車人一句

揭背手波怪人　 Ford Focus ST×陳啟泰

2012年11月07日 ~~ 第1085期 交易通．搵車快線

在娛樂圈中自命玩車叻嘅人多的是，總之講到自己好鍾意車、無車不歡，等到有人訪問時就大談車經嚇窒娛記妹妹仔，咁就有話題、有新聞！陳啟泰（ Ken）身為亞視人，新聞價值已唔高，再加上佢冇緋聞，點會有人估到佢玩車玩到成精？而且玩得夠奄尖！獨玩棍波、獨玩揭背！莫講話娛樂圈中罕有，成個香港都冇乜幾個咁嘅怪人！ Ford Focus推出全新 ST版本，點可以唔搵陳啟泰試車？既然係呢類車專家，又係上代車主，夠資格、夠說服力有餘。

Ford Focus ST Spec.

引擎： 1,999c.c.直四 turbo
馬力： 250ps/5,500rpm
扭力： 35.2kgm/2,000-4,500rpm
傳動： 6前速手動
懸掛：前獨立支柱式、後獨立搖臂
制動：前、後透氣碟
車身： 4,358× 1,823× 1,484mm
0-100km/h： 6.5秒
售價：$299,900
查詢： Inchcape Far East Co. Ltd.（ 2529 7277）


玩咗 10幾年揭背車嘅阿 Ken，對新 Focus ST有好高評價。

有錢就可以玩車，但玩得精唔精同錢冇關係，有人只會一擲數百萬買 supercar，然後間中用吓接 model遊街，筆者唔會懷疑阿 Ken嘅吸金能力，尤其國內紅到爆，買得起 supercar有餘，不過佢冇咁玩喎！「即係咁，如果我有錢買部法拉利，但買咗之後我冇錢買其他車，咁我咪只得一部拉利？用呢筆錢可以玩好多部揭背車啦！」 

「外表上已經加分啦」

全新設計車尾，有立體尾燈同 8字形尾喉，靚仔過車頭好多。

5年前筆者都同阿 Ken做過訪問，當時已經係揭背跑車迷，及後就買入咗上代 Focus ST。鍾情 supercar嘅人筆者見得多，只玩揭背車嘅朋友只得阿 Ken一個。「其實一切源於我當年第一部揭背跑車標致 205 GTI，我好鍾意佢個車尾，而且當年日本車中， Civic同 Corolla都好興推出高性能揭背型號，我哋以前叫呢啲做『燙斗仔』，就由嗰時開始鍾情揭背車。」新一代 Focus ST外表有好大改變，阿 Ken身為上代車主又點睇？「好靚呀！我未見真車前已上網做咗好多功課，知道個樣係點，不過今日見真車仲正，線條比上代流線形咗，未試車外表上已加分啦！」阿 Ken對 Focus ST外表加分，但筆者就好壞參半，只 like車尾，尤其立體尾燈同 8字形尾喉勁靚仔，但車頭個大嘴想點？太似 Aston Martin出品呀，格格不入呢。 

話題 Hot Hatch之選

阿 Ken玩揭背跑車年資超過 10年，擁有過多部當時得令辣車，要逐部數出嚟真係幾版都未夠！不過總有啲印象比較深刻，一講起就大把水吹，唔理佢好定壞，有話題就唔怕講。

最愛齋版 VW Golf GTi（ Mark V）

近年紅到爆嘅 Golf GTi點會唔啱阿 Ken胃口？第 5代 GTi最出位就係 DSG波箱，但阿 Ken反而愛最齋手波版，配格仔布凳夠 classic。「當年好抵買，$248,000就買到，而且難得係手波。」 

操控最好 Honda Civic Type R（ FN2）

現時阿 Ken擁有 3部車，其中一部就係 FN2 Type R，佢話自己係 Civic Type R fans絕唔係講笑，玩勻咁多代！「 FN2有好好操控，而且始終 NA引擎易掌握，揸佢好有滿足感，可以好容易就開得快。」 

四驅無敵 Subaru WRX STI（ GH）

阿 Ken講過，大馬力 turbo揭背車如果只用頭驅好難揸得掂，所以佢都揸部有四驅嘅 WRX STI。「我部 08年 STI夠晒大馬力，而且有四驅系統可以好放心咁快揸。」 

「 𠵱家 Ford係世界車廠，質素比以前好好多」

筆者約過 N咁多個藝人試新車，但所有人面對心儀新車都會扮吓嘢，扮到好唔志在、好唔雀躍咁，或者可能部車真係令人唔開胃啦，但阿 Ken絕唔會扮嘢！呢點從我一見面問佢：「期唔期待試呢部車？」 Ken：「極之期待！我一定會試真佢！我哋拿拿聲影完試車，試完再影又得，總之好想試！」
得得得！你想試我點會托你手踭？難得你團火咁勁。阿 Ken試咗幾轉後返嚟就話：「成架車都有好大進步，以前 Ford只可以話係歐洲車廠，但 𠵱家 Ford係世界車廠，質素比以前好好多，一坐入車廂就 feel到成個氣氛 cyber咗。」筆者對 Focus ST車廂最深刻一定係一對出自 Recaro手筆嘅桶凳，真皮同布料混合使用，令承托力同防跣效果都好好。「我都係最鍾意對凳，終於設計到個坐墊可以調校得比上代低！由於我個上半身比例較長，所以之前部 ST要拆個凳架出嚟鋸矮佢，呢部就唔使嘞！」


多年來鍾情揭背車，全因當年新牌仔已揸開揭背車，熱情未變。


「新一代引擎用 2.0公升 turbo，比上代更輕更大馬力，令行車動態更靈活。」


Ken話以 250匹頭轆車嚟講， Focus ST算好易操控。

「我個人老實，所以唔揸尾轆車」

揭背車由於受先天車身影響，絕大部分都係用頭驅或四驅，只有 BMW 1系先用尾驅，阿 Ken既然鍾情揭背車，有冇興趣去試吓 FR Hot Hatch？「完全冇興趣！或者因為我個人老實，所以唔揸尾轆車，頭驅或四驅畀我更有信心，我認為我要揸得部車盡，就要完全掌握部車，我有自知之明，尾轆車要用更多精神去揸，我想享受揸車，唔想有咁大壓力，大街大巷突然甩尾點算？」
難得唔認叻嘅阿 Ken，對於 Hot Hatch都有一定要求，就係平衡度要高。「我覺得頭轆揭背車有大馬力唔係問題，如果係 NA引擎會好好多，度力嚟得線性， turbo引擎就配四驅穩陣啲，除非好似呢部 ST咁，可以將 250匹馬力同 35.2kgm扭力控制得線性、車頭比重又比上代輕，咁先至 under control。」明白！一句講晒，即係要穩陣！令筆者諗起百萬富翁問參賽者要 50:50或問現場觀眾。


新款中控台充滿科幻味，已非以往般平實。


後座都採用雙色及混合物料製成，外觀吸引。


表板內增設彩色 mon，可顯示多項行車數據。


中控台上有 3個輔助表，左至右分別顯示，油溫、 turbo壓力及油壓。


靚爆！好耐都冇見過 Recaro桶凳咁有型，單係呢對凳已顯示出 Focus ST身份特殊。


阿 Ken話熄咗個 ESC系統（紅圈）後，車身明顯唔夠定，如非高手，都係唔好熄。


燈掣改為扭掣置放喺軚盤右方。


門檻上都特別用 ST字樣金屬牌。

「揸車係樂趣，所以我一定要棍波， for fun嘛」

除咗揭背，棍波都係阿 Ken買車一大要點，唔係話死牛一面頸覺得棍波比新世代雙極力子波箱快，而係出於享樂。「我從未擁有過自動波車，就算我曾經買過上代 Golf GTi，都冇要 DSG，仍然要棍波！我知 DSG轉波快過棍波，但又如何？唔好玩嘛！揸車係樂趣，所以我一定要棍波， For fun嘛！」
的而且確，唔好同科技拗頸， F1都用半自動波，已證明一切，但自動波同棍波就等如理性同感性，阿 Ken一開始已認定揸車係享受，所以玩味十足嘅棍波會係唯一選擇，職業司機會當佢傻佬。


6速手波喺今時今日已買少見少，難得仲要易於操作，檔位清晰準繩。


阿 Ken對新款嘅 3個腳踏都有好評，話油門同迫力比上代近咗，更方便做踭趾動作。

「呢個價錢極之有競爭力」

筆者問過阿 Ken，上代 Focus有頂級 RS版，點解當年冇買？「當時我買 ST只係 20幾萬，但買 RS就要 40幾萬，我覺得 over price，而且試過發覺唔夠 ST咁好，整體過火咗。」筆者問試過車嘅 Ken，覺得新一代 Focus ST處處有明顯進步，幾多錢先吸引到佢買？「我覺得佢值 30萬頭㗎！雖然比上代貴咗，但我覺得值，畢竟馬力大咗，操控、造功都去到更高水平。」其實 Focus ST現時定價$299,900，比阿 Ken心目中個價更便宜！「嘩！呢個價錢極之有競爭力！」講完呢句，阿 Ken望一望佢部 Audi S3，筆者從佢眼神可以解讀出：「老友，你都係時候退役。」


「我轉波未必夠 DSG快，但當中嘅樂趣唔係自動波可以畀到嘅。」


阿 Ken都有揸埋部 S3到場，試完 Focus ST唔知有冇興趣換車？

撰文：袁國基
攝影：葉偉豪