湊到實
上週五（ 2日） Gaile出席活動時，陳善之全程緊張傍實，更不時搶答話：「有好多 job傾緊。」
樂基兒（ Gaile）同黎明（ Leon）的 4年婚姻玩完，外界傳聞 Gaile大擸黎明 2億車船加物業做掟煲費，搞到 Gaile變大貪女人。
無端變貪錢港女， Gaile上週五（ 2日）終於忍唔住喊住澄清，更堅稱自己有賺錢能力，而事實婚變並冇影響 Gaile接 job身價，回復單身的基兒更由 20萬一個騷直升至 50萬。冇咗婚約，經理人合約一樣照綁。
天價托市
單身樂基兒有價有市，據知同為黎明經理人的陳善之，亦趁機托高 Gaile價。據知情者透露：「離婚之前 Gaile出騷，如果係熟客會收友情價 18萬，一般就開 22萬，最近離婚有話題已升至 30萬，星期三（ 7日）個積家表活動，阿 Joe（陳善之）更加開到天價 50萬，以為對方會還價，點知又一口答應，可想而知 Gaile幾值錢。」
而上週五（ 2日）樂基兒出席活動時，陳善之亦一直陪伴在側，當記者問到樂基兒合約時，陳善之則立即搶答：「 Gaile個約未滿，有好多 job同佢傾緊。」睇嚟 Gaile都未完全飛得甩喎！
自爆迫黎明行博物館
鮮有接受專訪的 Gaile，週日（ 4日）接受商台楊崢主持「一圈圈」訪問，週一起一連三日大爆與黎明的 7年情，首集內容講及婚變後生活及澄清近日的傳聞。
第 2日回顧與黎明的 7年經歷，如 Gaile指婚後愛下廚，試過焗蛋糕為老公炮製一個驚喜生日派對。第 3日談及黎明的求婚過程及拍拖期間的往事， Gaile稱 Leon在其眼中「係一個好 sweet嘅人」。
另外提到性格不合， Gaile亦爆出事例，原來她曾經迫過黎明陪她一齊去行博物館，「但係佢就真係好冇興趣行！」 
全站熱搜
留言列表
