Jason現擁有 7間分店，主打韓 phone，圖中他身處的旺角銀城商場，已開設了 4間鋪。

創業通

𡃁仔專賣韓國手機　月賺 15萬

2012年11月07日 ~~ 第1085期 交易通．搵車快線

時至今日，智能手機主導了香港的手機市場，左鄰右里不是用 iPhone就是三星、 LG，韓 phone愈吹愈熱，在 11年三星於香港地區推出了達 10款智能手機， Galaxy S II更奪去年全球銷售量冠軍。
早在 11前初， Jason看準韓國手機市場，在旺角及灣仔陸續開了 7間手機店，主力售賣全新韓國水貨及二手手機，亦有出售韓國手機配件及提供維修服務。儘管今年香港行機如 Note II貼近韓國同步出機，但 Jason一早搶灘成功，吸到熟客，目前月賺約 15萬元。

記者年過 60歲的媽媽早已棄用傳統簡單功能的手機，轉投用三星 Note，貪個 mon夠大，方便打機、看新聞、上 facebook及 WhatsApp等。
Jason早兩年看到韓 phone來勢洶洶，開始售賣韓國水貨機，「當時唔係咁多水貨鋪賣韓國手機，但我覺得韓國手機款式多， function及硬件可能比行貨仲好，加上價錢比行貨最少平一、兩成，出得又夠快，好似上月出 嘅 Samsung Galaxy Note II LTE 4G，行貨約$5,980，水貨價賣$5,280，有批鍾意玩新機 嘅捧場客，賣水貨有利可圖。」
如香港沒有行貨的韓牌 SKY， Jason也有得賣，「 SKY價錢平， 2千幾有一部，但功能媲美 Galaxy系列 嘅機，識韓機 嘅人都會 buy呢隻牌子；另外水貨有時顏色會齊 啲，如 Samsung Galaxy S III LTE，水貨有埋啡色，內置 32GB記憶容量，售約$4,080，但行貨只有內置 16GB記憶容量，定價為$5,398，早 喺暑假前就有得賣，所以好多客寧願買水貨。部分客人擔心水貨沒有保養，我哋公司會提供軟件 1年保養，盡量令客人安心。」單是 S III LTE自暑假以來，每月平均賣出 200部。


除在銀城設店外，灣仔東方 188商場亦設有 3間分店，當中有專攻手機維修服務。

中學開始上網放機

今年 26歲的 Jason開了手機店近 3年多，他以買賣二手機及配件起家，「我中學時好鍾意玩手機，初初只係識得將舊手機賣畀先達收機店，佢 哋原來有 啲係拆家，慢慢我覺得如果自己放上網賣，可以賺多一百幾十，索性自己做埋收機及向拆家入 啲二手機放上網賣，每部賺到百幾二百蚊，學生哥每月賺到 3、 4千零用，真係唔錯，就係咁同 啲拆家熟落 咗。」
08年時讀完恒商高級文憑， Jason花 6萬積蓄開格仔鋪，但經營不善， 1年後關門大吉，「都係賣二手機易賺錢，最初我花 咗約 1、 2萬去收 啲機去賣，不停入貨不停放上網賣，就連半夜一兩點我都照去交收，密密做每月都搵到 2、 3萬，部分係返頭客，當時 啱 啱 09年，金融風暴發生後冇耐，租金好平，用 7、 8千蚊就租到鋪，所以計劃開鋪做交收點。」
09年， Jason投資了約 15萬，先後在旺角銀城及灣仔東方 188商場開設「電話潮」手機店，又用了高市價人工約 1至 2成挖角去請店員及技術人員，「當時銀城樓上係蘋果維修中心，希望吸到 啲生客；而東方 188係港島區最多二手機賣 嘅地方。」
最初 Jason都是賣各大品牌的二手手機，那時日版機如 Sharp SX833，及 iPhone十分流行，「公司頭 2年冇話賣咩機為主，興咩賣咩， iPhone及配件都算主要收入來源，但 iPhone通行都做，新機一出，當一齊開 party玩吓，收機放畀拆家，平均每部賺到$20至$100，不過好靠蘋果幾時出新機，所以呢 啲都係短暫錢，就好似 iPhone5，咁抽法，好難玩！」


除了新機外， Jason的店內亦有售二手韓國手機，價錢由$2,000起。


水貨韓機比行貨早返，售價又比行貨平 2、 3成。
香港沒有行貨的 SKY A840s，相機像素達 1,300萬，售價$3,180，抵玩！


5＂LG OptimusVu上月在港推出行貨，首批行貨有熱感筆送，售$4,998，而水貨早兩個月已抵港，水貨機售價$3,380。


Samsung Galaxy S III LTE行貨價約$5,398， Jason店中只賣$4,080，每月賣出約 200部。

拆家有窿路賣韓機

客人 Yo Yo
喺度買慣買熟，韓國一有新機出，我就會 嚟問 Jason意見。雖然係水貨，但佢 哋有提供保養，水貨機比行貨平成千蚊，抵買好多。

Jason覺得想長做，必須要有自己獨特之處，自上年初開始主力買賣一手及二手韓國手機，「上年有拆家問我有冇興趣賣韓國手機，一、二手都有窿路入貨，仲可以賣到先找數，我覺得風險低，而且睇到消費者已經接受韓國 嘢，先係韓劇，跟住護膚品，而呢 2年多 咗人轉用韓國手機， Android App又多人開發，三星、 LG等韓國品牌喺香港谷好多廣告，呢個市場開始成熟。」 

於是 Jason把心一橫建造一個小小韓機王國，賣手機外，就連韓國手機零件都入齊，提供專門維修服務；另外手機殼、 mon貼等當然少不了。「其實好多損毀，保養都唔包，例如顯示屏爆爛，去維修中心整起碼$600，另外仲要等大半日甚至幾日，我 哋幫佢 哋整， 15分鐘就搞掂，價錢約$150起，舊時整 iPhone多，慢慢客人知我 哋有齊韓國機零件，都多 咗人搵我 哋，主攻韓機市場，令公司生意多 咗 2成。」


現時手機維修佔生意額 4成，所以 Jason聘請多名師傅駐場，無論 iPhone或韓國手機都可即時維修，收費比品牌維修中心平 6、 7成。


店外列明維修項目範圍，由百餘元起。

再開 5店爭佔有率

Jason出生於音樂世家，他考獲 8級小提琴及鋼琴，幾年前都有兼職教琴，自創業後無時間再教。

坊間少有專玩韓機的鋪頭，現每有新機出，好多客都預早向他查詢或訂機，「以前韓國水貨機最大問題係睇唔到及寫唔到中文，我同店中技術人員上網搵資料去學及試驗，之後幫 啲水機改晒中文，除 咗 喺網上放賣當宣傳外， iPhone4開售時，有個老友寫 咗個 app幫人去訂機，個 app有我間鋪條 link方便人放機，幫到我宣傳。」
上年中， Jason在銀城租多 3間店，而今年亦在 188商場租多 2間店， 7間店合共賺約 15萬。現時維修手機佔公司收入 4成，而出售配件及售賣手機各佔 3成。
「呢 啲都係我邊做邊領悟到 嘅市場策略，係商場佔有率技巧，我做旺 咗個場，多人識 嚟銀城買手機及配件，如果畀其他行家 嚟開鋪，可能會分薄 咗；另外好似 188嗰邊 啲客鍾意格價，會去幾間，所以商場左中右都有我 嘅鋪，命中率大好多， 188有個鋪我等 咗成 3年先租到！」
訪問當日，客人接踵而來，整機、問價、買配件，店員不時穿插幾間鋪，忙個不停，看來他的部署已達到目標。 

創業投資

租金：$0(上網放售)
入貨：約$20,000
雜費：約$300
總投資：約$20,300

每月收支

租金：約$100,000(7間店)
人工：約$100,000(7全職 3兼職)
入貨：約$70,000
雜費：$5,000
營業額：約$420,000
盈利：約$145,000

電話潮

地址：旺角西洋菜街 2A銀城廣場 1樓 11、 13、 15、 16號鋪
電話： 2388 1362

收放水貨機注意咩？

採訪當日，記者都賣了部 iPhone4給 Jason，他們一收機，慣例會 check清楚部機外貌、性能、有沒有改過機及被水浸過、是行貨機或是水貨機等，這些都會影響到收機價錢，如有盒和充電器，收機價可高幾十元。此外，最好要求客人提供單據，避免收到賊贓。
至於出售水貨手機方面， Jason說店員要熟悉水行貨的分別、行貨推出日期等，水貨定價一般會比行貨平 2、 3成，「如果想入行，可以由二手機入貨先，最初可預 5萬入貨，入到約二、三十部機，慢慢同拆家打好關係，就可以先入貨後找數，咁就唔怕砸貨及預留大量資金。」 

撰文：陸伊琳
攝影：彭自維、傅新發