芒果枕邊人$48
酥皮焗後大膨脹，夾層有芒果 cream，再加埋大馬芒果果肉，大大片，包保見到嘩嘩聲！

潮𡃁便當

秋日甜入心

2012年11月21日 ~~ 第287期 Face

今個秋天，市面除了傳統的生果甜品，仲花款多多，大玩冷暖對比及口味落差，焗麵包加雪糕、黑胡椒加心太軟、芝士加青無花果就是好例。
有咁多甜品在左近，幾時都如沐春風， sweet爆啦！

放題加推 80款

由舊花園街店搬到位於煙廠街新址，土屋將以往甜品放題的特色發揚光大，新店內放題甜品數目，由以往 50多款，大幅增至 80多款，當中人氣之選包括朱古力朗尼、木糠布甸、蘋果金寶及芝士蛋糕等，啱晒心思思又想點多幾款的朋友。提提大家，如果想避開人多擠迫，下午 3點鐘去，就最適合不過呢！

士多啤梨梳乎厘$43
梳乎厘軟滑，帶士多啤梨的甜甜酸酸，好開胃，唔小心就食多咗。

提拉米蘇朱豬$48
濃郁的 tiramisu忌廉，配以朱古力脆脆及朱古力醬，鬆脆可口，特別加入脆豬包，外脆內軟，食落層次更為複雜。

麵包布丁$42
布丁入口軟綿綿，蛋香味濃郁，最驚喜是以切片香蕉佐底，雙重享受。

焗西米布甸$30
加入 3.6北海道牛乳，布甸奶味濃郁，較杰身，西米大大粒，又滑又軟。

蘋果金寶$42
用上炒香過玉桂、牛油及蘋果，入口香脆卻又不至太硬，配埋呍喱嗱雪糕，暖洋洋之中帶點冰涼，口感豐富。

焗芋頭酥皮卷$45
外層以脆薄酥皮包裹，裏頭夾上芋頭茸及海綿蛋糕，芋頭茸入口即溶。

阿成、阿慧　物業管理

最鍾意呢度嘅 3.6牛奶奶凍，入口好滑、奶味夠濃。最正係呢度有埋甜品放題，唔係好多地方有咁多選擇，質量又唔差。

土屋
地址：旺角煙廠街 33號朗廷軒地下 A鋪
電話： 2332 6990
營業時間： 3pm-1am
放題價：
3pm-6pm入座　$98/位
6pm-11pm入座　$118/位

日賣 60件拿破崙

天后甜品店多賣中式糖水為主，新開 1個多月的殿糖級，就中西糖水都賣，更在荃灣設有自家工場，自製酥皮、糯米粉皮以及包括榴槤班戟的蛋皮，即日使用，不留過夜。店內西式甜品，更是老闆劉先生請來前 Conrad酒店、擁有 20多年製甜品經驗的師傅一手包辦，有殿堂級師傅坐鎮，難怪熱門三甲酥皮拿破崙日賣 60件，最快半小時內售出 18件。

紅鑽酥皮拿破崙$40
店內人氣之選，酥皮乃自家搓製，入口鬆脆，每層均夾有吉士醬及美國士多啤梨，大大份，好吸引！

芒果雪花卷$24
選用菲律賓香芒，入口清甜，果肉結實，配埋軟軟綿綿的糯米卷，正！

法式士多啤梨窩夫配雪糕$38
窩夫出爐熱騰騰，配上雪糕玩冰火，佐以香甜士多啤梨，口感豐富。

榴槤班戟$25
選用泰國金枕頭，榴槤飄香，夾埋手打忌廉，好 match。蛋皮則混和 3.6牛奶搓成，呈鮮黃色，榴槤迷必試！

原個椰皇燉 3.6牛乳加燕窩$60
特選不老不嫩椰皇，椰香濃郁但椰王水不多，加入牛奶後，不會奪去奶香。加埋迫到上頂的燕窩，乃秋冬滋潤之選。

Susan　新加坡遊客

我聽朋友介紹而嚟，呢幾日都嚟咗幾次，鍾意榴槤班戟，好香，入口果肉好豐滿。

殿糖級
地址：天后電氣道 66號地下
電話： 2512 6881
營業時間： 3pm-2am

創新辣味心太軟

為一圓生意夢， Timmy與 3位合夥人決心將在灣仔萬麗海景酒店學做甜品的經驗，轉化成店內招牌甜品，走平民路線。首推黑胡椒心太軟及鳥結糖芭菲，前者微帶辛辣味、後者則將焗過的果仁碎，結合焦糖去炒，待芭菲凝結後才叫完成，製作過程繁複。其次還有以伯爵紅茶整成木糠布甸以及一式三隻味包括青檸、呍喱嗱、伯爵紅茶味的焦糖燉蛋，坊間少見。

黑胡椒心太軟$45
齋睇冇咩特別，但食落，香濃的心太軟朱古力醬內微帶黑胡椒辛味，在喉頭久久不散，但搭配不見突兀，甚有驚喜。

鳥結糖芭菲$45
果仁焗後入口香脆，配合表層的果仁脆脆一起吃，非常配合。

伯爵紅茶 Oreo木糠布甸$33
將新鮮茶葉放入忌廉內浸足 1晚，令茶香盡入忌廉之內，再將忌廉及木糠碎逐層鋪上，不能太厚、亦不能太薄，味道才能平衡。

熱情果梳乎厘配芒果汁$33
梳乎厘內含大量熱情果籽增強口感，配合清甜芒果汁，好 fresh！

三色燉蛋$38
包括青檸、呍喱嗱、伯爵紅茶味，先由青檸吃起，然後呍喱嗱，最後吃伯爵紅茶，由酸至甜，味道層層深入。

下一站…甜品
地址：佐敦渡船角文苑街 38號地下
電話： 2783 8368
營業時間： 3pm-1am

獨創鹹香芝士甜品

一向提供甜品小食意粉的 Mackie Kitchen，最近推出一系列最新甜品，獨創的格魯爾芝士砵酒釀無花果撻，加入瑞士有名芝士品牌 Emmi的格魯爾芝士，再以紅酒浸上 1整天，將無花果的香甜配上濃郁芝士味及淡淡酒香，層次豐富，味道創新。除了甜品， Mackie Kitchen更特地為入秋選入一批限定花茶如洛神甜莓茶及黑醋栗果茶等，開胃健康，邊食邊飲都得。

11月新品：法式蘋果撻伴雪糕　價錢待定
靈感來自法式薄餅，建議將雪糕塗抹在青蘋果片上，然後將 2層自搓酥皮包裹餡料一齊進食，酸酸甜甜。

11月新品：蘋果酥皮條　價錢待定
將青蘋果磨成蘋果茸後釀入其中，由於當中冇加任何調味，蘋果品質決定一切。

11月新品：格魯爾芝士砵酒釀無花果撻$58
香甜無花果加上瑞士格魯爾芝士的鹹香融為一體，非常特別。

花茶$35
入秋限定，包括洛神甜莓茶、黑醋栗果茶、玄米煎茶、凍頂烏龍茶 4款。

心太軟伴雪糕$48
選用進口瑞士 70%黑朱古力，外脆內軟，配合雪糕，一冷一熱，對比強烈。