漫遊毒物

HALO 4駕到　老翻即 ban

2012年11月07日 ~~ 第285期 Face

今個星期 XBox360超大作《 Halo 4》搶頭啖湯，快過新一集《 Call of Duty》見街，機迷們又係時候拎手掣 call友好上戰場。可惜，正版再快都唔夠老翻惡，隻 game早喺上星期已於國內網站流出版任人下載， XBox 360改機玩老翻都唔係咩新聞，不過微軟今次就好快出手發 email畀偷步玩到嘅疑似版用家，通知佢哋已被永久封鎖 XBox LIVE上網服務，絕不手軟，支持正版啦老友！

微軟向疑似盜版用家發出嘅 email，流出版真有其事，不過被 ban帳戶得不償失，千祈咪玩。








都知大家會通宵煲機，早排微軟就搵嚟 Pizza Box合作，推出買 game連薄餅套餐，不過淨係搞 11月 6日首賣日午夜送餐，冇得食睇吓塊多邊形 Halo餅都幾過癮。(預訂電話： 2515 1515) 

士官長復出夠醒神

講番遊戲內容，今集會接住《 Halo 3》個尾，講迷失於太空嘅主角士官長飄流咗去神秘嘅先驅者行星。雖然中間有出過外傳，但士官長自《 Halo 3》後已 4年冇擔正做主角，落 game場問過班 fans，個個引頸以待。英國讀書返嚟嘅 Macro就話大師兄返晒嚟：「之前《 ODST》同《 Reach》麻麻哋。《 Halo 4》試過體驗版，但覺得 multiplay部分『返晒嚟』！似番以前嘅感覺！」一換主角就醒神番晒，製作人講明會出埋 5、 6集玩另一次三部曲，今次士官長真係要講番句「畀我唞吓得唔得呀？」。

英國 Halo迷 Macro意見：
「正傳信心大」

「原本開發班底 Bungie出完《 Halo 3》就唔玩，之後換咗人嘅《 ODST》同《 Reach》都麻麻，但《 Halo 4》話晒係正傳，信心都大啲，點都會支持。」 




限定版套裝內容有遊戲碟、 320GB《 Halo 4》主題圖案主機一部、兩個特別版手掣、有線耳機、及多款《 Halo 4》 DLC。（$3,269） 

Call of Duty
'預訂送小喇叭

《 Halo 4》四年磨一劍，《 Call of Duty》就每年同大家見面，最新一集《 Call of Duty: Black Ops II》將會喺 11月 13日發售。《 CoD》慣例時代背景一集舊戰役一集現代，第七集《 Black Ops I》玩 80年代冷戰，今集第九集《 Black Ops II》話有關連，但就一下子跳到 2025年，仲要系列第一次玩未來戰爭，夠晒 talking point。宣傳都諗新橋 冧 fans，但凡預訂行貨《 CoD:BOII》，有機會獲得瑞士名廠 Atric《 COD》 USB小喇叭一個。（原價：$185），數量有限，送完即止。


今集多人模式引入全新「 Creat a Class」系統，技能種合項目多達 10個，又有排鑽研。


呢隻小喇叭插 USB，畀電腦用幾方便，但就唔係太關打機事。

《 CALL OF DUTY： BLACK OPS II》

XBox 360、 PS3/ACTIVISION/第一身射擊
發行日期： 2012年 11月 13日
售價：$399

Hot Toys念舊
出高衩旗袍
Ada Wong

2013年推出、接受預訂中。
$1,230（ Toy Hunter/2388 4677）

唔少朋友喪煲《 Bio Hazard 6》都係為咗見女神 Ada Wong一面，今集女神換咗髮型再加低 V迫爆皮褸係有新鮮感，但都係《 Bio 4》高衩旗袍造型夠經典，睇吓電影版李冰冰着住旗袍又飛又跳打喪屍就知全世界都係咁話。 Hot Toys都專登出隻舊版 Ada Wong 1/6 action figure畀大家念念舊，配件有包括十字弩嘅 7件武器、特工喼、手提電話、太陽眼鏡，面相做得神似，由於旗袍造型露肉較多， HT決定以外觀先決，手踭、膝頭位有包膠，令成條美腿冇縫重現，不過有得必有失，可動性就點都有啲損失。 




Hot Toys figure多數玩洋人，今次 Ada個樣係做得有東方人韻味。


配件一覽，個喼入面啲針筒可以拎出嚟，電話就跟番原作用舊式摺機，風味十足。

怪誕殭屍狗
Sleeping Dogs
殭屍先生 DLC

外國人情迷喪屍，咩 game都可以有喪 B（喪屍英文 zombie讀音）版，早排大熱嘅港版 GTA《 Sleeping Dogs》都話要玩埋一份推出 DLC「 Nightmare in North Point」，一玩就不得了，原來唔係打美式喪屍，主角換埋件唐裝衫成個《殭屍先生》林正英咁款，班黑社會就變晒清裝殭屍。不過打鬼都係用番 chinese功夫，冇得貼符或者用桃木劍，比較美中不足。但其實個 DLC都係$58，又好難要求佢加太多新操作入去。


都唔知幾耐冇港產殭屍片，呢個 DLC真係滿足到細個睇《殭屍先生》嘅回憶呀！




PlayStation Store/XBox Live售價:$58 

撰文、攝影：司徒港燊