《吸血新世紀 4破曉傳奇下集》上年已拍完，當時 Kristen仲未發生偷食事件，所以佢同殭屍仔 Robert Pattinson拍談情戲拍得鬼咁投入，仲頭貼頭煙韌到死。
真面目
聖誕晒冷 末日聖誕
哈囉喂狂歡後就到感恩節，香港冇感恩節假期，全城惟有期待聖誕有乜好戲睇。
今年聖誕檔期繼續西片獨大。經典歌劇之選，必定係曾翻拍過的百老匯名著改拍成電影的《孤星淚》（ Les Miserables）；想睇浪漫加科幻就有《吸血新世紀 4破曉傳奇下集》（ The Twilight Saga： Breaking Dawn 2），今次講男女主角 Robert Pattinson同 Kristen Stewart嘅半人半殭屍 B女極速長大，不過慘被殭屍首領佛杜里家族追殺。《吸》片系列終於去到最終回，如果傳聞中 12月 21日世界末日冇事發生繼續天下太平，點都要睇勻幾套大片過聖誕囉！
《吸血新世紀 4破曉傳奇下集》
上映日期： 12月 20日
情仇化解
飛簷走壁
Bella同殭屍仔一咬成婚後已變成殭屍，所以 Bella同其他殭屍一樣，唔只識飛簷走壁，喺森林遇上野生動物，更會生擒然後吸血。
聯手抗敵
狼人同殭屍仔已化敵為友。今次狼人叫埋狼人家族一齊聯同殭屍仔一家人，去對抗誓要追殺 Bella一家三口嘅殭屍首領佛杜里。
《吸血新世紀 4破曉傳奇下集》
追殺殭屍女
已拍足 5年的《吸血新世紀》系列，今次終於埋尾，不過終極篇就學足《哈利波特》一樣分上下集上畫，上集早於上年聖誕檔期出籠，吊足觀眾一年癮，下集大結局終於鐵定於 12月 20日登陸香港。
雪地大戰
以往只有殭屍仔保護 Bella，但今次 2人為保護愛女 Renesmee， Bella更一齊聯同人狼家族等異族人士，跑去雪地向佛杜里宣戰。
今集最大奸角佛杜里，以殭屍仔犯下「不准咬人類嬰孩將其變成殭屍」禁忌為由，帶領殭屍軍團，誓要將 Bella一家人滅門。
殺盡全家
「脷」誘殭屍仔
雖然 Robert仔同 Kristen大大話話演足 5年情侶，但最近竟然爆出 Kristen唱衰 Robert仔唔識拍咀戲，有指 Robert仔拍親接吻戲唔只條脷僵硬唔識郁，最渣係個頭唔識就位成日遮鏡頭，搞到頻頻食 NG，最後要 Kristen做主動，用條脷教佢點樣錫。
（網上圖片）
曾因偷食斷正搞到同 Robert仔掟煲嘅 Kristen，最近終於傳出 2人復合，更好似楊怡同羅仲謙咁被影到 2人喺車上掩面避狗仔隊嘅醜態。不過有傳 2人其實協議喺《吸》片宣傳期間扮復合，到新片落畫後就各走各路。
《孤星淚》喊到尾
舞台劇、電視劇甚至電影都拍過 N咁多次的《孤星淚》（ Les Miserable），今次改由曾執導《皇上無話兒》的金像大導 Tom Hooper炮製，再加埋一連串巨星好似 Hugh Jackman、 Anne Hathaway，加埋新紮女星 Amanda Seyfried撐場，齋睇星都抵。
《孤星淚》係經典慘情戲，新版由「狼人」 Hugh Jackman同 Anne Hathaway飾演落難情侶，睇佢哋兩個流落街頭， Anne更衣衫單薄狂哭於雪地下，可憐到咁，觀眾真係要帶定紙巾抹眼淚。
成人版 Cosette由荷里活新紮女星 Amanda Seyfried演繹。雖然 Cosette長大後又靚女又有內涵，可惜當時社會發生動盪，又要再捱過。
賣身養女
喊住斷髮
戲中飾演棄婦嘅 Anne，為養活愛女，要出賣自己頭髮賺錢，睇佢嘅長髮被剪到變成馬騮頭咁款，唔只佢自己喊到收唔到掣，相信觀眾都戥佢慘。
剪斷長髮
撫養孤女
Anne因捱到病，之後仲死埋，留下孤女 Cosette，其男友 Hugh Jackman唔忍心見 Cosette變成孤兒，於是決心將 Cosette養大成人。
Anne Hathaway飾演的棄婦唔只要出賣肉體，更要變賣頭髮養活女兒，戲中 Anne就上演一段斷髮場面，她最近接受訪問講起呢場戲都話一殼眼淚：「睇見自己嘅頭髮被鉸剪一剪嗰刻，我個心好痛，真係好唔捨得，拍完戲之後即衝入廁所喊咗一餐。」之前玩過全裸，今次仲斷埋髮，好似 Anne咁紅都仲肯為藝術犧牲嘅荷里活巨星真係買少見少。
《孤星淚》
上映日期： 12月 20日
《哈比人—不思議之旅》
前傳三部曲
另一套聖誕大片必屬由金像大導 Peter Jackson炮製的《哈比人—不思議之旅》。套戲其實係《魔戒》前傳，故事發生於《魔戒》的 60年前，講哈比人佛羅多阿叔比爾博，連同巫師甘道夫及十三矮人兵團遠征魔域屠龍，點知途中遇上半獸人以及巨蜘蛛，好彩，最後比爾博遇上擁有魔戒嘅妖精咕嚕，夾手夾腳同班怪獸火併。
由於之前《魔戒》系列瘋魔全球，今次大導 Peter Jackson決定將前傳拍成三部曲，第一部曲先於今年聖誕檔期上畫，拖長嚟做先可以賺到最盡。
今次《哈比人》將由演開電視劇嘅 Martin Freeman揸旗，飾演主角比爾博。今次《哈》將斬件分三部曲上畫，而第三部更有可能學《哈利波特》結局咁分上下集播，實行搶錢搶到盡。
Cate Blanchett飾演嘅凱蘭崔爾，擁有預知能力，佢察覺奸鬼黑魔王將回歸，於是暗中協助同比爾博一齊冒險嘅巫師甘道夫，去阻止黑魔王勢力蔓延。
冒險途中，比爾博遇上擁有魔戒嘅妖精咕嚕，於是帶埋咕嚕一齊上路同狂魔妖獸對抗。
《哈比人—不思議之旅》
上映日期： 12月 13日
《無敵破壞王》 3D搞鬼
今年聖誕西片唔係打打殺殺就係喊苦喊忽，想開心不如睇動畫《無敵破壞王》笑番吓。
故事講無敵破壞王喺電子遊戲中，日日要拆屋搞破壞，原來遊戲以外破壞王極之厭倦被定型，於是決心洗底，誓要贏取英雄勳章做萬人景仰嘅英雄。《無》片由《阿森一族》導演 Rich Moore領軍搞創作，更由廸士尼出品仲製作埋 3D效果，品質肯定有保證。
《無敵破壞王》
上映日期： 12月 20日
《烈探狙擊》特工變神探
上年聖誕上畫嘅《職業特工隊：鬼影約章》美國票房收 16億港元，今次化身神探，電影公司保守估計，將收起碼 10億港元票房。靚佬湯有票房保證，但老婆已帶埋個女走佬，賺咁多都冇用啦！
聖誕過後上畫的《烈》片，講一名冷血兇徒殺害多名無辜途人，兇徒被擒後竟要求 Tom Cruise飾演嘅神探 Jack Reacher幫手辯護，但 Jack竟然走出嚟頂證，其間同辯護律師一齊捲入殺人漩渦。上年到今年連霸住兩年聖誕檔期嘅靚佬湯，今年唔做特工，轉做神探，轉吓型都係好事。
《烈探狙擊》
上映日期： 12月 27日 
留言列表
