏飲水 5粒鐘
去年八月簽約環球後，吳雨霏（ Kary）被重點催谷，取代當時仍在環球的一姐謝安琪，大計包括今年推出兩張唱片，明年一月舉行演唱會。
公司揼本， Kary瞓身出力，早前為新碟拍攝封套，玩性感水著潛水五粒鐘，飲咗唔少泳池水的 Kary，毫無怨言。
Kary為著泳衣，提早一個月日日操。
為了今次拍攝， Kary準備二十套衫，十分緊張。
做好自己
室外泳池，夜晚十分大風，落水上水， Kary要飲熱茶保暖。
被指取代謝安琪，吳雨霏只求做好自己。
「我自己唔會咁睇，只會當係良性競爭，即使阿 Kay唔走，其實公司都有好多其他女歌手，好似 Karen、憶蓮、 Kelly咁，自己根本唔會諗要做一姐，何況乜都係假，最緊要做好自己先！」 Kary說。
謝安琪解約，公司資源集中投放到 Kary身上。
「講真心，公司同我做嘢從無提其他人，好 focus幫我諗條路點行，一開始已經 plan好晒好多計劃，俾好多信心我，又安排我去韓國做交流，攞好多寶貴經驗！」
環球全面配合，亦成功幫 Kary爭取到明年一月紅館檔期。「依家紅館唔易批檔期俾歌手，連阿姐汪明荃，申請咗幾次都唔批，所以 Kary對呢次演唱會好緊張，一年前，已經跟老師學跳舞，又爭取時間做運動 keep fit！」一名環球要員說。
七月推出的新唱片，封套玩水底效果，單是泳池場租，已經花超過十萬， Kary潛水五粒鐘，只為一個透視感覺。
泳褲爆鈕
「個 concept係我同造型師馬天佑一齊度，公司俾好大自由度我，搵一個啱效果要求嘅泳池，都搵咗唔少地方，拍攝過程都幾辛苦，潛落水底擺甫士，過程非常費時，除咗要忍住呼吸避免有氣泡遮到塊面，仲飲咗好多泳池水，拍完成個人散晒！」 Kary說。
今次拍攝過程本來拍兩套泳衣，但其中一套泳衣落水後，泳褲鈕釦爆開，幸好 Kary打咗底，未至走光。
「知道要著泳衣落水，之前我做咗好多運動，等自己 fit啲，效果好啲！」一切從身開始，吳雨霏唔錫身，一副戰鬥格。
為明年一月紅館騷鋪路， Kary完成新碟宣傳後，便要為年底新碟再錄音。
唱片公司租了黃埔海逸酒店泳池拍封套，當日工作人員超過二十人。
新歌《告白》搵嚟緋聞男友周栢豪（右）幫拖。
Kary與網球手洪立熙翻撻，二人早前一起外遊，充電回港再搏殺。
十年變遷
留言列表
