女士春秋
李桂蘭 年終無休
改革
李桂蘭（ Olivia）已上班一個多月，她在 TVB的職銜是顧問（業務發展）。年薪過百萬的她究竟負責什麼？「我要睇 overall concept of《 TVB周刊》，增加讀者人數，增強不同的 advertising。《 Dolce Vita》度亦想睇吓點增加廣告。」即係幫 TVB開源搵錢。
身為 ball場常客的 Olivia，自她上場後《 TVB周刊》的社交版已加了版數，她亦多了去 function，「我又鍾意 party，不過呢度出去好遠，我都減少咗。」識扮靚的她更發揮專長，十元一書兩冊的《 TVB周刊》，之後可能再有一本 supplement，「《忽然 1周》有《 me!》，《東方新地》有《 more》，你哋都有《 Next+One》，個個好成功，我哋可以從這方面發展，內容多數 fashion、 cosmetic、 social pages， lifestyle，同事都好 excited。」開正你嗰瓣？「我買嘢都買到熟晒，好 understand點樣做得好。」
著住 Masha Ma皮裙的她步入電視城的飯堂時，即惹人注視。不知她是公司顧問的，會細細聲猜她是名媛。李桂蘭笑話：「佢哋話阿太入嚟做嘢。」
她和利孝和夫人陸雁群是鄰居，因而熟絡，「表哥嘅女亦嫁咗入陸家。」
Olivia和家姐李麗娟（右）仍活躍 ball場。
伯樂六嬸
別人都以為 Olivia入 TVB，是由常與她孖住去 ball場的利孝和夫人引薦，實情是非執行董事方逸華請她回來，她猶豫了一會才承認，「在一個二人茶聚上，佢問我喜歡做乜，我都鍾意做傳媒，又鍾意 party，我又識好多人，《 Tatler》搵我都係因為我個 connection。」《 Tatler》人人坐着看她的首本戲，有外籍同事便質疑她真的約到合和主席胡應湘太太做訪問？「我即刻在 conference room打俾 Ivy（胡應湘太太洋名），同 Ivy講：『 Ivy有人蝦我，話我搵唔到你做訪問，你可否幫我做 interview。』佢話得無問題，我成功係好多朋友支持我。」但 ball場廣結人緣之道呢？「我媽咪教落要熱心幫人，啲人問我嘢，我能力做到都做，家姐又識咁多人，先生在法律界又識好多人，慈善方面我又做唔同 support。」
○一年，李桂蘭獲十大最傑出衣著人士獎，獲獎者還包括何超瓊（右二）和舒淇（左五）。
做編輯
她在《 Tatler》時，請來彤叔（左三）、霍震霆（右三）等上流人出席晚會。
無綫老闆陳國強（右二）率領無綫高層樂易玲（左一）等，為南丫島海難哀悼，左二為李桂蘭。
縱橫 ball場多年的李桂蘭的確是人脈廣博，她為人又抵得諗，今年八月友情替九巴後人雷禮權的生日會做公關，就算生日會過後她要飛英國，她一到步不理時差即時回答傳媒查詢，是傳媒之友，亦是名人之友，「我做訪問會錫住佢哋，知佢哋避忌乜。」她為利蘊珍的「運動燃希望基金」、趙式和的畫廊活動及前滙豐私人銀行亞洲區行政總裁王以智的籌款晚宴做宣傳，一樣不收錢。「幾千蚊長途電話，但不緊要，我退休 from《 Tatler》有時間消磨，幫佢哋 quite happy。收咗錢同人做仲煩，你認為你做咗好多，但對方未必認為，呢啲嘢無一個標準。」
其實 Olivia可以做闊太歎茶行街唔使憂，但她就是愛工作。比她年長九年的英籍丈夫 Peter退休前是大律師，一家人住大潭水塘道，李桂蘭婚後只是湊仔女，做室內設計，最大嗜好是買衫，買到九五年丈夫叫她開時裝店 Peggy Boyd by Olivia，她的顧客有前港產丹麥王妃文雅麗。 Olivia更為○一年港姐總決賽設計 Haute Couture，早已和 TVB結緣，「先生叫我利用專長做生意，等我唔使有咁多時間買嘢。」說起六年前入《 Hong Kong Tatler》做編輯、公關及策略總監， Olivia笑着說：「當時係我第一次幫人打工。」
搞時裝
九五年至○二年她在太子大廈開時裝店，因租約期滿， Olivia不想花錢搬新鋪而結業。
她為○一年港姐設計性感希臘神話服飾，右一為冠軍楊思琦。
半秒
不過辦公室政治時時有，李桂蘭憶述初入《 Tatler》不久便搞晚會，在安排座位上遭同事刁難，她話：「好似第一年做 Tatler ball， chief editor話唔相信呢個人肯和另一個人坐，我即刻打俾秘書，秘書話得。我話你咁清楚，你 plan呀！我去洗頭，第二年第三年無咁嘅事，老闆都話 whatever you say。」有傳她跟公司鬧不快離開， Olivia否認說：「無不快，是兩年前先生鼻腔內生咗肉粒有個小手術，又話佢要通波仔，公司四月有個 ball，老公三月三十日開刀，我真係好擔心，所以十一月已話唔做。」
如今加入有十五年歷史的《 TVB周刊》， Olivia給自己壓力，「有時也瞓唔着，殘晒， but it's ok，我有《 Tatler》 track record，《 Tatler》好成功。」不過有說李桂蘭愛追求完美，和她合作的同事豈非壓力很大？她不介意自爆說：「我喺《 Tatler》時，佢哋 nickname我半秒，即一秒也唔等得，我希望唔會（覺得有壓力）。」
廿多歲時的李桂蘭。
Olivia在瑪利諾修院學校畢業後，十九歲便結婚，婚後育有一子，婚姻維持六年便離婚。
她和第二任英籍丈夫 Peter（中）育有兩名兒子 Sean（左一）、 Miles（右一）及女兒 Shelly。
今年李桂蘭義務為雷禮權的生日會做搞手。
每季的新款時裝， Olivia都率先著上身，圖中她穿的是○一年的 Dior和服裙。
撰文：李苑欣
攝影：葉志明
化妝： Omix B
髮型： Van Chan@HAiR
服裝：連卡佛、 Alice and Olivia、 Stella McCartney
留言列表
