豉椒牛肉寶老團$50
都有豉椒味，牛肉七成熟，但就不能跟飯團一齊咬開。

試食王

廚魔新搞作

2012年11月22日 ~~ 第1185期 香港《壹周刊》

米芝蓮二星餐廳 BO Innovation名廚梁經倫（ Alvin），號稱廚魔。將鬼佬唔敢放入口的梅菜扣肉和臘味，以分子料理方式變成 cappuccino和雪糕，的確是鬼才。將粵菜以另一方式發揚光大，也可叫香港之光。不過，分子料理，會欣賞的人不多，更重要，未必人人食得起。最近，廚魔在 BO Innovation樓下新開一百蚊填得飽肚，主打健康沙律卷物的 Beautifood，便吸引不少慕名者前往。

我對健康食物的看法，是天然原味，還原基本，愈簡單愈好。分子料理將食材變得面目全非，當然談不上健康。今次廚魔設計的食物卻以健康為賣點，網上還大受好評，對它的期望頗大。 Beautifood以外賣為主，午餐時間未到，已有 OL和鬼佬排隊買外賣。店仔細細，得五個吧枱位，唔好諗會坐得舒服。沒有侍應，但廚師們友善有笑容，服務過關！
Beautifood提供輕食，寶老團（卷物）和沙律各有五款，全部$50蚊份，一款沙律加半客寶老團的套餐就要$68，名廚設計喎，都唔算貴啦！飲品得 S. Pellegrino礦泉水和四款茶選擇，幫襯當日仲要得番茉莉花茶，咖啡汽水都無。嘩，真係健康！


三色撻哥（跟餐$68）
甜腐皮內有味噌茄子、烤南瓜配奶油乳酪和牛肝菌配洋葱奶油，好膩！


魔廚黑凱撒沙律（跟餐$68）
幾開胃，但食唔出餐牌上寫着的煙肉香味手撕雞。

卷物款式有粵式蒸魚、四川辣雞和豉椒牛肉等口味，和 BO差不多，以中菜為基礎玩花式。雞牛魚肉有原狀，沒變成泡沫或啫喱。大部分卷物加入糙米。四個人點了四款卷物，四川辣雞算是最惹味，當中的酸青瓜很爽口，四川芝麻醬夠香辣，但不覺有鮮雞味。豉椒牛肉配搭日式七味粉，有點怪，咬開飯粒洋葱，又咬不開美國安格斯牛肉，食得論盡。粵式蒸魚糙米卷內有清蒸鯛魚，但全部人都食唔到有魚味。三色撻哥是甜腐皮卷，但入口餡料水汪汪，得個甜字，食到一半放棄。


鹹檸三文魚沙律（跟餐$68）
海苔好脆，有醋香，但又係食唔出鹹檸味。


粵式蒸魚寶老團$50
無魚味，仲有，唔慣食凍了的中菜。

沙律方面，點了廚魔黑凱撒和鹹檸三文魚，蔬菜很新鮮，沙律醬清新開胃，亦欣賞脆口的海藻片。但沙律名字的趣味度，如八珍甜醋和走青等，遠遠大於賣相和味道的驚喜度。四個人吃到不想再吃，可能是糙米飯有頂肚感。但相隔一小時後，當中三個人，包括我，食得落兩碗拉麵。我想，我還是比較喜歡小炒店的蒸魚和豉椒牛柳。新派健康沙律卷物，都幾有新鮮感，但一次就夠！或者，鬼佬去至會覺得 amazing！


堂食好逼。


選擇唔多，餐牌一眼望晒！

評分

食物：★★ 1/2
服務：★★★
環境：★★ 1/2
價錢：★★★ 




Beautifood
地址：灣仔莊士敦道 60號 J Senses地下 3號鋪
電話： 2860 0012 

試食王

喜歡外出用膳，也喜歡誠實，不相信飲食網站的所謂評分，也怕了所謂食家獲得優待後的意見，情願隱姓埋名，真金白銀，測試飲食雜誌飲食網頁捕捉不到的真實一面。

$128法國藍青口做午餐

頭盤加法國藍青口加咖啡或茶的午市套餐$128，另加$30可配白酒或紅酒。

中環亞畢諾道的 Brasserie de L'ile裝修猶如法國北部小酒館，由法籍大廚坐鎮。當中的法國藍青口傳統正宗，極受歡迎。餐廳由今月起，推出$88至$128的兩道菜連咖啡或茶午市套餐，主菜便有法國藍青口、牛柳、意粉及法式薄餅可選擇。另外，餐廳每日下午 5時至 7時半已劃為歡樂時光，客人只要點選葡萄酒，便可獲送法國佐酒小吃拼盤一碟。當中包括自家製豬肉腸配多士及香橙果醬，烤橄欖煙肉串和羊芝士等，十分豐富。

Brasserie de L'ile
地址：中環亞畢諾道 4號
電話： 2147 2389
營業時間： 11am-11pm 

上海地道薺菜隨時食

薺菜豬肉水餃$15.9/包，比一般菜肉餃鮮香，口感柔嫩。

每次去上海，都會跑到進賢路的街坊菜館點一碟薺菜。產於江南的薺菜，菜香勁鮮，在當地已供不應求。在香港，更只有一隻手數得晒的菜檔供應。灣仔碼頭最近便採用這少數菜檔的薺菜，加入豬肉製成新口味水餃。水餃加熱後，仍然皮薄煙韌，最意外，是薺菜不減鮮香，和在上海吃到的新鮮家常炒菜一樣鮮美。

售賣點：各大超級市場
查詢： 2838 8038 

撰文、攝影：試食王