漫遊毒物

校鬧鐘打機龍友齊玩 Puzzle& Dragon

2012年11月21日 ~~ 第287期 Face

近期同班 friend講得最多嘅 game唔係《 Call刁》、唔係《 Hey佬》，而係手機遊戲《 Puzzle& Dragon》（簡稱 PAD）。隻 game iOS版出咗一年有多，日本早已 hit爆，早排推出埋 Android版，香港玩家容易下載，變得更受追捧。呢輪《 PAD》雙平台總計下載超越三百萬，紀念活動源源不絕，比如同《 Final Fantasy》搞 crossover！

FF亂入　特備 Event毒性高

《 PAD》本身係 free app，除咗畀真錢抽怪，仲經常有特別任務，令玩家能夠打出特定怪物，一眾「龍友」 WhatsApp、 fb互通消息，校定鬧鐘就番日本時間上網打寶，玩咗《 PAD》過 200日嘅老手 Caudi，就最鍾意呢類特別 event：「最近同《 Final Fantasy》外傳遊戲《 Crystal Defense》合作， RPG迷必識嘅龍王巴哈姆特都可以打到出嚟，有型新怪出不停。另外隻 game不時有緊急 event，有時得一個鐘，真係校鬧鐘七點起身打金屬龍，又同朋友互通消息，成班 friend一齊努力，打極唔厭。」

《 CD》特備節目有《 FF》職業同怪獸收集，圖為小偷一角，之前仲有《太鼓之達人》 event。

有圖為證，一眾龍友朝早 7點起身點知見唔到原定嘅緊急任務，即刻喺 WhatsApp任通消息。

圖中係惡龍巴哈姆特，絕招一下打過 10萬血，隻 game有難度考技術。

Caudi讚《 PAD》除咗畀錢買魔法石抽怪（ 10粒約 70港元），靠自己努力打一樣得，佢玩咗咁耐$1都冇用過。而且唔係一味搵錢，除咗肯聽玩家意見改良遊戲，特別節日、甚至 11月頭死 server，都送魔法石益用家。

PAD玩家 Caudi

玩法簡介

簡單啲講，係方塊 Puzzle遊戲加 RPG，唔同色方塊連結成功等如召喚寵物攻擊，實時玩法似足寶石方塊《 Bejewel》進化版，除儲寵物合成升 Level、進化加強實力，仲考埋你即時反應。

貼紙港日熱賣　 11月底再賣

《 PAD》喺日本更係賺錢機器，最近推出咗一款貼紙，有機會隨機抽到 5隻限定虛寵。玩具店店主林生都入咗 20盒左右，數日已近售罄：「日本嗰邊直頭炒到 8000日圓一張限定怪。隻 game勁在角色設計有日本風格，有啲似 Pokemon，有啲又幾靚女，預計會繼續 hit落去，日後都會留意相關商品。」

貼紙一盒 20包，每盒入面一定中 3隻怪，唔少玩家都會選擇成盒「爆」，免得好嘢俾人抽走。（約$550盒/$35包、已售罄、預計 11月返貨。查詢：日通動畫/2560 5806）

日通動畫負責人林先生

水貨 PS Vita超低價　 Game限定版唔過$2,000

限定版 Vita主機套裝唔夠$2,000！

PlayStation Vita發售接近一年，唔少人都覺得冇乜 game玩。最近成功爭取到歐美廠支持，兩款超大作《 Call of Duty》同《 Assasin's Creed 3》 PSV版上市，落 game場睇 Vita有冇反彈，竟發覺歐版主機連 game套裝唔只冇炒，《 COD》限定版仲劈到$1,899，比行機 WiFi版淨機$2,280更平。行家話行貨貨源較少，又睇好歐美 game限定版香港有客路，所以一早做準備搵到批歐美平貨，兩日已賣過 100部。證明只要整多啲好 game， PSV呢部機能強勁嘅手提機，絕對會有捧場客！

《 Call of Duty Black Ops Declassified》
Activision/FPS/1-8人/$298
遊戲講述《 Black Ops》 1、 2集之間嘅外傳故事，同 PS版連線仲可以為家用版開隱藏地圖，本身對應 Wi-Fi網戰，可 4 Vs 4網戰。

《 Assassin's Creed： Liberation》
Ubisoft/ACT/1人/$298
首次用女刺客做主角，講述 18世紀法國同印度嘅戰爭，同正傳一樣咁有故事性。

光榮又玩三國志

追咗十年有多嘅三國漫畫終於講到長阪橋就快打赤壁喇，心中一顆三國魂又再燃燒。《真．三國無雙 7》就要下年先玩到，但玩三國玩到出神入化嘅光榮除咗無雙之外，最近仲有隻網頁版遊戲《百萬人的三國志 Special》現已開始公測，由紅心辣椒代理中文版，上網頁 facebook帳戶就直接玩到，免費註冊，真錢用在入點買虛寶上面。玩法同一般手機 app差唔多，抽武將做任務，勝在用於光榮三國志啲人設，幾有親切感。
官網： http://100s.wasabii.com.hk/

隻 game用番傳統《三國志》人設唔係《無雙》，呢個劉備比較老實啲，冇留長頭髮長「的水」。

每個武將都有 cost，要喺限定 cost內組成自己嘅隊伍進行任務或決戰，勝負取決於特技、武將能力同屬性等不同因素，但玩法就冇動作元素。